وەلید جونبوڵات سەركردەی پارتی پێشكەوتنخوازی سۆسیالیست لە لبنان ئەمڕۆ سێشەم داوای لە دورووزەكانی سووریا كرد كە لە پارێزگەی سوەیدای باشوور نیشتەجێن، بەشداری لە سەركوتكردنی جەماوەری راپەڕیو دژی رێژیمی بەشار ئەسەدی سەرۆكی ئەو وڵاتە لە پاڵ هێزە تەناهییەكاندا نەكەن.

جونبوڵات لە لێدوانێكی رۆژنامەوانیدا گوتی، بەنی مەعرووف لە سووریا، وەك ئاماژەیەك بۆ دورووزەكانی ئەو وڵاتە، باش دەزانن كە رەوڕەوەی شۆرشی گەلان بۆ دواوە ناگەڕێتەوە و یادەوەری جەماوەریش بێ بەزەییە و ئەوانەشی لە ناوچەكانی دەرعا، سەنەمەین، بەسرە حەریر، خەربە غەزال، حمس و حەما و شارەكانی ترن، ئەوان خاوەنی دواڕۆژی ئەو وڵاتەن.

زیاتر گوتی، كاتی ئەوە هاتووە واز لە پاڵپشتیكردنی پۆلیس و سوپا بهێنرێ، كە سەرقاڵی سەركوتكردنی گەلی سووریان و تەرمی سەدانیان گەیشتووەتە ماڵباتەكانیان بەهۆی وەستانیان دژی كەسوكاریان لە ناوچە جیاجیاكانی ئەو وڵاتەدا.

لە ناوەڕاستی ئادار/مارسی رابردوو راپەڕینی گەلی سووریا دژی بەشار ئەسەدی سەرۆكی سووریا دەستی پێ كرد و ئێستەش بەردەوامە و بەپێی ئاماری پێشتری نەتەوە یەكگرتووەكان تا ئێستە زیاتر لە 4 هەزار كەس كوژراون.