عێراق داوا لە فەرەنسا دەكات پارە گیراوەكانی ئازاد بكات
لە رایگەیاندراوێكی وەزارەتی دادی عێراق ھاتووە، وەزیری داد، سالار عەبدولستار محەمەد لە میانی دیداریدا لەگەڵ باڵیۆزی فەرهنسا لە عێراق، برۆنۆ ئۆبیر و كۆنسول لۆك سبیبرۆك و شاندی یاوەریان باسیان لە پەیوەندییەكانی دوولایەنەیان و چۆنییەتی پەرپێدان و بەھێزكردنی ئەو پەیوەندییانەیان كردووە.
لە راگەیاندراوەكەدا ھاتووە، "عێراق ھەوڵ دەدات ئاسۆیەكی نوێ بكاتەوە لە ھاوكاری ھاوبەش، بەتایبەتی لە ئەگەری واژووكردنی یادشتنامەیەكی لێكتێگەیشتن یان ھاوكاری لە بواری یاسایی و ئاڵوگۆڕكردنی شارەزایی لە نێوان وەزارەتی دادی عێراقی و فەرەنسایی لە ئایندەیەكی نزیكدا".
وەزیری داد عێراقی روونیكردووەتەوە، لەگەڵ لایەنی فەرەنسایی باسی ئازادكردنی ئەو گوژمە پارانەی سەر بە حكومەتی عێراقی كردووە، كە لە لایەن حكومەتی فەرەنساوە دەستیان بەسەرداگیراوە و داوای گەڕاندنەوەیان كردووە، ھەرچەند بڕیارێك ھەیە لە لایەن ئەنجوومەنی ئاسایشی نێودەوڵەتییەوە بۆ ئازادكردنی ئەو گوژمە پارانە.
k24 -