لەوەدابووم بیر لە بابەتی وتاری ئەم هەفتەیەم دەكردەوە كە بەڕێكەوت هەواڵێكم خوێندەوە دەڵێت(حكومەتی هەرێم بڕی «200 هەزار دۆلار» بۆ نەخۆشیەكانی «خوێن و مێشك و شێرپەنجە و دڵ» تەرخان دەكات و، ئەو بڕە پارەیە بەسەر ناوچەكانی «سنوری گەرمیان و كەركوك و قەزای خانەقین» دابەشدەكرێت. هەروەك لە درێژەی هەواڵەكەدا هاتووە كەوا ئەو پارەیە وەكوو «هاوكارییەك»ە بۆ ئەو كەسانەی «ئەو نەخۆشیانە»یان هەیە. لەدێڕی كۆتایی هەواڵەكەدا هاتووە گوایا «تەنها ساڵی 2011، 278 نەخۆشی شێرپەنجە و 510 نەخۆشی دڵ و 51 نەخۆشی خوێن و مێشك» تۆماركراون.)
سەرلەبەر ئەم هەواڵە كە هیچ مەرجێكی پرۆفیشناڵێتی رۆژنامەوانی تیانییە، چونكە ئەگەر رۆژنامەنووسێكی پرۆفیشناڵ ئەو هەواڵەی بهۆنیایەتەوە پرسیارگەلێك هەبوون دەبوو بیانكات، چونكە خودی هەواڵەكە چەند رەهەندێكی سەرسوڕهێنەر لەخۆدەگرێت، ئەوەندە راچڵەكێنەرە كە خستمیە بەردەم كۆمەڵێك پرسیار: ئایا ئەسڵەن مەبەست لە بەخشینی ئەو پارەیە چییە بەو نەخۆشانە؟ تۆبڵێی بۆ ئەوەبێت دواساتەكانی ژیانیانی پێ ببەنەسەر؟ داخوا هەر نەخۆشە چەندی بەردەكەوێت؟ بۆ چ مەبەستێك خەرجی دەكات؟ ئایا ئەو بڕە بەشی چەند نەخۆش دەكات، لە كاتێكدا بۆ چوار جۆر نەخۆشیە لەنەخۆشیە هەرە سەخت و دژوارەكان! جگە لەوەی تەرخانە بۆ سێ ناوچەی وەكوو سنووری گەرمیان و كەركوك و خانەقین؟.
بەپێی زانینم تەرخانكردنی بودجەیەكی لەمجۆرە بەستراتیژو پلان دەبێت، لانی كەم پێشتر لێكۆڵینەوەی بۆكراوە، هەڵبەتە قسە لە نیەتی بەخشینەكە نییە، كە رەنگە هەندێك بەبەخشندەیی و میهرەبانی پێناسەی بكات و، ئەوەش لەباشترین لێكدانەوەیدا ئەچێتە خانەی «خێرپێكردن»ەوە. بەڵام بەدیوێكی تردا دەبێت بپرسم: ئایا چارەسەری ئەو نەخۆشیانە بەمجۆرەیە؟ ئایا ئەسڵەن 200 هەزار دۆلار كە نرخی تەنیا شوققەیەكە لە شوققە گرانبەهاكانی گەڕەكە پێشكەوتوو و كەشخەكانی ناو شارەكانی هەولێر و سلێمانی، مووچەی چەند حزبیەك و چەند وەزیرێكە كە لەباشترین هەلومەرجی تەندروستی و ژیانیدا دەژین و لەباشترین نەخۆشخانەكانی هەرێم و دەرەوەی هەرێم چارەسەری نەخۆشیەكانیان دەكرێت. هەر بەو بڕە پارەیە نرخی تێچووی ئاهەنگی هاوسەرگیری كوڕی یەكێك لە حزبی و وەزیرەكانە لەگەڵ، نرخی تێچووی مانگی هەنگوینی كوڕ و كچە بەرپرسێكە.
یەك بیردۆز هەیە كە ئەم حزبە دەسەڵاتدارانەی كوردستان مامەڵەی لەگەڵ هاووڵاتیاندا پێدەكەن، ئەویش بیردۆزی كڕین و فرۆشتن، هەمان بیردۆزمان لەكاتی هەڵبژاردنەكاندا بینی وەختێ نەعلی لاستیك و دزداشەو مەنجەڵی بوخار و دەمانچە ئەدرا بەخەڵكی ئەو ناوچانە بەرانبەر بەوەی لەهەڵمەتی هەڵبژاردنەكاندا دەنگیان بۆ بدەن، ئەم بیردۆزەش ئەزموونەكانی مێژوو نشوستیی و فەشەلی پشتڕاست كردەوە.
ئەگەر ژمارەی ئەو نەخۆشانەی لەسەرەوە ئامارەكەیان هاتووە ئەمساڵ 2012 زیادی نەكردبێت دەكاتە 839 نەخۆش، ئەگەر ئەو بڕی 200 هەزار دۆلارەیان بەسەردا دابەشكرێت، ئەوا یەكی 238 دۆلار و 37 سەنتیان بەردەكەوێت، كە بە دراوی عێراقی دەكاتە نزیكەی 300 هەزار دینار، كە بەشی خواردنی هەفتەیەكی خێزانێكی چوار سەرخێزانی ناكات.
لەمە زیاتر كۆمێنت نادەم، بەڵام هیواخوازم حكومەتی هەرێم لەمە عەقڵانیتر بیر لە خزمەتی هاووڵاتیان بكاتەوە، هەڵبەتە مەسەلەكە ئەوە نییە پارەی زیاتر بدرێت بەو نەخۆشانە، چونكە نەخۆش پێویستی بە پارە نییە، پێویستی بە چارەسەرە، چارەسەریش پێویستی بە نەخۆشخانەو دەرمان و پزیشك و تەكنیكی تازەو ئیمكاناتی پزیشكی و تەندروستی سەردەمییانەو و پێشكەوتووە. ئەوەش بەكەمێك ستراتیژ و پلان و دەسگرتنەوە لە پڕۆژە تایبەتەكان ئەنجام دەگاتە ئامانج.