ناسكە ڕەسووڵ: هەر كەسێك بەهرەیەكی هەیە، پێویستە بە هەدەری نەدات و گەشەی پێ بدات

ناسكە ڕەسووڵ:  هەر كەسێك بەهرەیەكی هەیە، پێویستە بە هەدەری نەدات و گەشەی  پێ بدات

 

 

لە ماوەی چەند ساڵی ڕابردوودا بە هۆی كۆمەڵێك قەیران كە بەرۆكی هەرێمی كوردستانی گرتەوە، لە سەرووی هەموویانەوە بڕینی مووچە و قوتی خەڵكی لەلایەن حكومەتی عێراق و هاوكات ڕووبەڕووبوونەوەی تیرۆریستانی داعش كە لە چەندین قۆڵەوە هێرشی ناڕەوایان بۆ سەر ناوچەكانی هەرێمی كوردستان ئەنجامدا، لە ئاكامدا هەلی دامەزراندنی دەرچووانی زانكۆ و پەیمانگەكان تا ئاستێكی زۆر سستی بە خۆوە بینی، بەڵام بەم هۆیەوە خانمان لە مەیدانی كار و دەستەبەری ئابووریی خۆیان پاشەكشەیان نەكرد و، بوونی خۆیان لە مەیدانەكەدا سەلماند. ناسكە ڕەسووڵ یەكێكە لەو خانمە دەستڕەنگینانە و لە گفتوگۆیەكیدا لەگەڵ گۆڤاری گوڵان باسی چۆنیەتی تێكەڵبوونی بە بازاڕی كار دەكات.

 

گوڵان: كۆمەڵایەتی

 

ناسكە ڕەسووڵ خانمێكی دەستڕەنگینی تەمەن 32 ساڵەی دانیشتووی قەڵادزێیە و وەك خۆی باسی دەكات، دەرچووی بەشی پەرستارییە و ماوەی دوو ساڵە لە ماڵەكەی خۆیدا كاری چنین دەكات. سەبارەت بە ژیانی خۆیشی بەمجۆرە هاتە ئاخافتن: «هاوسەرگیریم كردووە و دوو منداڵی جوانم هەیە. خوێندنم لە بەشی پەرستاری تەواو كردووە، بەڵام لە بەر ئەوەی زۆر هەوڵم دا و دانەمەزرام، بیرم لەوە كردەوە كە كارێك بكەم و كاتە بەتاڵەكانمی پێ پڕ بكەمەوە، سوپاس بۆ خوا، ئێستا كاری چنین و كاری دەستی دەكەم و پەیجم هەیە بە ناوی ((چنینی ناسك))، خۆیشم هەر لە تەمەنی منداڵیمەوە حەزم لە كاری زەنگیانە بوو، بازنە و نووستیلەم بۆ خوم دروست دەكرد، واتە هەر لە منداڵییەوە خولیای كاری دەستی بووم، كاركردنیش بۆ ئافرەت نەك هیچ عەیبە نییە، بەڵكو ئەو پەڕی سەربەرزییە. من باوەڕم وایە هەر كەسێك هەر بەهرەیەكی هەیە، پێویستە بە هەدەری نەدات و گەشەی پێ بدات. بەداخەوە زۆر كەس كاركردنی ئافرەت بە عەیبە دەزانن، بەڵام لە ڕاستیدا نەزانین عەیبەیە، نەك كاركردن و دەستڕەنگینی. لەم ڕۆژگارەدا كار هەم بۆ ئافرەت و هەم بۆ پیاو جێی شانازییە، لەبەر ئەوەی هەردووكیان پێكەوە باشتر بژیویی ژیانی خێزانیان دابین دەكەن. ئافرەتیش پێویستە لە هەموو بوارێكدا شتێكی لێ بزانێت، شتی نوێیش فێر بێت. من خۆم وام، هەمیشە حەز دەكەم فێری شتی زیاتر بم».

ناسكە ڕەسووڵ لە وەڵامی ئەو پرسیارەدا كە سەرەتا كاتێك ویستت كار بكەیت، كێ هاندەر و پاڵپشتت بوو؟ دەڵێت: «هەمیشە هاوسەر و كەسە نزیكەكانم هاندەرم بوون بۆ كاركردن و لێرەوە دەستخۆشییان لێ دەكەم، بە تایبەت هاوسەرەكەم كە هەمیشە پاڵپشتم بووە.

 ئەو خاتوونە دەستڕەنگینە وەك خۆی باسی كرد، شوێنی تایبەتی بۆ كاركردن نییە و هەر لە ماڵەوە بە پێی داواكاریی كڕیاران كاردەكات. لە وەڵامی ئەو پرسیارەشدا كە ئایا كاتێك بەرهەمی كارەكانت دەست دەكەوێت، وەكو ئافرەتێك تا چەند دڵخۆش دەبیت؟ گوتی: «هەر بەرهەمێك بە ئارەقەی ناوچەوانی خۆت دەستت بكەوێت و، بەری ماندووبوون و هیلاكیی خۆت بێت، زۆر بەنرخە، ئەگەر داهاتەكەی كەمیش بێت، هەر دڵخۆشت دەكات».

 سەبارەت بە چۆنیەتی بڕیاردانیشی بۆ كاركردن گوتی: «هەر كەسێك پێویستە لەسەر پێی خۆی بوەستێ، من لە كەرتی گشتی و حكوومی دانەمەزرام، ناشكرێت هەر چاوەڕێی ئەوە بم كەی دادەمەزرێم، بۆیە هەوڵم دا خۆم ببمە خاوەن كار و كارێكم هەبێت، كارەكەشم لە ماڵەوە بێت زۆر باشترە، لە بەر ئەوەی بە كاری ناوماڵ و پەروەردەی منداڵیش دەگەم، هەروەها

كاركردنیش بۆ باری دەروونیی خۆیشم زۆر بەسوودە، زۆر باشە كارێكت هەبێت و هەم خزمەتی پێ بكەیت و هەم داهاتی هەبێت و هەم سەرقاڵت بكات.

لە وەڵامی ئەو پرسیارەشدا كە ئایا كاركردنت كاریگەریی نەرێنی لەسەر دایكایەتی و هاوسەرداری نەبووە؟ ناسكە ڕەسووڵ گوتی: «نەخێر، بە حوكمی ئەوەی لە ماڵەوە كار دەكەم، هیچ كاریگەرییەكی نەرێنی نەبووە،  كاری ماڵ تەواو دەكەم، دواتر دەست بە كاری چنین دەكەم. هەر ئەوەش كە شوێنێكی تایبەتم نییە و لە ماڵەوە كار دەكەم، بە هەردووكی ڕادەگەم».

ناسكە ڕەسووڵ لە دوا وتەیدا پەیامێكی بۆ ئافرەتان هەیە و دەڵێت: «پەیامم بۆ ئافرەتان ئەوەیە بوێر بن و هەر بەهرەیەكیان هەیە، بە هەدەری نەدەن. بە تایبەتی كە هەندێك كار هەیە، تایبەتە بە ئافرەت و ئافرەت زیاتر لە ئافرەت حەز و ئارەزووەكانی دەگات».

 

Top