نووسینەكەتم بینی، راستیت دەوێ ئەو نووسینەت، نووسینی سیاسیەكی هۆشیار و خەمخۆر و دیموكراتخواز نیە بەڵكو ڕێك ناختی پێشانداوە كە وەك دوژمنێك دژی شۆڕش و پێشمەرگە و دەستكەوتەكانی گەلی كوردستان و دژی پارتی.

نووسینەكەت رقاوی و نامەوزون و ناشێیانەیە. سەیرە كەسێك لافی سیاسەت لێ بدات و پارلەمانتار بووبێت ئەوەندە بێئاگا و سەتحی بێ لەمەڕ معادەلاتی سیاسیی عێراق و مێژووی سیاسی و جووڵانەوەی رزگاریخوازی كورد. یوسف محەمەد لافی دیموكراتیەت و عەدالەت لێ مەدە، چاك دەزانین لە رووی فكریەوە سەرت لە كام ئاخوڕی ئایدیۆلۆژیی ناوە كە جگە لە ماڵوێرانی و دواكەوتوویی و توندوتیژی و تیرۆر هیچی بۆ گەلانی ناوچەكە بەدینەهێناوە. هەر بۆیەش لەوكاتەی كوردستان لەژێر پەلاماری داعش بوو، تۆ و هاوبیرەكانت بە مەسافەیەكی دوور لە گەلی كوردستان وەستابوون و تەماشاکەری دڕندەیی داعش بوون، بە قسەشبێ بە دەمتاندانەهات جارێك پشتی پێشمەرگە بگرن و سەركۆنەی دڕندەیی داعش بكەن. ئەگەر گەلی كورد بە گوێی ئێوەی نامۆ و ناكامڵی كردبا دەبوایە هەر زوو تەسلیمی داعش ببوایە.

نووسینەكەت دوژمنكارانەیە بەرانبەر مێژوو و شەهیدانی ڕێگای ڕزگاریی كوردستان، وەك دوژمن نووسیوتە، تۆ بڕوات بە دۆزی ڕەوای گەلی كوردستان نیە، پتر بڕوات بە پیلان و مەرام و ئامانجەكانی دوژمن و داگیركاران هەیە. ئاخر دوژمنیش حەزی لەوە نەبووە و نیە كورد خاوەن ئیرادە بێ و مقاوەمە بكات و چەكی هەبێت. هەر بۆیەشە كە لە بەغدا بووی تۆ و تاقمە دۆڕاوەكەی لەگەڵت لە عەرەبە شۆڤێنییەكان زۆر زیاتر دژی مافەكانی گەلی كوردستان وەستابوون. لەوێ لەبری بەرگریكردن لە كوردستان، ڕێپێشاندەری نەیاران بوون بۆ زەربەلێدان لە كەرامەت و پێگە و دەستكەوتەكانی هەرێم. لە مێژووی كورددا جاش و خۆبەبچووكزان لە هەموو تەرز و جۆرەكان زۆر هەبوون كە سەرئەنجامیان سەرشۆڕی بوو، بۆیە چاك بزانە جاشایەتی لە نەوعی تۆش زۆر لەوەی ئێستا هەی ڕووڕەشتر و دۆڕاوتر دەکات.

ئەمە لە بەختی خەراپی كوردە، گومناوێکی هەڵتۆقیوی بێ ڕیشەی بێ ئەزموون كە نازانێ ئازار و مێژووی كورد چیە و بڕواشی بە دۆزی گەلەكەی نیە، دەرفەتی پێ بدرێت و پێ بنێتە ناو سیاسەت و بەشێك لە قەدەری گەلی بكەوێتە دەست. دەشزانم ڕاسپاردنی تۆ بۆ كایەی سیاسی لە لایەن كارەكتەرە هەرە سەرەكییەكەی براكوژی و، ڕۆڵپێدانت تەنیا بۆ بێنرخكردن و بچووككردنەوەی پۆستی سەرۆك پارلەمان و بێ نرخكردنی بەرهەمی خەبات و قوربانیدانی گەلی كوردستان بوو. ڕاستە بۆ ماوەیەكی كاتی ئەو هەدەفەتان پێكا بەڵام چونكە بچووك و ناپێگەیشتوو و نامۆ بووی دواجار خۆت و حزبەكەشت رەنجەڕۆ كرد و مایەپووچ لێی دەرچوون.

لاپەڕە و قۆناغ و هۆكار و ئەكتەرە دەست سوورەكانی شەڕی ناوخۆ بۆ خەڵكی كوردستان ئاشكران و، هەوڵە بێشومارەكانی سەرۆك بارزانیش بۆ ڕێگەگرتن لە شەڕ و براكوژی دیارن. هەڵسەنگاندنی خەڵكی بێ قەزییە و ڕقئەستوور هیچ بایەخێكی نیە و لە راستیدا تۆی نامۆ لە پەراوێزی پەراوێزەكاندای و، لەو مەقامەدا نیت هەڵسەنگاندن بۆ مێژوو بكەی و، تەوسیە و ئامۆژگاریت هەبێ.