پارتی و کۆنگرێ 14 ــێ
بێوارحسێن زێباری
ل گوه‌رى كارو به‌رنامێ پارتى دیمۆكراتى كوردستان ل به‌ره كۆنگرا خوه یا (14) ل دوماهیا ئه‌ڤ ساله ل باژێرێ دهۆكێ ئه‌نجام بده‌ت مه‌به‌ست ل به‌ستنا كۆنگرێ پێداچوونه‌ڤه و هه‌لسه‌نگاندنه ل كار و به‌رنامه و چالاكیێن وێ پارتى دا كۆ ل ده‌مێ دناڤبه‌را دوو كۆنگرا و دارشتنا كارنامه و بارنامێ وێ یێ سیاسى و دیاركرنا ستراتیژیه‌تا وێ یا ناڤخۆیى و ده‌رڤه بۆ قۆناغێن داهاتى و دارشتنا په‌یره‌و و پرۆگرامه‌كێ نوو كۆ دگه‌ل سه‌رده‌مێ بگۆنجیت و هه‌لبژارتنا ده‌سته‌یه‌كا نوو بۆ سه‌ركردایه‌تیێ و باشتركرنا ئۆرگانێن وێ .
پشتى هه‌لبژارتنا ئه‌ندامێن كۆنگره‌یێ پێدڤیه ئه‌و ئه‌ندام بزانن كو ئه‌و حزبه‌كێ دا كاركه‌ن كۆ ئه‌و بخۆ ناڤ و ده‌نگیا خوه هه‌یه و دبنه نوێنه‌رێن وى پارتى ژ 76 سال ژ خه‌بات و به‌رخودانێ دا دایه ل پێناڤ دۆزا ره‌وا گه‌لێ خوه دا و بۆ ڤێ ژى ده‌ریایه‌كا خوینێ دایه له‌وما كو ئه‌ڤ په‌یكه‌رێ نوكه یێ دكه‌ڤنه و د گه‌ل ڤى سه‌رده‌مى و خه‌باتا ئاشكرا و شارستانى ناگونجیت كو دڤى په‌یره‌و و پرۆگرامى ب ئۆرگانێن كێم یێن حزبى زۆرترین خزمه‌تا جه‌ماوه‌ر و رێكخستێ بهێته‌كرن.
ئه‌ز نابینم هه‌لبژارتنا ئه‌ندامێن كۆنگرێ دڤێ ره‌وشێ دا ببیته ئه‌گه‌رێ ده‌ست نیشانكرنا كه‌سێن هه‌ژى بۆ ئه‌ندامه‌تیا كۆنگرێ . پێتڤى یه سه‌ركردایه‌تیا پارتى و لیژنا ئاماده‌كاریا كۆنگرێ ژى لسه‌ر بنه‌مایێ سۆز و ڤیانێ و پێگه‌هێ جڤاكى و پله‌داریێ نه‌ك ل گوره‌ى عه‌شتییرى و خزم و كه‌سێن دیار بن ئه‌ڤه نابیته ئه‌گه‌رێ هندێ كۆ جاره‌ك دى نوێبوونه‌ك پێڤه دیار بیت هه‌یكه‌لى حزبى و ئه‌گه‌ر كه‌سێن ئه‌كادیمى و سه‌ربور یێن ناڤا رێزا پارتى ب پێڤه‌ر و به‌رنامه بهێن هه‌لبژاردن ل وى ده‌میدا ئه‌ڤ ئه‌ندام و كه‌سه دبنه كادرێن سه‌ركه‌فتى و كونگره‌كا ساخله‌م و دروست هێته كرن و چونكى كادرێن بڤى ره‌نگى گرنگى و به‌رپرسیاریا كۆنگرێ دزانن ، دێ شێن گه‌نگه‌شێن باش و ئه‌رێنى لسه‌ر په‌یرو و پرۆگرامى و ستراتیژیه‌تیا وێ كه‌ن و لده‌مێ هه‌لبژارتنا ئه‌ندامێن سه‌ركردایه‌تیێ ناكه‌ڤنه بن كاریگه‌ریا كه‌سایه‌تیا ، ژبلى ڤێ چه‌ندێ زێده‌تر دناڤ جه‌ماوه‌رى و ئۆرگانێن خوارێ یێن پارتى دانه و خالێن بهێز و لاواز دزانن و وێره‌كیا ده‌ست نیشانكرنا وان و ئاراسته‌كرنا ره‌خنا ئاڤاكه‌ر ژى هه‌یه و بۆ هندى بكارن به‌ره‌ڤانى و ده‌سكه‌فتینَن حزب و جه‌ماوه‌ر و خه‌لكى كوردستانێ بپارێزن و ببن كه‌سێن جهێن رێزێ و روول هه‌بیت دناڤا خه‌لكى دا و چوونا وان بۆ ناڤا كونگرێ ژى بۆ سه‌ركه‌فتن و دارشتنا پلانه‌كا باشتر بۆ پارتى نه‌ك وه‌كى گه‌شت و كه‌رنه‌ڤاله‌كا وێنه‌گرتنێ .
ئه‌ز باوه‌رم سه‌ركردایه‌تیا پارتى ب رێنمایێن سه‌رۆك بارزانى به‌رنامه‌كێ مۆكۆم و ئه‌رێنى دارشتى یه كۆ ئه‌ڤ كۆنگره ژى مینا هه‌مى كۆنگرێن به‌رێ یێ سه‌ركه‌فتى بیت و ل قۆناغێن داهاتى ده‌ستكه‌فتێن مه‌زنتر بده‌ست بینیت ، چونكى پارتى ئه‌زمۆنه‌كا درێژ ل خه‌باتا سیاسى و جه‌ماوه‌رى و له‌شكرى و كارگێرى هه‌یه و هژماره‌كا زۆرا كادر و شاره‌زایێن سیاسى و ستراتیژى هه‌نه بۆ دارشتنا به‌رنامه‌كێ رێكخستى بۆ سه‌ركه‌فتنا كۆنگرێ .
ل دوماهیێ دبێژین ب هیڤى نه كۆنگره‌یه‌كا سه‌ركه‌فتى و جۆرى بیت و ببیته ئه‌گه‌رێ زێده‌تر پێشڤه‌چوون و سه‌ركه‌فتنا پارتى ژ هه‌مى لایه‌كى ڤه.
