هونەری دوو نەتەوە

پیشانگای هەمەچەشنی كۆمەڵێك هونەری دیدەیی، دەرفەتێكی فراوان دەخاتە بەردەم میوانی پیشانگاكە تا بە گوتاری ستاتیكا دیدەییانەی كۆمەڵێك هونەرمەند، لە چەندین ڕشتەی هونەردا ئاشنا بێت. نمایشەكەش دەرفەتێكی گەورەتر دەبێت بۆ بینەران، كاتێك بەرهەمەكان لە دەرەوەی باشووری كوردستانەوە هاتبن، بەوەی دەیان هونەرمەندی نەتەوەكانی ئێران بەرهەمی خۆیان پێشكەش دەكەن، ئەمە بۆ ناوەندی هونەر بۆ هونەردۆستان، دەرفەتێكی زێڕینە.

ئەوەندەی نمایشەكە پیشانی دا، بینەری بەرهەمەكان هەست بە ڕەهەندێكی جیاواز لە دیدگا و هەست و تەكنیك و بابەت و تانوپۆی بەرهەم دەكات. ژینگە و جوگرافیای جیاواز، هونەری جیاواز و تایبەتمەند دەئافرێنن. لە نێو جوگرافیای بەرینی ئێراندا، هونەری شێوەكارانی كوردی ئەو وڵاتە، خەسڵەتێكی تایبەت دەخاتە ڕوو، بە تایبەتی لە ڕووی دیدگا و فیگەر و بابەت و كەشی گشتیی بەرهەمەوە. خەیاڵ و ئەندێشە بە شێوەیەكی فراوان لەو پیشانگایەدا ئامادە بوو، هونەری كورد و فارس وەك دوو نەتەوەی دراوسێ، كە هەردوو نەتەوەكە بە ڕایەڵێكی ئەستوور، پاشخانێكی هاوبەشی مێژوو كۆیان دەكاتەوە، مەزندە وایە لە یەكدییەوە نزیك بن. ژینگەی هەردوو لاش وەك دوو نەتەوەی ڕۆژهەڵات، تا ئەندازەیەكی زۆر لە یەكەوە نزیكە، بەڵام هەر یەكەیان خاوەن پاشخانی كولتوور و ئەندێشە و میراتی تایبەت و شارستانیی خۆیانن، ئەمەش لە هونەردا بە چڕی ڕەنگ دەداتەوە. لەم پیشانگاكەشدا ئەو ڕاستی بە چڕی هەستی پێ دەكرا.

بەدەم خوێندنەوەی كۆی پیشانگاكەوە، جێی خۆیەتی بپرسین، ئاخۆ فەلسەفەی كۆ كردنەوەی هەردوو هونەری (خۆشنووسی و فۆتۆگراف) لەگەڵ هەردوو هونەری نیگار و پەیكەر، چ ئامانجێكی لە پشت بوو؟ بەڵێ هەر چواریان هونەرن و دەچنە نێو بازنەی هونەرەیلی شێوەكاری، بەڵام بە ئەندازەیەكی زۆر خۆشنووس و فۆتۆگراف دوو شەقڵی تایبەتن، هی ئەوەن پیشانگای تایبەت بە خۆیان بۆ بكرێتەوە، هەڵبەت پەیكەر و نیگار دوو هونەری فرە لە یەكدییەوە نزیكن، نەریتیش وایە ئەم جووتە هونەرە لە یەك نمایشدا كۆ بكرێنەوە. ئەم سەرنجەی ئێمە لە بەهای پیشانگاكە كەم ناكاتەوە، بەڵام خواستی ئەوەی لە نمایشدا پۆلێنكاری ڕەچاو بكرێت، نەریتێكە لەگەڵ فەلسەفەی بینین و دیدگای ستاتیكانەدا كۆكە.

لە ڕووی كەرەستە و تەكنیكەوە، بەكار هێنانی مافوور و داوی ڕەنگینی تەون و چنین وەك تانوپۆ بۆ تابلۆ، مایەی سەرنجە و ئەو ڕاستییەش دووبارە دەكاتەوە كە لە وتارێكی پێشوومان لە (گوڵان)دا، باسی ئەوەمان كرد، مافوور و تەكنیكی چنینی بۆ خۆی هونەرێكی سەربەخۆیە و شایستە بەوەیە لە نێو ڕشتەی هونەرەیلی جواندا جێی خۆی بگرێت. سیمای ڕێچكەی شێوەكاریی سنە وەك ڕێچكەیەكی كوردستانیانەی هونەری شێوەكاری، لەم پیشانگایەدا زۆر بە چڕی ئامادە بوو، ئەم ڕێچكەیە تا دێت بە هەوڵی هونەرمەندانی ئەو شارە، چڕتر ڕەنگڕێژ دەبێت و ستاتیكای كولتوور و میراتی كورد، كە وەك شافیگرە دەڕوانێتە مرۆڤ، كرۆك و گرێژەنەی هونەرەكەیە.