ئیدی ئەمە هەولێرە هەولێر. جێی ئومێد و ڕووگەی هەمووان
هەر جارێك و لە هەر بابەتێكدا قسە بەلای هەولێرەوە بكرێ، یان شتێك سەبارەت بە هەولێر باس بكرێ، یان هەڵوێستێك لە هەولێرەوە بگێڕدرێتەوە، جیا لە هەر شار و ناوچەیەك باس هەڵدەگرێ، چونكە هەولێر لەبەر ئەوە نا كە پایتەختی هەرێمی كوردستانە، یان كە پێشكەوتووترین و ڕازاوەترین شاری هەرێمی كوردستان و پارچەكانی دیكەی كوردستانە، لەبەر ئەوەش نا كە ئارامترین شار و دڵگیرترین شارە، نا بەڵكو لەبەر دڵفراوانی و دڵگەورەیی و بەخشندەیی و خۆ بە دایك و باوك زانینی هەموو كوردان بووە، كە هەولێر ناونیشان و شكۆی بەرزە و بەری ئاسمانی گرتووە.
فەرهەنگ غەفوور
باس لە كام خەسڵەتی هەولێر بكەین، جوامێری و مێرخاسیی خەڵكە ڕەسەنەكەی هەر لە بەرەبەیانی زووی مێژووەوە، كە پشتقایم بە قەڵاكەی، هەمیشە بەرگریكارێكی سەخت و قایم بووە و دوژمنانی بەزیون و ئەو هەر لە جێی خۆی چەقیوە و وێوەتر لەوەش، بووە بە پەناگەی هەر كوردێكی سەرهەڵگرتوو، لە هەر قوژبنێكی كوردستانی داگیركراو، یان هەر مرۆڤێكی غەیرەكوردی لێقەوماویش، كە وەك ڕۆڵەی خۆی باوەشی بۆ كردوونەتەوە و گرتوونیەتە خۆی و لە نمەكی حەڵاڵی خۆی پێی داون و ناز و منەتیشی بەسەرەوە نەكردوون، بەڵكو نازی غەریبان و لێقەوماوانی چواركەناری هەڵگرتووە و مینا ڕۆڵە ڕەسەنەكانی خۆی و بگرە زیاتریش خاتری گرتوون و ڕێزی لێ ناون و پاراستوونی.
باس لە دڵفراوانی و دڵگەورەیی و بەخشندەیی خەڵكەكەیشی بكەی، كە بۆ خەڵكی لێقەوماوی كورد لە هەر شار و پارچەیەكی نیشتمان، تەنانەت بۆ لێقەوماوان و دەربەدەر و سەرهەڵگرتووانی غەیرە كوردیش، وەك كەسوكاری خۆیان حسێبی كردوون و نانێكیان هەبووە لەگەڵیاندا بەشیان كردووە.
باسی پێكەوەژیانی درێژایی تەمەنی ئەو شارە بكەی، دەبینی كورد و هەرچی خەڵقی خودایە لە غەیرە كورد، موسڵمان و هەرچی سەر بە ئایینزای جیاجیا و مەزهەبی جیاجیا هەیە، گرتوونیەتە خۆی و دەستی دەسەڵاتداری و پڕ بەزەیی خۆی بەسەری هەموواندا وەك یەك و وەك برا داهێناوە و) ڕێگەی داوە هەركەسە و هەر نەتەوە و هەر ئایینە و هەر ڕێبازەی خۆی بێ و گوزارشت لە خۆی بكات و، خۆی نەسەپاندووە و ئەوانی بە بندەستەی خۆی دانەناوە.
باس لە خەبات و تێكۆشان و قوربانیدان بكەی، باس خولیا و حەز بۆ ئاوەدانی و پەروەردە و زانست و هونەر بكەی، باس لە نەرمونیانی و هێمنی و بێ كێشەیی خەڵكەكەی و كەسابەت و پیشەی كاسبكار و بازرگانانی بكەی، باس لە گیانی بەدەنگەوەچوون و دەستبارگرتن و هاوكارییكردن بكەی، باسی هەر چی تۆ بە خەیاڵتدا دێ بیكە، دەبینی هەولێر نموونەیەكی باڵایە لە بەرزی و پاكی و جوانی و مرۆدۆستی و ژیاندۆستی و كوردپەروەری، هەندێ جار ئێمە لە بواری خۆماندا كە هونەرە، لەلایەن ئەم و ئەوەوە ڕووبەڕووی ئەو پرسیارە دەكرێینەوە، ئەرێ چییە ئەوەندە گرنگی بە هونەرمەندانی شارەكانی دیكە و پارچەكانی دیكەی كوردستان دەدەن و لەسەر حسێبی هونەرمەندانی هەولێر نازیان دەكێشن؟
ئەو پرسیارە هەر كەسێك بیكات، بەر لە هەر كەسێك غەدر لە هەولێر دەكات، چونكە یەكەم، هەولێر هەرچیی پێی كرابێت بۆ هونەرمەندانی ڕەسەن و هاوشاریی خۆی، بەپێی توانا و دەرفەت كردوویەتی و درێغیی نەكردووە و بەردەوامیشە لە خزمەتكردنیان. دووەم، دەبێ ئەوانە بزانن هەولێر هەر موڵكی هەولێرییەكان نییە، تا تەنیا ئاوڕ لە هونەرمەندانی خۆی بداتەوە، با لەبیریان نەچێ، هەولێر پایتەخت و ڕووگە و ئومێدی ملیۆنان كوردی هەموو پارچە و شارەكانی كوردستانە، شار و ماڵ و جێی ئومێدی هەزاران خەڵكی دیكەی غەیرە كوردیشە، چ ئەوانەی هاوشاریی ڕەسەنن و چ ئەوانەش خۆیان دە ئامێزی هاوێشتووە. سێیەم ئەمە یەكێكە لە تایبەتمەندی و شانازییە گەورەكانی هەولێر، كە هەموو كەس و شوێنێك بەنسیبیان نەبووە.
لەو ڕوانگەیەشەوەیە، كە هەولێر خۆی بە مێژووی كورد زانیوە، بەڵكوو هەر خۆی مێژووی كورد و كوردستان بووە، بۆیە ئەو تەسكبیرییەی شارچێتی لە ناویدا جێی نەبووەتەوە، هەربۆیەشە ئێمە لە وەزارەتی ڕۆشنبیری و لاوان و بەتایبەت لە بەڕێوەبەرایەتیی گشتیی ڕۆشنبیری و هونەری هەولێر، بە یەك چاو و بە یەك ئاست و ئاراستە خزمەتی تەواوی هونەرمەندانی كوردستان، بە كورد و غەیرە كوردیشەوە دەكەین، بەوانەی كە توركمان و مەسیحی و هەر پێكهاتەیەك بن، هەموویان بەشێكن لەو گوڵە بۆندارانەی گوڵدانی هەولێریان ڕازاوە كردووە، لەسەر ئەو بنەمایە بووە، كە ئێمە ڕێز لە هەمووان دەگرین و مەراسیمی شایستەی ڕێزلێنان بۆ هەموو هونەرمەندانی كوردستان بە بێ جیاوازی بەڕێوە دەبەین، گرنگ ئەوەیە كە هونەرمەندەكە ڕەسەن و هونەرەكەی ڕەسەن و لە خزمەت هونەر و كلتوور و فەرهەنگی كورد و كوردستاندا بێت، دەنا هیچ پێوەر و ئیعتبارێكی دیكە لەبەرچاو نەگیراوە و بە یەك چاو تەماشای هەمووان كراوە و دەكەین و، سەدان نموونەش لەو چەند ساڵەی ڕابردوو گەواهی و شایەدن بۆ سەلماندنی ڕاستیی سەرەوە.
جا شارێك، كە ئەم خەسڵەت و تایبەمەندییانەی هەبێ، چۆن جێی شانازی و شكۆمەندیی هەمووان نییە، بە هەولێرییەكان و غەیەرە هەولێرییەكانیشەوە؟
ئەم هەستی شانازیكردنەش بە هەولێر لە دەمارگیریی شارچێتی نییە، شكور بۆ خودا ئەوە هەولێرە هەرگیز نەیزانیوە شارچێتی چییە و قەتیش كەسی دیكەی غەیرە هەولێری ڕەت نەكردووەتەوە. كوردیش لە مێژە گوتوویەتی ئەگەر مانگ دیار بێ پێویست بە ئەنگوست ناكات. هەولێر بە هەیبەت و شكۆ و خزمەت و دڵفراوانییەكەی خۆی دیارە و، ئێمە هەرچیی سەبارەت بڵێن تەنیا وەك پەنجە ڕاداشتنە بۆ مانگ، كەچی مانگ زۆر بە گەورەیی و دروەشاوەیی لە تاریكیدا دیار و بەرچاوە و تریفەی لێ دەڕژێ.
ئیدی ئەمەیە هەولێر، كە لەوەتەی هەبووە و هەیە هەر ئەمەیە و هەر وەهاش دەمێنێتەوە و ڕۆژ بە ڕۆژیش شكۆمەندتر دەبێت.
