لە خولى یەكەمى هەڵبژاردنەكانى میسردا حزبە ئیسلامییەكان لە ریزى پێشەوەن
عەبدولموعیز ئیبراهیم سەرۆكى لێژنەكە ئێوارەى دوێنێ لە كۆنگرەیەكى رۆژنامەوانیدا لە بارەگاى لێژنەكە شارى قاهیر ئەنجامى هەڵبژاردنەكەى راگەیاند.
بەپێى ئەنجامەكان، حزبى ئازادى و داد (ئیخوان موسلیمین) زۆرترین دەنگى بەدەست هێناوە كە 3 ملیۆن و 565 هەزار و 92 دەنگە، دواى ئەو حزبى نوورى سەلەفى دێ كە 2 ملیۆن و 31 هەزار و 713 دەنگى بەدەست هێنا، بارستەى میسریش بە پلەى سێیەم هات و ملیۆنێك و 299 هەزار و 819 دەنگى هێنا.
پارێزگاران 767 هەزار و 43 دەنگ، شۆڕشى بەردەوام 335 هەزار و 185 دەنگ، حزبى چاكسازى و گەشەپێدان 185 هەزار و 25 دەنگ، ، بێلایەنە نوێیەكان 107 هەزار و 92 دەنگ، شۆڕشى میسرى 36 هەزار و 995 دەنگ، ، میسرى نوێ 27 هەزار و 6 دەنگ، میسرى شۆڕش 26 هەزار و 804 دەنگى بەدەست هێنا.
ئیبراهیم گوتى لە خولى یەكەمدا ژمارەى دەنگدەران 17 ملیۆن و 522 هەزار و 583 كەس بوو، لەو ژمارەیە 10 ملیۆن و5 هەزار دەنگیان دا، ژمارەى دەنگە پووچەكان گەیشتە 679 هەزار و 221 دەنگ، رێژەى دەنگدانیش 60% بوو.
هەڵبژاردنى خولى یەكەم لە 9 پارێزگەى میسریدا بەڕێوە چوو و بڕیارە خولى دووەم لە 14ى ئەم مانگەدا لە 9 پارێزگەى ترى میسردا بەڕێوە دەچێ، خولى سێیەمیش لە دوا هەفتەى ئەم مانگەدا ئەنجام دەدرێ، بەوەیش ئەنجوومەنى گەلى میسر پڕ دەبێتەوە.
-ئاكاميوز