چالاكانی بواری مافی ئافرەت جەخت لەوە دەكەنەوە، رێگرییەكانی دایك و باوكان لە چالاكی و خۆپێگەیاندنی كچان، هەمیشە داهاتووی ئەو كچانە بەرەو ئاسۆیەكی نادیار دەبات. پێشنیاریش دەكەن، باوان لە بری رێگرییەكانیان لە ئەكتیڤبوونی كچیان، بەرچاوڕوونی بە كیژی خۆیان بدەن و، هەوڵ بدەن پشتیوانییان لێ بكەن، بۆ ئەوەی بتوانن داهاتوویەكی درەوشاوە و گەش بۆ خۆیان درۆست بكەن و خاوەن داهاتی خۆیان بن. یەكێك لەو ئافرەتانەی كە بەردەوام لە رەوتی پێشكەوتنیدا لەلایەن باوانیەوە بەربەست و كۆسپی گەورەی بۆ دروست كراوە، باسی چۆنیەتی زاڵبوون بەسەر كێشەكانی ژیانی بۆ گوڵان دەكات.

گوڵان: كۆمەڵایەتی

هاوژین عەلی ئافرەتێكی تەمەن 37 ساڵان و باڵا مامناوەندە و وەك خۆی باسی دەكات، لەگەڵ ئەوەیدا كە بەردەوام لەلایەن باوانیەوە بەربەست و كۆسپی گەورەی بۆ دروست كراوە و رێگریی زۆریان لە خوێندن و دەرچوونی لەماڵ كراوە، توانیویەتی پەیمانگەی پزیشكی بكات و، چاوەڕوانی دامەزرانی حكوومیشی نەكردووە و، لە ئێستادا نۆرینگەی پزیشكیی لە ناو ماڵەكەی خۆیدا بە وەرگرتنی مۆڵەتی فەرمی كردووەتەوە. ئەو خاتوونە بەمجۆرە باسی بەسەرهاتی ژیانی خۆی دەكات: «كاتێك كچ بووم، بابم و براكانم رێگەیان نەدەدام بچمە درەوە، تەنانەت بە زۆر و پێداگریی داپیرەم باوكم رازی بوو بڕۆمە قوتابخانە و رۆژانەش تەنیا لە ماڵەوە بۆ قوتابخانە و لە قوتابخانەوە بۆ ماڵەوە، كە دەشچوونە میوانی ئەمنیان نەدەبرد، كە میوانیشمان دەهات، بۆم نەبوو بیانبینم، وەكو هەر كچێك نەمدەتوانی جلوبەرگ بە دڵی خۆم لەبەر بكەم، داوای هەر جلێكم بكردبا، دەیانگوت وەكی مێردت كرد، بە دڵی خۆت جلكەكانت بپۆشە، ئەگەر داوای سەردان و سەیرانم بكردبا، دەیانگوت كەی هاوسەرگیریت كرد، لەگەڵ ئەو بە كەیفی خۆت بگەڕێ و بسووڕێ، تەنانەت كاتێك خوێندنم تەواو كرد، رێگەیان نەدام فۆڕمی دامەزراندن پڕ بكەمەوە و پێیان گوتم كچی ئێمە نابی بچێتە فەرمانگە، كەی مێردت كرد بۆ خۆت دەوام بكەو ئیش بكە، ئیدی ئەمنیش وردە وردە لەوە راهاتم كە خەون و خولیاكانم بەو كەسەی لە داهاتوودا دەبێتە هاوسەرم ببەستمەوە، هەر بە خەیاڵ خۆشییەكانی ژیانمم لەگەڵ ئەودا دابەش دەكرد، وەهایان لێكردبووم، وابیر بكەمەوە كەوا هاوسەر واتا فانۆسی سیحراوی عەلائەدین و هەموو خەون و خۆزگەكانم جێبەجێ دەكات، وام لێهات هەر كەسێك بێتە داوام، رازی بم و لەو بەندیخانەیەی ماڵی بابم رزگار بم، دواجار خزمی دراوسێیەكمان بە شێوەی عەشایەری هاتە داوام و دوای ئەوەی كەسوكارم رازی بوون، ئەمنیش بێ یەك و دوو رازی بووم، هەر زوو لە ماوەی دەزگیرانی ئەو كوڕەم زۆر خۆشویست و ئومێدێكی زۆرم بە ژیانی هاوبەشیمان هەبوو، بەڵام ئەو هەر لە هەفتەی یەكەم دەستی لەسەرم بڵند كرد، پیاوێكی زمان شڕ بوو، بە راست و چەپ ئیهانەی دەكردم و، جنێوی بە كەسوكاریشم دەدا، ئیهانەكانی ئازاری دەروونیی زۆریان دەدام و كاریگەریی زۆری لە سەرم هەبوو، هۆكارەكەشی ئەوە بوو بە دەستی ئەو كەسە بوو، كە لە گیانی خۆمم خۆشتر دەویست، كەچی ئەو سووكایەتی پێ دەكردم.»
هاوژین عەلی، ئەوەش دەخاتە ڕوو، كە ستەمكارییەكانی هاوسەرەكەی نەشاردووتەوە و لە لای خێزانەكەی ئاشكرای كردووە، هەر لەو بارەیەوە دەڵێت: «لەبیرمە جارێكیان بۆ دایكمم باس كرد، كە ئەو پیاوە چەندە خراپە و تەنانەت بیرم لەوە كردۆتەوە بۆ بابم باسی بكەم، دایكم نەیهێشت قسەكانم تەواو بكەم، گوتی: ئەگەر ئیشێكی وا بكەیت، بابت كەپووی هەردووكمان دەبڕێت، هاوسەرەكەشم كە دەیبینی چەندە داماو و بێ پشت و پەنام زیاتر ئیستیغلالی دەكردم. ساڵان هات و تێپەڕی بەو قەدەرەم رازی بووم و هەمیشە بە خۆمم دەگوت كە بابی خۆم زوڵمم لێ بكات و وەكو ئینسان رەفتاری لەگەڵ نەكردووم، بۆچی نابێت بێگانەیەك زوڵمم لێ بكات؟ ئێستاش دایكی سێ منداڵی وردیلە و جوانم ئەگەرچی ژیان لە دۆزەخێكدا دەكەم، بەڵام بە بوونی منداڵەكانم دڵخۆشم و تا لە ژیاندا مابم، رێگە نادەم چارەنووسی منداڵەكانم لە چارەنووسی من بچێت.» گوتیشی: دایكی من ئافرەتێكی بێ دەسەڵات بوو، تەسلیمی یاسای پیاوسالاری ببوو، بەڵام ئەمن بۆ منداڵەكانم دەبمە قەڵغان و دونیای ئەوان بە خۆشەویستی و متمانەوە دەنەخشێنم، ئەمڕۆكەش دوای ئەو هەموو رووبەڕووبوونەوەیە لە ماڵەكەی خۆمدا نۆرینگەیەكی بچووكی پزیشكیم كردووەتەوە، بۆ ئەوەی موحتاجی دەستی كەس نەبین. هیواداریشم بە تێپەڕبوونی كات، باوكی منداڵەكانیش ویژدانی بجووڵێت و بەخۆیدا بچێتەوە.»
عوبێد خدر گۆمەشینی سەرپەرشتیاری رێنماییكارە و سەبارەت بە بەسەرهاتی ئەو خاتوونە تایبەت بۆ گوڵان دەڵێت: «بابەتی لەم جۆرە، ئێمە رۆژانە رووبەڕووی دەبینەوە، زۆر بە ئاشكرا و بە زەقی لە كۆمەڵگەدا بوونی هەیە و بەردەوامیش دووبارە و دەبارە دەبنەوە، هەزاران كچ و ژن هەن بوونەتە قوربانیی نەریت و كولتووری كۆن، لە زۆر لە خێزانەكان بەتایبەت ئەوانەی لەژێر كاریگەریی عەشیرەتگەری و دابونەریتن، رێگری لە خوێندن و تەواوكردنی قۆناغەكانی خوێندن و بەدەستهێنانی بڕوانامە دەكەن، خێزان هەیە باوك و دایك و برا و ئەندامانی دیكە، لە جیاتی پاڵپشتیی كچەكانیان بۆ خوێندن و متمانە بەخۆبوون بكەن، زیاتر هانیان دەدەن بۆ هاوسەرگیریكردن و چوونە ماڵی خۆیان، دەڵێن ژن بۆ ماڵ و مێردە، چ پێویستی بە كاركردن و خوێندنە، ئەمەش وا دەكات، كەسایەتیی كچ لە بەر چاوی كەسانی دیكە بە لاواز و بێ توانا سەیر بكرێت، كێشەكە ئەوەیە لە كۆنەوە جیاوازی لە نێوان كچ و كوڕ دەكرێت، ئەوەش كاریگەریی نەرێنی لەسەر كچ دروست دەكات، ئەگەر باوك و برا وەك دوو هاوڕێی كچ و خوشكی خۆیان بن، كەسایەتیی كچەكەیان لاواز و بێ هێز نابێت، بەداخەوە كاتێ كچی بێ پشتیوانی باوك و برا هاوسەرگیری دەكات، لای ماڵی هاوسەرەكەشی بە چاوی سووك سەیر دەكرێت.» گوتیشی: «نەبوونی رۆشنبیریی هاوسەرگیری زۆرجار بۆتە هۆی كێشە لەنێوان هاوسەران، گرنگە هاوژین و هەر یەك لە هاوسەرەكان باوەڕ و متمانەیان بە كەسایەتیی خۆیان هەبێت و گرنگی بە پەروەردەكردنی منداڵەكانیان بدەن، پێویستە ئارامگر بن، بۆ ئەوەی منداڵەكانیان نەبنە قوربانیی توندوتیژی، دایك دەبێت هەوڵی ئەوە بدات بە نەرم و نیانی و بە شێوەیەكی زیرەكانە دڵی هاوسەرەكەی بۆ خۆی ڕابكێشێت، چونكە تازە لەناو پرۆسەی هاوسەرگیرییە و پێویستی بە ددان بەخۆداگرتن و ئارامی هەیە، لەبەر ئەوەی هەر كێشە و گرفتێك لەوانەیە ببێتە هۆی لێك ترازان و هەڵوەشانەوەی خێزانەكەی و پەرتەوازەبوونی منداڵەكانی، بەتایبەتی ئەو خاتوونە پێویستە گرنگی زیاتر بە ژیان و داهاتووی منداڵەكانی بدات، ژیانێكی پڕ لە میهرەبانی و شایستە بۆ منداڵەكانی دابین بكات، ناشبێ بەهۆی كاركردن و ئیشی ماڵەوە خێزانەكەی پشتگوێ بخات، هەمیشە دایك پیرۆزی و گەورەیی خۆی هەیە و، هیچ كەسی دیكە ناتوانێ رۆڵی ئەو ببینێت.».