ئەمڕۆ چوارشەممە لیژنەی دارایی پەرلەمانی عێراق ڕوونكردنەوەیەكی لەبارەی بڕی مووچەی هەرسێ سەرۆكایەتیی پەرلەمان، سەرۆكایەتیی كۆمار و سەرۆكایەتیی ئەنجوومەنی وەزیرانی حكوومەتی فیدراڵیی عێراق بڵاو كردەوە.

لیژنەی دارایی پەرلەمانی عێراق لە ڕوونكردنەوەكەیدا ڕەتی كردووەتەوە هیچ لێدوانێكیان لەبارەی بڕی مووچەی سەرۆكی پەرلەمان، سەركۆمار و سەرۆكی حكوومەت دابێت.

لە ڕوونكردنەوەكەدا ئاماژەش بەوە دراوە كە چەند میدیایەكی عێراقی بەبێ بنەما، هەواڵێكیان بە ناوی لیژنەی دارایی پەرلەمان بڵاو كردووەتەوە و تیایدا هاتووە گوایە باسیان لە بڕی مووچەی هەرسێ سەرۆكەكانی عێراق كردووە و هەریەكەیان مانگانە بڕی ٨٠ ملیۆن دیناری عێراقی وەردەگرن.

لیژنەكە دووپاتی كردووەتەوە كە ئەم هەواڵە بێ بنەمایە و هەریەك لە سەرۆكەكانیش مانگانە زیاتر لە ٢٠ ملیۆن دیناری عێراقی وەرناگرن.





باسنيوز