ڤینستۆن چرچیل( 1874-1965) سەرۆك وەزیرێن بەریتانیایا مەزن پشتی بدۆماهیك هاتنا جەنگێ جیهانیێ دووهەم ئاخفتنەك یا هەی دبێژیتن:" ئەڤ جەنگە نۆكە بدۆماهیك هاتی دەستپێكا جەنگەك دیترە كە دژوارترە، و ئەو ژی جەنگێ نەهێلانا نیشانێن جەنگێ ب چەكانە ...". گۆتنەك مەزن و پێدڤی ب شرۆڤەكرنەك مەزنترە. چ گۆمان تێدا نینە كە گەلەك جاران ئەم دبینین كە زارۆكێن مە لڤێرێ و وێراهە یارییەكێ دكەن كە دبیتن هندەك ڕامانێن خەیالی بخۆڤە دگرن و تێدا زارۆك بزاڤێ دكەتن كە هندەك ژ ئەوان ململانێ و كێشمەكێشێن سایكۆلۆژی یێن لنك خۆ بڤی رەنگی دەرببڕیتن، و ئەو جەنگ جیاوازن ژ وی جەنگێ تیرۆریست بڕێڤە دبەن و جەنگەك راستەقینە و دژوار و خویناوی و مالوێرانكەرە و كارەساتێن ئابووری و جڤاكی و یا ژ هەمیا ژی گرنگتر سایكۆلۆژی دهێنە هژمارتن و بەرهەمێ وێ هزاران قۆربانە یێن كۆ بڕەنگێن گیانی و جڤاكی و سایكۆلۆژی دبنە قۆربانیێن وێ و ئاسەوار و دەوسێن وێ نەك تنێ د ماوەیێ جەگی دا، بەلكۆ ب دەهان سال و نڤشان پشتی هنگی ژی ناهێنە ڤەبڕین و چارەسەركرن.
جەنگێ جیهانیێ دووهەم وانەیەك مەزن بوو بۆ مرۆڤایەتیێ، و شرۆڤەكارێن جڤاكی و دەروونی ب سەدان ڤەكۆلینێن زانستی لدۆر ئەنجامێن وێ نڤێسین. دبیتن ئەگەر ژی ئەو بیتن كە بدرێژاهییا دیرۆكێ هیچ جەنگەكی هندی وێ قۆربانی نەداینە و دهێتە گۆتن هژمارا قۆربانییان نێزیكی پێنجی و پێنج مەلیۆن كەسان بوون كە تنێ هژمارا كۆشتی یێن رۆسیایێ بیست مەلیۆن بووینە.
برسیاتی، ژ ئێك جۆدابوون و لێك بەرزەبوونا كەس و كاران، پارچەپارچەبوونا خێزانێ و جڤاكێ، نەمانا بۆهایێن ئەخلاقی و جڤاكی، زێدەبوونا ڕێژەیا تاوانان ژ ئەگەرێ گرفتێن ئابووری و ژیارێ، بەلاڤبوونا دیاردەیا بازرگانیكرن ب دەرمانێن بێهۆشكەر، و دروستبوونا گرووپێن مافیایی د ڕەڤاندنا مرۆڤان و دزیكرن و تالان و كوشتنێ دا و .. هتد، هەمی بەرهەمێن وی جەنگی نە كە كەس و لایەن و گرووپێن جۆداجۆدا و ژ وان ژی تیرۆریستی دبنە سەدەمێ دروستبوونا وان.
ئەڤەیە رامانا جەنگی لنك تیرۆریستان، كە ڤی ئاگری ژ پێخەمەت هندەك بەرژەوەندی یێن تەسك و تایبەت خۆش دكەن، كە پشكەك مەزن ژ ئاگرێ وێ بەر زارۆكان دكەڤیتن و هەمیشە وان د دەریایەك ژ دوو دلی و ترس و لەرز و فۆبیا و دیتنا خەونێن ترسناك و نەخۆش، و نەمانا ئارەزوویا خوارن و ڤەخوارنێ و نڤستنێ، و هەستا زێدەیا ماندیبوونێ و بخۆڤە میزكرنا بێ دەستی، و ژانە سەرێن بەردەوام، و شەپرزەیی و بێهن تەنگی، دەمدەمەكی لێهاتنا وان ژ لایەنێ ویژدانی و هەلچۆنی، و گەلەك جاران ژی خەمۆكی و دیپرێسەكا تووند و دژوار، و هەستكرن ب تەنهایی و بێكەسیێ و بێخۆدانیێ و زۆری لێكرنێ، ژ دەستدانا ناسنامەیا سایكۆلۆژی و جڤاكی یا خۆ، و گۆشەگیری و رەشبینی، زووی توورەبوون، بەرزبوونا حەزا تۆلڤەكرنێ لنك وان، ب كەرب و كینە لێهاتنا وان، و رەفتارێن نەئاسایی ئەنجامدان، و نەمانا شیانا سەرنجدانا هویر و درێژماوە، ژبەر ئێك چۆنا سایكۆلۆژی و .. هتد، هژمارەكن ژ گەلەك نیشانێن وان ئێش و ئازارێن زارۆكێ جەنگی بدەست وانڤە دنالینیتن، و تنێ هندەك ژ وان بدیتنا رۆژانەیا بوویەر و رەفتارێن شەڕكەران د كەنالێن تەلەفزیۆنی دا هندەك چاڤ ل وان دكەن و بكریارێن هاوشێوە خۆ ڤالە دكەن، و ئەڤەیە رامانا جەنگی لنك زارۆكان كە جیاوازە ژ رامانا وێ لنك تیرۆریستێن مافیایێن جەنگ و خوینڕشتنێ، یێن كۆ هزر دكەن ب تیرۆرێ دێ ل بەهشتا بەرین جهەكی بۆ خۆ خۆش كەن.
• ئەڤبابەتە یا ل ڕۆژناما (ئەڤرۆ ) هاتیە بەلاڤكرن ژمارە (1744 ) ل ڕێكەفتی(20/10 /2015) ل. ( 13 ).