د جهێ خۆدایە كە هندەك گلەیی و گازندەیا ژ مالباتا كوردەواری بكەین. خێزانەكا تێر بچویك كە دەیباب وان ڕاددەن و بەرددەن و خۆ ل هیڤیا هندێ دهێلیتن كە هەكەر مەزن بوون، دێ قوتابخانە ئەركێ پەروەردەكرنا وان بستۆیێ خۆ ڤە گریتن. لێ ئەو خافلن ژ هندێ كە خیزان قوتابخانەیا ئێكەمە. جهێ داخێ یە ئەم هۆسا هزرا دكەین و پەروەردەكرنا زارۆكێن خۆ بتنێ ل هیڤیا قوتابخانێ ڤە دهێلین. ڤەكۆلینێن زانستی یێن كۆ ل پتر ژ بیست وەلاتێن جیهانێ هاتینە ئەنجامدان نیشان ددەن كە سەقایێ مالباتێ گرنگترین فاكتەرێ پێشكەفتنا قوتابیانە د خواندنێ دا، و هەر وەسا ژی رەزامەندی و تام و چێژ وەرگرتنا وان ژ قوتابخانەی و فێربوونێ و بگشتی دەمێ كۆ بیر و باوەر و ئاراستە بهایێن خێزانێ و قوتابخانێ لدۆر فێربوونێ و پەروەردەی وەك ئێك بن، ئەو زارۆكێ ژ وێ خێزانێ ڕابیتن دێ ژ هەمی دل و گیانڤە حەز ژ قوتابخانێ و مامۆستای و قوتابیێن دیتر و لدۆماهیكێ ژی فێربوونێ كەتن. ڤەكۆلین هەر وەسا نیشان ددەن كە ئەو دەیبابێن ب هۆشیاریڤە سەرەدەریێ دگەل زارۆكێن خۆ دكەن، زارۆكێن وان ل قوتابخانەیا دا باشترین و سەركەفتی ترین قوتابینە، و بەرۆڤاژی ئەو دەیبابێن كۆ ب دەگمەن و كێم سەرەدەریێ دگەل زارۆكێن خۆ دكەن، زارۆكێن وان خۆدانێ ئاستەكێ نزمن د فێربوونی و ژیانا قوتابخانەیی دا. ئەو قوتابی یێن كۆ دناڤ خێزانێ دا فێری ڕێزگرتن ل ژیانێ و دەمی بووین و دەمێ خوارن و ڤەخوارن، خواندن و یاری و نڤستنا وان ژ ئالیێ خێزانێ ڤە دهێتە كۆنترۆلكرن و ڕێكخستن، ژ بلی كۆ د قوتابخانێ دا پترتر پەیرەوییا یاسایێن ڕێككاریێ دكەن، هند ژی بخۆ نۆكە و ل ئاینیدەیدا ژیانا خۆ یا ئاسایی و یا قوتابیاتیێ و بگرە ل ئاستێن كاری دا ژی پترتر ڕێك دئێخن. ئەو زارۆكێن پتر ژ ئالیێ دەیبابێن خۆڤە دهێنە پشتەڤانی كرن و سۆزداریێ ژ وان دبینن و ژ ئالیێ خێزانێڤە دهێنە هاندان و پشتگەرمیێ بۆ ڤێ چەندێ دبینن، د كاروبارێن قوتابخانەیی دا پترتر ئارەزوویا بۆ ئەنجامدانا ئەركێن خۆ هەی و پترتر دێ حەز ژ قوتابخانەی كەتن، دەمێ ل خێزانێدا گفتگۆ و دیالۆگ دگەل زارۆكان كارەك ئاسایی بیتن و بڕیارێن بچویك ب رەزامەندییا زارۆكان بهێتە دان، دەلیڤەیەكە بۆ هندێ قوتابی هەر ژ نۆكەڤە فێری هەلگرتنا ئەركێ بەر پرسیارەتیێ ببن، و ئەڤ چەندە دێ پتر وان مكۆر كەتن كە پشتێ بخۆڤە گرێبدەن و باوەری بخۆ بوون لنك وان بهێزتر و خۆرتتر ببیتن.
هەتا كۆ ژ لایەنێ زمانەوانی ژی، خێزان دەلێڤە یەكێ مەزنە كە هاریكارییا گەشەیێ لایەنێن زمانەوانی و دروستی و ساخلەمی و ئاست و ڕێژەیا ووشە و ڕستەیا لنك قوتابی دكەتن. دبیتن د خێزانێن مەیێن كورداواریدا و ژ بەر نەخواندە وارییا دەیبابان گەلەك زارۆك هەتا مەزن ژی دبن گەلەك زاراڤە و ووشە و بەلكۆ ژی پیتا ژ ئێك دیتر ڤاڤێر و جۆدا ناكەتن، جیاوازییا ( چ ) و ( ج ) و یان ( ك ) و ( گ ) و.. هتد، ناكەتن و ل قوتابخانەی و پشتی هنگێ ژی هەر لسەر هندێ دچیتن.
هیڤی و ئۆمێدا دەیبابان ژی بەرەكێ دیترێ شەنگستێ ژیانا زارۆكی یە د ئاینیدەی دا. دەمێ دەیباب لدویڤ شیانا زارۆكێ خۆ، ئۆمێد و هیوایێ بۆ زارۆكێن خۆ دخوازن و لسەر بنەمایێ ئاستێ شیانێن مێنتالی و جەستەیی و هزری و رەگەزێ وان، ئارمانجا بۆ وان دەستنیشان دكەن، بێگومان دێ سەركەفتنا وان زارۆك و قوتابیان ل نۆكە و ئاییندەیدا پترتر بیتن، چونكی داخوازییا تشتەك ژ هێز و شیانا زارۆكی مەزنتر بیتن، دێ وی تووشی شكەستێ كەتن و شكەستنێن بەردەوام لنك وی دێ هێنە گشتاندن، و ئەڤ بژاندنە ل ئاینیدەی و كاودان و كارێن دیتر، دێ وی قوتابی و كەسەكێ نەوێرەك و دوورە پەرێز و نەزیرەك پەروەردە و بنیات كەتن، و دویر نینە وی بەرەڤ ئاراستە و بۆهایێن تووندوتیژیێ و سازێ و ڕێكخراوێن تیرۆریستی و لایەنێن هەلپەرەست پالبدەتن و هنگێ هێدی پەشێمانی دادێ كەسێ نادەتن.
• ئەڤبابەتە یا ل ڕۆژناما (وار ) هاتیە بەلاڤكرن ژمارە (1421 ) ل ڕێكەفتی (5/10 /2015) ل. ( 6 ).