پشتی هەر دوو جەنگێن جیهانیێ ئێكەم و دووهەم و لسالا ( 1948 ) دەمێ مرۆڤایەتی جارەك دیتر لخۆ زڤڕی و هندەك كویرتر د مرۆڤاتیێ دا هزر كری و دەرگەهەك ڤەبی كە بڕێكا راگەهاندنا جاڕنامەیا مافێ مرۆڤی ڤیا جارەك دیتر پرستیژ و شكۆیا بنپێكرییا مرۆڤی لێ بزڤڕینیتن و ب بەندێن كۆ تێدا ڕێز ل ماف و ئازادی و ژیان و كەساتییا وی گرتی ڤیا دیسانێ مۆهرەكێ ل دەست و تپلێن وان كەسان بدەتن یێن كۆ بدرێژاهییا دیرۆكێ هەمی جاران بووینە ئەگەرێ دەستپێكا جەنگێن دژوار یێن كو خوینا هزاران مرۆڤێن بێگۆنەه و سیڤیل دایەڕشتن و سەدان و هزاران گۆند و باژێڕ داینە خرابكرن. هەكەر ئەڤ پەیمانە ژ لایێ مرۆڤایەتیڤە ڕێز لێهاتبایە گرتن دبیتن گەلەك ئەو كەسێن نۆكە نە لسەر دارێ جیهانێ دناڤ مە دا بانە و بەرەك ژ بەرێن ئاڤاكرنا ئاڤاهیێ شارستانیەتێ دەیناندبایە، بەلێ جهێ داخێ یە هەر ماوەیەكێ دیرۆكی هندەك خوینمێژ ب بەهانەیێن جۆدا و لبن ئالایێن جۆراوجۆر بەر دبنە گیانێ مرۆڤایەتیێ و دبنە ئەگەرێ ژناڤچۆنا هزاران كەسان و ئاوارە و دەربدەربوونا هزارانێن دیتر.
هێشتان ئەم د چارێكا ئێكەمێ سەدەیێ بیست و ئێكێ داین كە دگەل هەڕفتنا كۆچك و تەلارێن چەندین دكتاتۆرێن دەڤەرێ، یێن كۆ ئەو ژی بدروستی نەهاتینە قۆلپاندن و تێكدان، هزر و ئایدیۆلۆژییا هشك و كەڤنەپەرێستیێ ژ هندەك مرۆڤان كەساتیەك وەسا ئیناندە گۆڕێ كە د داڤ داڤێن سایكۆلۆژیایا خۆ دا هیچ ئێك ژ پێكهاتەیێن سروشتی یێن كەساتییەكێ ئاسایی و دەرووندوروست تێدا ناهێتە دیتن و هەر ئەڤان مرۆڤێن دۆگماتی و خۆپەرێست، ژبلی هندێ كو چ ئەلترناتیڤەك بۆ پێشڤەبرنا شارستانیەتا مرۆڤایەتیێ پێ نینە هند ژی ئەو چەندا ژ دارێ ئاڤاهیێ ل دەڤەرێ مای ژی تێك دا.
تیرۆرێ، بێی هندێ هیچ ڕێز و بۆهایەك بۆ بەندێن جاڕنامەیا مافێ مرۆڤایەتیێ هەبیتن، جارەك دیتر شلقانەك مەزن ئێخستە دەڤەرێ و ئالایێ رەشێ خۆ وەك چەترەكا تاری بسەر گۆل و گیایێن دەڤەرێ دا كێشاند و بییە ئەگەرێ هندێ جارەك دیتر خلۆلاهی د ستراكتوورێ كەساتییا مرۆڤێ دەڤەرێ دا پەیدا ببیتن و ئەو هەڤسەنگییا پێدڤی بوو بۆ ساخلەمیا دەروونی یا وی هەبیتن دیسانێ شێواند و بارێ ئارامی و تەناهی و ئاسایشا دەروونی و جڤاكی و ئابووری و سیاسییا ڤی تاكی ئێخستە بەر پرسیارێ و ئاستێ باوەری بخۆ بوونێ لنك وی لاواز كر و ئەو نەچاركر هندەك بڕیارێن لەزگین بدەتن كە هندەك جاران كارەسات ژێ دروست دبن و دۆماهیك بڕیار ژی دەست بەرداربوونا وی تاكی یە ژ هەمی هەیی و نەهەیێ خۆ و گرتنەبەرا ڕێكا مان و نەمانێ و خۆ ئێخستنە دەستێ قەدەرێ و مە دیت كا چەوا قەدەرێ چ دگەل هندەكا كر و چەوا كەلواشێ فریشتەیەك و گەلەك فریشتەیێن وەكی " ئالانێ كوردی" لبەر لێڤا ئاڤێن دەریایەكێ غەریب، بوونە هێمایەك ژ نامرۆڤایانەبوونا تیرۆریزمێ و خیانەتا وێ دگەل شارستانیەتێ و لبن هەر ناڤ و نیشان و لۆگۆ و ئالایەكێ هەبیتن. ڤێ ئەزموونێ نیشاندا هەكەر ڕێز ل مرۆڤایەتیێ و بۆهایێن وێ نەهێتە گرتن چارەنڤیسا مەلیۆنەها مرۆڤان دێ وەك یا ئالانێ كوردی بیتن و تیرۆر بدرێژاهییا دیرۆكێ دێ شەهمەزاری تراژێدیا مرنا وان بیتن چونكی نەك تنێ نەشیایە خزمەتەكێ بگەهینیتە كاروانێ مرۆڤایەتیێ هەروەسا ژی بووینە ئەگەرێ هندێ كە ببنە ئاستەنگ لبەر خزمەتا گەلەك كەسین كۆ دڤێتن خزمەتا مرۆڤایەتیێ بكەن.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1740 ) ڕێكەفتی (12/10 /2015) ل(12).