دەزگەهێن جڤاكی ب هەمی رەنگێن خۆڤە، خێزان، هەڤال و هۆگر، قوتابخان، زانینگەه، مزگەفت و كەنیسە، و جڤاك، میدیایێن راگەهاندنێ وەك تەلەفزیۆن و رۆژنامە و گۆڤار و نۆكە ژی تۆڕێن ئەنترنێتێ رۆلەكێ مەزن دگێڕن د ئاڤاكرنا كەساتیا مرۆڤی هەر ئێكەم رۆژێن ژیانێ هەتاكۆ مرنێ. ئەڤ دەزگەهە وەكی ژێدەرەكێ بهێز كار دكەن بۆ دابینكرنا هەمی جۆرێن پێدڤیاتیێن تاكی لدویڤدا ئەڤ كەسە ژ لایەنێن فیزیكی و جڤاكی و سایكۆلۆژیڤە بهێتە تێركرن و چ ڤالەهیەك د ڤێ ڕاستێدا لنك وی نەمینن. ئەڤ دەزگەهە سەرچاڤەیەكن بۆ پەروەردەكرنا مرۆڤی و دروستكرنا سیستەمێ بهایی و ئاراستە و بیروبۆچۆنێن جۆداجۆدا لسەر خۆدێ خۆ و ژینگەهێ و مرۆڤێن دەوروبەر و كەسان و نەتەوەیێن دیتر. پەروەردەكرن بخۆ پرۆسێسا ئامادەكرنا مرۆڤیە بۆ ژیان و گۆنجانێ یە دگەل ژینگەها ناڤخۆیی ( پسیكۆلۆژیك ) و جەستەیی، و ژینگەها فیزیكیا دەرڤەیی. هەر رەفتارەكا مرۆڤ پێڕادبیتن ڕەنگڤەدانەكە ژ كارتێكرنا هەر ئێك ژ ڤان دەزگەهان لسەر كەساتیا مرۆڤی.
ئەزموون نیشان ددەتن كە تیرۆر وەك دیاردەیەك هۆڤانە دناڤ مرۆڤایەتیێ دا پەیوەندییەكا بهێز یا هەی دگەل ژینگەها مرۆڤیدا. ژناڤ وان كەسێن پەیوەندیێ ب ڕێزێن ڕێكخراوێن تیرۆریستی دكەن تنێ هندەك ژ وان كەسێن نەخۆشن كە زگماكی ئەڤ ئێش و ئازارێن دەروونی لنك هەبن، كە وان بەرەڤ كریارێن تیرۆریستی پالددەن. بەهرا پتریا وان كەسێن پەیوەندیێ بڤان جۆرە ڕێكخراوێن تووندوتیژیێ دكەن ئەون یێن دەست پەروەردەیێن وان خێزان و جڤاك و قوتابخانە و دەزگەهانە كە ئەڤ جۆرە هزروبیرباوەرێن هۆڤ و دڕندانە و تێر تووندوتیژی دناڤەرۆكا كەساتیا وان دا هاتینە چاندن. ئەڤ دەزگەهێن كارتێكەر ب شێوازێن جیاواز و ڕێكێن بهێز كەساتیا مرۆڤەكی دئێخنە بن پەروەردەیەكا كاریگەرانە و ڤان هزرێن شۆڤینی و رەگەزپەرستانە و دەرمارگیر ب رەنگێن جۆداجۆدا پنی دكەن، ب جۆرەكی كە ئەڤ كەسە هیچ گۆمانەكێ د راستی یان خەلەتیا وێدا ناكەن و بێی هیچ دوودلیەكێ تەسلیمی جێبەجێكرنا وان دبن، ڤێجا دبیتن ئەڤ رەنگە رەنگەكێ ئایینی و مەزهەبی یان ژ رەنگێ نەتەوەیی و رەگەزی یان هەر جۆرەكێ دیتر بیتن. لەوما هشیارییا گەنجێن مە د ڤێ چەندێ و قۆناغا ناسكدا گەلەك یا فەرە كە دناڤەرۆكا پۆخ و خرش و خاڤێ ڤان جۆرە بیرباوەرێن شۆڤینی بگەهن كە رەنگێ ئایینی بخۆڤە گرتی. چونكی ئەو دزانن كە نێچیرێن خۆ ب چ شێوەیەكی و ناڤەكێ وەكی ئیسلاما پیرۆز بگرن، هەتا باش دكەڤیتە داڤێن تیرۆرێدا و باش تێدا دچیتن و پشتی هنگێ چ رێكەك نەبیتن ژێ دەرباز ببیتن.
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە (1268 ) ڕێكەفتی ( 8 /2 /2015) ل( 6).