هەرچەندە كۆ بدیتنا سایكۆلۆژیك پەیداكرنا كەساتیەك ئاسایی زیادەرۆیی و جۆرەكێ ئیدەئالیزمێ یا تێدا لێ هندەك پیڤەرێن هەین كە كەسانەكێ نێزیكتر لڤی پیڤەری تا ڕادەیەكێ ب كەسانێن ئاسایی ددەن نیاسین. ئەڤ پیڤەرە ژ سێ لایەنانڤە مرۆڤی هەلدسەنگینن. لایەنیچ جەستەیی ئانكۆ نەبوونا گلەیی و گازندەیێن بەردەوام ژ ئێش و ئازارێن خۆ یێن جەستەیی و سایكۆلۆژیك ژ لایەنێ كەسیڤە، و لایەنێ رەفتاری كە لایەنەكێ گرنگە ژ وان بناسێن نیشاندەرێ كەسایەتیەك ئاسایی و ساخلەمن هەكەر بهێت كەسەك خۆدان شیان بیتن د كار و كریارێن خۆ دا و حەز ژ وی كاری بكەتن و گازندەی ژ كاركرنێ نەكەتن و واستیان لنك وی تنێ د ئاستەك پێدڤی دایە، و كێمتر بزاڤا گۆهۆڕینا كارێ خۆ دكەت و ژ پەیوەندیێن خۆ یێن كاری و جڤاكی و خێزانی د ئاسوودە و رازیە و د پێدڤیاتیێن خەلكێ دگەهیت و دگەل بیروبۆچۆنێن جیاواز دا دگۆنجیت. لایەنێ سێیەم ژ ڤێ پیڤەری گرێداینە ب لایەنێ سۆزداریێ ڤە كە تێدا مرۆڤەكێ ئاسایی و ساخلەم ژ ململانێ و كێشمەكێشێن مەزن نەنالیتن و ژ بلی خۆ حەز ژ كەسێن دیتر ژی بكەت.
هەرچەندە ئەڤ پیڤەرە بۆ ناسینا كەسەكێ لسەر ئاستێ تاكی پترتر دگۆنجیت، بەلێ ل هەمان دەمدا دشێتن بشێوەیەكێ گشتی لسەر گرووپەكێ ژی بهێتە پەیادە و جێبەجێكرن. لڤێرێ هەكەر مە بڤێتن ڤی پیڤەری لسەر كەساتیا پێشمەرگەهی جێبەجێبكەین دێ بینین لسەر ئاستێ جەستەیی بۆ ماوەیێ چەندەها دەهكانە، هندی ئەڤە ناڤێ پێشمەرگەهی كەفتیە د فەرهەنگۆكا زمانێ كۆردیدا، بسال پێشمەرگەهی لبەرەیێن جەنگی ب مێرخاسی و خۆبەختركنێ و بێی هندێ گۆهێ خۆ دابیتە گەرما و سەرما و برسێ و ترسێ و تەحلی و نەخۆشیێن ژیانێ لبەرسینگێ دوژمنی یێ ڕاوەستیای و خۆ نەچەماندییە.
ژلایەنێ رەفتاریڤە مرۆڤێن خۆدان شیان بووینە و حەز و ڤیانەك بێ وێنە بۆ كارێ خۆ هەبوویە. پێشمەرگەهی هەمی دەمەكی ب فەخر و شانازیڤە تەماشەی كارێ خۆ كریە و باوەرییا ب دۆزا رەوایا نەتەوەیێ خۆ هەبوویە. هەلبەت د ڤێ ڕاستێدا جڤاك ژی گەلەك هاریكار و پشتەڤان بوویە و چ جاران و لسەردەمێن شۆرەشێن ئەیلول و گۆلانێ، كۆ ڕێزێن پێشمەرگەهی پڕبوینە ژ تەخ و چینێن جۆدایێن جڤاكی، ژ مامۆستیێن زانینگەه و ئایینی و پزیشك و ئەندازیار و شێخ و ئاغاواتا بگرە هەتاكۆ جۆتیار و خەلكێ سادە، و ل سەردەمێ نۆكە ژی ئەم دبینین هەمی تەخ و چین پێكڤە ملێن خۆ یێن داینە ملێن پێشمەرگەهی و یێن بوینە هاندەرێن وان د كارێ واندا و بۆ سەركەفتن بسەر تیرۆریزما جیهانییا كۆ ئەڤرۆكە بەرێ خۆ دایە مە و ڤیای مە ژناڤ ببەن. ئەڤ چەندە بخۆ فاكتەرەكێ بهێزكەرێ مۆرال و وورەیا پێشمەرگەهییە و یا بوویە هێزەكا دەروونی بۆ ڤیانا كار و پیشەیا خۆ و نەخاسمە ژی ئەڤرۆكە و پشتی پێشمەرگەهێن چەلەنگ نیشاندای كە ئەو ئەو هێزە یا بشێتن خۆ لبەر سینگێ هەمی نەیار و دوژمنان بگریتن و ببیتە وشەیەك كۆ مانشێتن گۆڤار و رۆژنامە و میدیایا كوردستانێ و دەڤەرێ و جیهانێ خۆ بڤی ناڤێ پیرۆز بڕازینن و شانازیێ بسەركەفتنێن وان بكەن. ڤێ چەندێ هندێ دیتر وەستیان و ماندیبوون یا ژ بیرا پیچشمەرگەهی بری.
ژ لایەنێ سۆزداریڤە پێشمەرگەه ژ وان ململانێ و ئێش و ئازارێن كۆ كەساتیەكا وەك تیرۆریست بدەست وانڤە دنالینیتن بدویرە و بەلگە ژی بۆ ڤێ چەندێ ئەوە كۆ پێشمەرگەهێ بەردەوام هزرا د پیرۆزییا كارێ خۆ و ئاخ و نەتەوەیا خۆ دا كری و ژبلی خۆدێ خۆ و دویر ژ نێرگزیسمێ و خۆپەرێسێ یا ڤیای نەتەوە و خەلك و كەسێن دیتر ژی تام و چێژێ ژ ژیانێ وەربگرن و ئەڤە گۆپیتكا هەستا ڤیانا كەسانەك دیترە لنك پێشمەرگەهی هەی. ئەو بێی هندێ دەلیڤەی بۆ دوودلی و ململانێیەكا دەروونی بدەتن بۆ پاراستنا ئاخ و نەتەوەیێ خۆ بێی جیاوازییا ئایینی و مەزهەبی و پارتایەتیێ گیانێ خۆ گۆری نیشتمان و ئاخا خۆ دكەت.
ئەڤ شرۆڤەكرنە بەلگەنە بۆ هندێ كە نیشان بدەن بگشتی كەساتیا پێشمەرگەهی خۆدانێ گەلەك ژ سالۆخەتێن كەساتیەكا ساخلەم و ئاساییە كە بوویە ئەگەرێ هندێ نەتەوەیەكێ مەزنێ وەكی كورد و هەروەسا جیهان ژی شانازیێ ب بوون و مانا وان ببەتن.
• ئەڤبابەتەیالرۆژناما ( ئەڤرۆ ) ژمارە ( 1577 ) لڕێكەفتی (28/1/2015 ) لاپەرە ( 13 ) هاتیەبەلاڤكرن.