تیرۆر د كارێ خۆ یێ قیزەوەن دا هەمی یاسا و بنەمایێن سایكۆلۆژی پیادە دكەتن بۆ گەهشتن ب مەرەمێن خۆ یێن ئەهریمانی. تێگەهێ ئازراندن ( الاستفزاز یان provocation ) لسالا ( 1969 ) د پەرتووكا ئێك ژ شۆرەشگێڕێن ئەمریكایا لاتینی بناڤێ ماركوس ماریجیلایدا هاتیە ئاماژەپێدان و ئەڤە وەك ئەزموون یان ل قۆناغێن جەنگێن ئازادیخوازی ل ڤی كیشوەری هاتیە تێبینیكرن [ 1: 175 ]. تیرۆر د ڤێ سیاسەتا خۆ دا دڤێتن بڕێكا پیادەكرنا كەلتتور و فەرهەنگ و رەوشنبیریا وەحشیگەریێ و هۆڤانە و ترساندنێ جۆرە ئاژاوە و تێكچۆنا رەوشا جڤاكی و سیاسی و ئابووری و سایكۆلۆژی دناڤ جڤاكێدا بەلاڤ بكەتن و ئەڤ كاودانە، بدیتنا وان، دێ بیتە پالدەرەك بۆ هندێ خەلك هەست ب نەخۆشیێ و مەترسیێ بكەن و بڤێ چەندێ دەنگێ نارەزایی و بەل بەلێ ل هەر كۆژیەكی بلند ببیتن و ئەڤ چەندە گەلەك جاران دهێتە بكارئینان وەك چەكەك ل دژی دەستهەلاتێ. گازندە و گلەیی و رەخنەیێن خەلكێ ژ حكومەتێ و دەستهەلاتێ و كاودانێن پێدا دەباز دبیتن، دبیتە دەلیڤەیەك بۆ خۆ نیشاندان و هندەك جاران سەرهلدان و شۆرەش و ڕاپەرینا، كۆ ڕێكخراوێن تیرۆریستی ب هەمی شیان كاری بۆ دكەن و بزاڤا بەلاڤكرنا وێ و مەزنتركرنا وێ ددەن. ئەڤ چەندە هنگی بهێزتر لێدهێتن دەمێ لایەن و وەلاتێن دەروبەر ژی مایێ خۆ تێدا دكەن و بشێوازێن جۆداجۆدا بزاڤا پشتەڤانیكرن ل ڤان ڕێكخراوێن تیرۆریستی و ئاژاوەگێڕ ددەن و مەبەستا سەرەكییا وێ ژی پاش ئێخستنا بڕێڤەبرنا هندەك پرۆسێس و پرۆژەیێن نەتەوەیی یێن گرێدای بڤی كاودانی نە. دەما مرۆڤ د بزاڤ و رەفتارێن ڕێكخراوەكا تیرۆریستی وەك داعشێ دفۆكریتن ب ئاشكرایی ڤێ سیاسەتا چەوت دبینیتن كە پشكەكا مەزن ژ هەول و چالاكییا وان بۆ هەمان مەبەستێ و بۆ پاشئێخستنا پرۆژەیا " ب دەولەتبوونا كوردی " دهێتە كرن و یا ژ هەمیا رۆهنتر ئەو بو كۆ هندەك وەلاتێن دەوروبەر ب ئاشكرایی و لبەرچاڤێن جیهانێ هاریكارییا وان كر بۆ ڤێ مەبەستێ، بەلێ پشتی دیتی كە ئەڤ بزاڤە نەشێتن كوردستانیان هندی سەرێ درێزیكەكێ ژ ویست و داخوازیێن خۆ سار بكەن و ب هێز و بازوویێن پێشمەركەهێ قەهرەمان و سەركرداتیا كوردستانی، جارەكا دیتر كۆریا خۆ دەینا سەرملێن خۆ، بەلێ هێشتان ئەو دوژمن جهێ باوەریێ نینن و ئەو نۆكە وەك " گۆرگەكێ برینداری " و پترتر ژ جاران مەترسیدارن بۆ كوردستانیان.
ژێدەر : [ 1 ] ابراهیم، ماجد موریس ( 2005 ). الإرهاب الڤاهرە و أبعادها النفسیە، گ. (1). دار الفارابی، بیروت، لبنان، (509)ص.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1596 ) ڕێكەفتی ( 24 /2 /2015) ل(13).