پێداچۆنەك ب ستراكچەر و پێكهاتەیا هزری و كەساتییا تیرۆریستەكی نیشان ددەتن كە پشكەكا مەزن ژ لادانێن وان بۆ لاوازییا ئاستێ ئازادیێ د كریار و هزر و رەفتارێن واندا دزڤڕیتن. تیرۆریستەكێ گرێدای ب ڕێكخراوەك و دەستەكەكا تیرۆریستی یێ دناڤ هژمارەكا هزر و بیروبۆچۆن و بۆها و ئاراستەیێن رەها، كە هیچ جۆرە نەرماتییەك تێدا نینە، و یێ دناڤ واندا هاتیە ئاسێ كرن و دۆرپێچ بووی. ئەڤ بۆها و هزرێن دائێخستی ژ لایەكی بەرسینگێ رۆناهیا پێشكەفتن و خۆشی و تام و چێژا دیتنا جیهانێ و جوانیێ و ژیانا خەلكا دیتر دگریتن و وان وەكی وێنە و روویەكێ ڕەش و تاری نیشانی وی ددەتن، و ژ لایەك دن ڤە شیانا ئازادهزركرن و ب ئازادی رەفتاركرنێ ژ تاكێ تیرۆریست دستینیتن. چ گۆمان تێدا نینە ئەڤ هەر دوو لایەن و رەهەندە هندێ دی وی د كریارێن خۆ یێن دژی مرۆڤایەتیدا رژد دكەن. ژ لایەك دیتر ڤە هەستەكا نەخۆش بدیتنا خۆشییا خەلكا دیتر لجەم وی پەیدا دبیتن و هەروەسا ژی ب سەدەما نەشیان و نەبوونا ئازادیێ و هیچ شانسەك و دەلیڤەیەك بۆ هزركرن د كارێ خۆ یێ تیرۆریستیدا و یان ڕابوون ب كارەكێ لادای ژ چارچووڤێ وان كریار و رەفتاران، هەتا كۆ ب ڕێژەیەكا گەلەك كێم و بچویك چێ بیتن، جۆرەكێ تێكچۆن و شاشی و لاوازییا ئاستێ باوەری بخۆبوونێ و رەزامەندیێ لجەم وی دروست دكەتن كە د ڕێكا خۆ دا وی بەرەڤ گڤاشتنێن سایكۆلۆژیك پالددەتن و دەرگەهێ داهینان و خۆقۆرتالكرنێ ژ قەید و بەندێن تیرۆرێ لبەرسینگێ وی دگریتن، و بەرۆڤاژی وی هندێ دی پالددەتن كە رژدبیتن د كار و كریارێن خۆ یێن نەمرۆڤایانە. چونكی ئەو یێ دناڤبەرا " نال و بزمارێ " دا ئاسێ بووی و هێدی بڕیار یا لسەر رەفتارا وی هاتیەدان و وی چ چارە نینە ژبلی رەفتارێن تووند و تیژێن تیرۆریستی. ئەڤە هەمی بۆ هندێ دزڤڕیتن یاسا و دیسپلینا ڕێكخراوێن تیرۆریستی ئاستەنگن لبەر دەم ئازادییا هزری و رەفتاری و بڕیاردانێ لجەم ئەندام و تاكێن ڕێكخراوێ.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە ( 1585 ) ڕێكەفتی ( 9 /2 /2015) ل( 12).