ئەڤ نامەیە نەكۆتایی پێهینانا ململانێیە ل جیهانێ. یا راستی بیتن ژیان بێی ململانێ ژیانەك خەیالی و نەكەتوارە و وەك نەمانێیە. بەلێ ئەوا دشێتن بهێتەكرن هزركرنە بشێوەیەكێ زانستیانە و دویر ژ خەیالپالاویێ. جیهان پێك دهێتن ژ مەلیۆنەها و بەلیۆنەها مرۆڤان كە جیاوازن د هزركرنێ دا، بیرۆباوەران، ئایینی، رەنگ، نەژادێ و رەگەزی و ئەڤ جیاوازییە نە تشتەك ناوازە و سەیرە، بەلكۆ پشكەكە ژ جیهانێ و ژیانێ. پێداویستی و داخوازی و جیاوازیێن مرۆڤان پشكەكن ژ بوونا وان و ژ وان ناهێتە جۆداكرن. ئەڤ جیاوازییە گەلەك جاران ململانێیا دروست دكەتن كە بۆ جیاوازییا بیروباوەران و ئارمانجێن مرۆڤان دزڤڕیتن. بیرۆباوەرێن جیاواز تشتەك ئاساییە. چونكی هەر كەسەك و مرۆڤ و جڤاكەك بەرهەمێ كارتێكرنا هژمارەكا فاكتەرێن سایكۆلۆژی و جڤاكی و كەلتوری و فیزیكی و دیمۆگرافی و سیاسیێن جیاوازە. بەلێ هەمی د سالۆخەتەكێ دا هەڤپشكن و ئەو ژی ئەوە كۆ ئەو هەمی مرۆڤن و پێكڤە یێ د كەشتیەكێدا روینشتین بۆ هندێ بگەهنە كەنارێن ئارامی و ئاسایشێ. سواربوون ل پێلێن دژوارێن بێ بنەما و هزركرنەكا دۆگماتی و ترس ژ گەنگەشە و دانۆستاندنێ و گۆهدارییا بەرامبەر و پەسند و ئاسایی زانینا بیرۆباوەرێن جیاواز دەرگەهێ ڕاستەقینەیە بۆ نەهێلانا هەموو وان ئاریشە و ناكۆكیێن د مرۆڤایەتیێدا دهێنە دیتن و هەستپێكرن. جیهان یا بدەست كۆمەكا قەیرانێن ئابووری و فیزیكی و ژینگەهیدا دبۆریتن، و ڕادیكالیزم و تووندرۆیی و تیرۆر و دەمارگیری و دۆگماتیزما هزری ژی " نەهێن خۆ ئیناینە سەر دەهێن " جیهانێ و ژبلی شێواندنا سەروسیمایێن ئایینێ ئیسلامێ وەك ئایینێ ئاشتی و ئازادی و یەكسانی و دادپەروەریێ، هیچ دەستكەفتەك دیتر پێشكەشی جیهانێ و كاروانێ مرۆڤایەتی و شارستانیەتێ نەكریە. نە خیلافەتا رەسەن هاتیە و دهێتە جێبەجێكرن. نەشیایە هەمی مەسیحی، ئێزدی، جۆهی، بوزی، كۆنفشیوس، و سیخ و بەرهەمنێن هێندی، شینتۆیێن ژاپۆنی و تائۆتیسم ب جارەكێ و هەمییان بكەنە مۆسلمان. هێدی بلا بەس بیتن پەنابرنە بەر تووندوتیژیێ و ژناڤبرنا یێ بەرامبەر. بلا ئەو وزە و شیانێن بۆ ڤێ چەندێ دهێنە بكارئینان د خزمەتا ئایینێ ئیسلامێ و مرۆڤایەتیێ بهێنە بكاروەرگرتن. بلا ئەڤ شیانە بۆ داهینانێ بن. ئەڤرۆ مرۆڤایەتی پێدڤی ب داهینانێیە، نەك تیرۆرێ و تووندوتیژیێ. داهینان بۆ ڤەدیتنا ژێدەرێن ژیارێ و وزە و جهێ ئاكنجیبوونێ و بەرنگارییا هەژاریێ و گەندەلیێ و پیسبوونا ژینگەهێ و هەمی ئەو ئاریشەیێن ئەڤرۆكە مرۆڤایەتی و شارستانیەت بدەستڤە دنالینیتن. ئەڤە هزرێن ئاڤاكرنا جیهانەكا خەیالی و یۆتۆبیا نینە بەلكۆ گەلەك بسانەهیترە و تنێ پێدڤیە هندەك لایەن ژ چارچۆڤەی خۆپەرێستی و دۆگماتیزمێ و هزرێن تووندرۆانە و تووندوتیژی و دەمارگیریێ و تیرۆرێ دویر بكەڤن و دەست لناڤ دەستێن ئێك كار بكەن بۆ بەختەوەرییا مرۆڤایەتیێ، نەك هەر كەسەك ژ لایێ خۆڤە ڤێ " گۆما ئاڤێ تێك بشلقینیت و شێلی بكەت".
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە (1303 ) ڕێكەفتی (6/4/2015) ل(6 ).