دبیتن گەلەك جاران مە پێ سەیر بیتن كا بۆچی رێكخراوێن تیرۆریستی یێن وەكی داعشێ كەسەكێ وەكی فرۆكەوانێ ئۆردەنی یان ئێخسیرێن پێشمەرگەهی یان هەر قۆربانیەكێ خۆ یان بۆ ئەنجامدانا تاوانێن وەكی پەقاندنێ و كریارێن بێ زەڤەرێن خۆ لبەر چاڤێن كامیرە و دەزگەهێن راگەهاندنێ ئەنجام ددەن و وان بۆ خەلكێ بەلاڤ دكەن؟ ئەڤ تەكتیكە ئێكە ژ وان ستراتێژیێن سایكۆلۆژیێن تیرۆریستێن جیهانی بۆ مەبەستی گەهشتن ب ئارمانجێن خۆ جێبەجێ دكەن. بڕێكا ڤێ تەكتیكێ ئەوان دڤێتن ڤێ چەندێ نیشانی خەلكێ بدەن كە چەوا چەرخێ بیست و ئێكێ تا چ ڕادەیەكێ د بەرژەوەندییا وان دا یا پێشكەفتی. هەكەر جاران تیرۆرێ ب خەنجەر و گیڤتینێ و ب دزیكیڤە ململانێ دگەل مرۆڤایەتیێ و شارستانیەتێ دكر، لێ ئەڤرۆكە راگەهاندنێ ب هەمی ئالاڤ و جۆرێن خۆ ڤە كارێ گەهاندنا هۆشدارییا مەترسیدارا وان یا بسانەهی ئێخستی. تیرۆر ئەڤرۆكە بڕێكا كەرەستێن ئەلكترۆنی و هەمی ئالاڤێن وێنەیی كریارێن هۆڤێن خۆ وێنە دگرن و بڕێكا سیستەمێ تۆڕێن ئەنترنێتێ د ماوەیێ چەند چركەیەكا نیشانی وان كەسێن مەبەستا وانن ددەن و ڤی وێنەیێ دڕندانە، كە هێمایێ گۆپیتكا هۆڤاتیا هەر مرۆڤەكێ نەئاسایینە، ل سایتێن خۆ بەلاڤ دكەتن، تاكۆ بڕێكا وێ بێژیتن ك " ئەڤە ئەمین و ئەم یێن هەین و ئەڤە ئەم هاتین. تو و دەستهەلاتا تە دوژمنن و كافرن و نابیتن هوین بمینن. هوین دڤیا بهێنە گۆهۆڕین ". بەلێ ئەوا راستی بیتن ئەوان یا ژبیركری یان ژبیرا خۆ دبەن و خۆ ل گێلی ددەن ئەو نەتەوەیێ بۆ ماوەی هزاران سالانە خۆ لبەر دڕندەترین مرۆڤێن دیرۆكێ هەر ژ ئەسكەندەرێ مەقدونی هەتا تورانیێن مەغۆل و هەتا مەزنترین دیكتاتۆرێ چەرخێ بیست و ئێكێ " سەدامێ گۆڕ بە گۆڕ و ڕژێما بەعسا فاشیستی" گرتی، ب قۆربانیدان و هێزا دەست و باسكێن پێشمەرگەهێ قەهرەمان دێ هەمی خەون و خەیالێن وان ساخ بن ئاخ كەتن. هەكەر راگەهاندنێ ژ لایەكی ڤە هاریكارییا بەلاڤكرنا بۆهایێن هۆڤانەیێن وان دابیتن، لێ د هەمان دەمدا ژی پەنجەرەیەك لبەرچاڤێن مە ڤەكریە و نیشانی مە ددەتن هەكەر بڕیار ئەو بیتن دۆماهیكا نەتەوە و ژیان و نامیس و كەرامەت و پرستیژا كوردستانیان لبن گەفێن تیرۆریستێن دڕندە وەلێ بهێتن وەك ئەوا وان دگەل هزاران كەس ژ خەلكا كوردستانێ و دەڤەرێ كری، پا ئەم دێ پیر و شیر ل سەنگەرێن بەرگریكرنێ خۆ قۆربانی ڤی نەتەوەی و ئاخا وێ كەین و بندەستیا تاخمەكێ هۆڤ وەكی تیرۆریستێن داعشێ قەبیل ناكەین.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1624 ) ڕێكەفتی ( 14/4/2015) ل(12 ).