سەدەی بیست و ئێكەم ب هەمی پێشكەفتن د بیاڤێن تەكنەلۆژی و زانستێ دا، دیسانێ سەدەیێ سەرهلدانا چەندەها قەیرانێن ئابووری و سۆسیۆلۆژی ژی بوویە. مەترسیا زێدەبوونا ژمارەیا ئاكنجیێن جیهانێ و هەمی خەم و خەیالێن پێڤەگرێدای، هەر ژ كێمبوونا ژێدەرێن ژیانێ و دگەلدا ژی پیسبوونا ژینگەهێ كێم نەبوون هەڕەشەی ل بوون و مان و نەمانا مرۆڤایەتیێ بكەن، تیرۆر ژی هاتە سەر و دگەل دەستپێكا سەدەی ب كریارێن دڕندان و تووندوتیژیێ تام و چێژەكا نەخۆشتر دایە ژیانا مرۆڤایەتیێ و شارستانیەتا وی. تیرۆر ئەو دیاردەیە یا كۆ چ بۆهایێن مرۆڤاتیێ جهێ خۆ د فەرهەنگۆكا وێدا نینن. چ سنورا نزانیتن و ڕێزێ ل چ بیروباوەر و ئایین و نەتەوە و ڕێبازا ناگریتن. چاخێ نۆكە ژبلی هەمی بارگرانییا خۆ بۆ سەرملێن مرۆڤایەتیێ، ژ ئەگەرێ كارتێكرنا كریارێن تیرۆریستی ل جهێن جۆداجۆدایێن ڤێ جیهانێ هندێ دی بارێ مرۆڤایەتیێ و شارستانیەتا جیهانی یا گرانتر كری و بوویە سەدەمێ سەرهلدانا چەندەها قەیران و مالوێرانیا. لسەردەستێ ڕێكخراوێن تیرۆریستی ب مەلیۆنەها مرۆڤان یێن ژ جه و وارێن خۆ دەربەدەر و ئاوارەبووین، و هزاران كەس بێ سەر و شوین و بەرزەنە، و ژبلی كۆش و كۆشتارا خەلكا سیڤیل و بێگۆنەها زارۆك و ئافرەت و دانعەمرا. ئەڤە هەمی بەرهەمێ خۆپەرێسیێ و دەمارگیرییا مێنتالی و دۆگماتیزما هزریا جەنگفرۆش و بازرگانێن جەنگ كە ژبۆ بەرژەوەندیێن تایبەت ل شوینا بەرێ ڤێ كەشتیا ئەم هەمی تێدا سویار بدەنە كەنارێن ئارام، یێ ددەتە ئاقارەكێ ترسناك و تەژی ئێش و ئازارێن سۆسیۆسایكۆلۆژی. چونكی ئەڤ كاودانێن نەخۆشێن تیرۆریزما جیهانی بوویە ئەگەرێ وێ كارتێكرنەكا نەرینی و خراب یا لسەر كەت كەتێ تاكێن جڤاكا مرۆڤایەتیێ هەی. دویرترینی مرۆڤ ژ گۆڕەپانا جەنگێ دژی تیرۆرێ ئەڤرۆكە بڕێكا تۆرێن ئەنترنێتێ و كەنالێن جۆراوجۆرێن ڕاگەهاندنێ گۆهدار یان بینەرێ كارەسات و روویدان و تراژێدیێن كۆشتن و تالانكرنا گۆند و باژێڕێن كوردستانێ دبیتن و چ گۆمان تێدا نینە دكەڤیتە بن كارتێكرنا وان. بەلێ ل كوردستانێ هزاران دەربەدەر و ئاوارە و جینۆساید و ئێش و ئازارێن جەستەیی و دەروونی كۆ بەرهەمێ ڕاستەوخۆیێ تیرۆریزمێ یە. ئایا ئەڤ كاودانێن نەخۆش ویژدانا مرۆڤایەتیێ نەهەژاندیە؟ بێگۆمان بەرسڤ " بەلێ " یە. بەلگە ژی هەمی ئەو هاریكارینە یێن دۆست و هەڤالێن نەتەوەیێ كورد دگەهیننە مە. هەكەر هندەك ژ وان بەرژەوندیێن خۆ ژی هەبن بەلێ پشكەكن ژ وان یێن ب ئێش و ئازارێن نەتەوێ مە دحەسیێن. بوونا ڕاستەوخۆ دناڤ گۆڕەپانا ڤێ تراژێدییایێدا بۆ گەلەك كەس و زارۆكان ئەزموونەك تەحل و دژوارە و دێ بۆ ماوەیەكێ دۆمدرێژ كارتێكرنەكا نەرینی لسەر سایكۆلۆژیایا وان هەبیتن و هیچ نەبیتن د بیردانكا واندا وێنەیەكێ نەخۆش ژ وان هەمی قۆربانی و كۆشتار و ڕەڤاندن و بێسەروشوینكرنا مرۆڤان لجەم وی دوروست كەتن و چ جاران ڕەش نابیتن و دێبیتە پشكەك ژ پێكهاتەیا سایكۆلۆژیایا وان و دێ ڕەنگڤەدانا خۆ لسەر بیروباوەر و بۆها و ئاراستەیێن وی یێن تایبەت و جڤاكی هەبیتن. بەلكۆ د هندەك كەسان ئەڤ ئەزموونە دێ بیتە بناسەك بۆ سەرهلدانا جۆرەها ئێش و ئازار و بەلكۆ ژی نەساخیێن سایكۆلۆژیك و ڤێ گۆتنێ بەلگەیێن خۆ یێن هەین و ئەو ژی سەرهلدانا جۆرەها پەریشانی و سترێس و خەمۆكی و خەونێن نەخۆشە لجەم هندەك ژ وان كەسێن ب ڤان كاودانا دا دەرباز دبن ل دەڤەرا مە و جهێن دیترێن جیهانێ. ژ ڤێ ئێكێ یە ئەركێ شارستانیەتا مرۆڤایەتیێ ب جەنگ دژی تیرۆریزمێ گرانتر دبیتن چونكی بڤێ چەندێ خزمەتا مرۆڤایەتیێ بگشتی دهێتەكرن و و ڕێژە و ئاستێ مەترسیێ و هەڕەشەیا تیرۆرێ بۆ سەر مرۆڤایەتیێ و ئاسایێشا تاكێن وێ كێمتر لێدهێتن و پشكەك ژ ساخلەمییا سایكۆلۆژیایا وان دهێتە مسۆگەركرن.

• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1633 ) ڕێكەفتی (29/4/2015) ل(13 ).