رێكخراوێن تیرۆریسَتی بشێوەیەكێ سیستماتیك و پرۆگرامكری سەرەدەریێ دگەل كارێ خۆ دا دكەن و بۆ بدەستڤەئینانا مەرامێن پیس و بۆگەنیێ، خۆ مفای ژ هەمی زانستان و نەخاسمە ژ سایكۆلۆژیێ وەردگرن. نموونە ژ ی بۆ ڤێ گۆتنێ ئەوە كۆ ئەڤ رێكخراوێن تیرۆریسَتی باش د پێدڤیاتیێن بایۆلۆژیكی/فیزیكی و دەروونی و جڤاكیێن مرۆڤی دگەهن و بزاڤێ دكەن كاری لسەر بكەن و لسەر بنەمایێن وان سەردەریێ دگەل تاكێن جڤاكێ بكەن بۆ ڕاكێشانا وان بۆ لایێ خۆ و ئێخستنا وان د داڤێن تەلهێن بۆ وان هاتینە ڤەناندن.
هەژاری و بەلەنگازییا تاكێن جڤاكێ خالەكە كۆ تیرۆر تەكەزێ لسەر دكەتن وەك هێجەتەك بۆ خۆ نێزیككرن ل نێچیرێن خۆ و ئەڤە ژی ژ هندێ دهێتن كە كەسێ هەژار ژبەر كاودانێن خراب و پەرگارا ئابووریا لاواز نەشێتن گەلەك ژ پێدڤیاتیێن خۆ یێن فیزیكی و بایلۆژیكی وەك خوارن و ڤەخوارن و جل و بەرگ و ...هتد، تێر بكەتن، ژ ڤێ چەندێ یە كۆ ل ژێدەرەكی دگەڕهیتن بۆ دابینكرنا ڤان پێدڤیاتیا، و رێكخراوێن تیرۆریستی و تووندرۆ ب تێگەهشتن ژ ڤێ راستیا سایكۆلۆژی لنك تاكی بەردەوام تەكەزێ لسەر وان كەسێن بەلەنگاز و هەژار دكەتن بۆ هندێ ب پێدانا بڕەك پارەی، كە هندەك ژێدەرێن فەرمی ڤێ چەندێ دیار دكەن، وان بیننە ناڤ ڕێزێن خۆ دا.
خالەك دیتر یاكۆ شەهرەزایێن رێكخراوێن تیرۆریستی تەكەزێ لیەر دكەن لایەنێ زانینی ( مەعریفی ) یە. ئەڤ رێكخراوە تەكەزێ لسەر مرۆڤێن سادە و ساكار و ساویلكە و ئەوێن ئاستێ وان یێ هۆشی و زانینی نزمە و دگەل هندێ ژی د بیاڤێن زانیاریێ دا لاوازن، دكەتن. ئەو ڤێ راستیێ دزانن ئەڤ كەسە ب باشی د راستیا تشتی ناگەهن و نەشێن بشێوەیەكێ زانستیانە جیاوازیێ بكەن دناڤبەرا باشیێ و خرابیێ و خەلەتیێ و نەخاسمە كۆ سەرەدەریكرنا تاكێن جڤاكێن مۆسلمان دگەل ژێدەرێن سەرەكیێن ئایینێ ئیسلامێ ل دەڤەرێن مە پێدڤی ب شەهرەزاییەكا گەلەك باشە بۆ هندێ ئەو تێكست و ناڤەرۆكا قۆرئانا پیرۆز و حەدیسێن پیامبەری ( د. س. ) كارەك زەحمەتە و پێدڤی ب شەهرەزاییەكا باشە و كەسێن نەشەهرەزا نەشێن باش د ناڤەرۆك و د ڕاستیا وان بگەهن.
پێپكا سێیەم ژ سێ كۆچكەیا كۆ تیرۆر تەكەزێ لسەر دكەتن وەك نێچیركرنا تاكێن جڤاكێ و ڕاكێشانا وان بۆ ناڤ ڕێكخراو و گرووپێن تووندرۆ و لایەنێ جڤاكیا مرۆڤیە و ئەو ژی ئەوە كۆ پویتەدانە ب وان كەسێن گۆشەگیرن و د جڤاكێدا مرۆڤێن ڤەقەتیاینە و تێكەلی خەلكێ نابن و یێن هاتینە پشتگۆه هاڤێتن و پەراوێز كرینە. مرۆڤ ب سروشت بوونەوەرەكێ جڤاكییە و دناڤ جڤاكێدا و دەزگەهێن وێ یێن وەكی خێزان و هەڤال و هۆگر و قوتابخانە و كەنیسە و مزگەفت و .. هتد، دا هەست ب ژێیاتیێ و سەرپێبوونێ بۆ هەر ئێك ژ وان دكەتن تاكۆ برێكا ڤێ پەیوەندیێ گەلەك ژ پێدڤیاتیێن فیزیكی/بایلۆژیكی و هەروەسا یێن سایكۆلۆژیكی و جڤاكی تێر بكەتن. ئەڤ چەندە هاریكارییا وی دكەن دناڤ هەر ئێك ژ ڤان دەزگەهاندا هەست ب ئارامیێ و ئاسودەیێ و ئاسایشێ و تەناهیێ و مرۆڤبوونێ بكەتن و دەمێ ژڤان دەزگەها دویر دكەڤیتن و هەست ب هندێ دكەتن كە ئەڤ دەزگەهە وی دناڤ خۆ دا ناهێلن، ئەڤ تاكە دێ هەست ب بۆشاهی و ڤالەهیەكێ جڤاكی و دەروونی كەتن و ئەڤ چەندە وی پالددەتن كە ئێكەم ژێدەر یان لایەنێ بشێتن ڤێ ڤالەهیێ پڕ بكەتن وی بۆ لایێ خۆ ڕابكێشیتن و هەكەر ئەڤ لایەنە گرووپەك تووندرۆ یان رێكخراوەك تیرۆریستی بیتن دێ ڤی تاكی وەك نێچیرەك بۆ لایێ خۆ ڕاكێشیتن و دگەل تێگەهشتن ژ هەر دوو خالێن لاوازیێن دیتر دا، ئانكۆ هەژاری و نەزانی، وی بسەردابەن و ئێخنە داڤێن خۆ.
دەما ئەڤ سێ خالێن لاوازیێ د كەسانەكیدا هەبیتن دشێتن بسانەهی بهێتە نێچیركرن، لەوما حكومەت و جڤاك و خێزان دشێن گەلەك بسانەهی و بڕێكا دابینكرنا دەلیڤێ كاری و ژیانێ و بلندكرنا ئاستێ زانستیێ تاكی و خێزانی و جڤاكێ و مۆكم كرنا پەیوەندیێن جڤاكی ڕێكێ ل بسەرداچۆنا گەلەك كەسان بگرن ژ چۆنا وان بۆ ناڤ ڕێزێن رێكخراو و هێزێن تووندرۆ و نەخاسمە تیرۆریستی.
ژێدەر: موفتی، حسن ( 2015 ). ترسم لەو فیكرەەیە داعش لە ناوخۆی كوردستان بە شێوازێكی دیكە بەرهەم بهێنێتەوە، گۆڤاری گۆڵان، ژ. ( 1009 )، ل. ( 38-43 )، لە ( 12/1/2015 ).
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە (1319 ) ڕێكەفتی (3/5/2015) ل(6 ).