ئەم گەلەك جاران وەسا ب نەرینی د تیرۆریزمێ دا هزردكەین كە لایەنێن ڤەشارتیێن وێ ژبیر دكەین. پێداچۆنەكا ئاماری ب ئەندامێن ڕێكخراوێن تیرۆریستی ل رۆژهەلاتا ناڤین و باكووری ئەفریقایێ نیشان ددەتن كە زۆربەیا ڤان كەسان ژ جڤاكێن مۆسلمان پەیوەندیێ پێڤە دكەن و ئایینێ پیرۆزێ ئیسلامێ وەك ئایینەك چاكسازی تەكەزێ لسەر " ئەمر و نەهیێ " دكەتن وەك ئێك ژ بنەما و پرەنسیپێن چاكسازییا جڤاكی. ئەڤ تیرۆریستە دەمێ پەیوەندیێ بڤان رێكخراوێن تیرۆریستی دكەن لنك دلەكی ژپێخەمەت بجه ئینانا ڤێ یاسایا ئایینێ ئیسلامێ بزاڤێ دكەن و خۆ د وێنەی سەحابیەكێ قەهرەمان دهژمێرن كە نیاز و ڕێكا نەهێلانا خرابی و پووچگەرایی و زۆرداری و نایەكسانی و نەدادپەروەریێ دگریتە بەرسینگێ خۆ، لێ د پراكتیك دا هەر ئەڤ كەسە و لبن گڤاشتنێن ڕێكخراوەیی و سەركرداتیا خۆ مەزنترین تاوانێن دژی مرۆڤایەتیێ ئەنجام ددەن و ئەو بخۆ، ل شوینا هندێ ببنە دەرگەهەك بۆ بەرهەمهینانێ و داهینانێ و ب مفا بوونێ و ژێدەرێ " ئەمر و نەهیێ"، دبنە ژێدەرێن خرابی و پووچگەرایی و زۆرداری و نایەكسانی و نەدادپەروەریێ ل جیهانێ و سنوورێ چالاكییا خۆ.
ئەڤ جۆرە رەفتارە د زانستێ سایكۆلۆژیایا فرۆیدی دا ب شكۆداركرن ( التصعید یان sublimation) دهێتە نیاسین كە تێدا تاك بەرۆڤاژی تەپەسەركرنا پالنەر و ئارەزوو و بۆچۆنێن خۆ د نەستێ خۆ دا،ڕادبیتن ب ڤەگۆهاستنا ڤان ئارەزوو و پالنەران ب شێوازەكێ كۆ پترتر جهێ رەزامەندیا جڤاكێ بیتن. بۆ نموونە بزاڤێ دكەتن پالنەرێن خۆ یێن سێكسی بڕێكا هۆنەرێن جۆداجۆدا دەرببڕیتن. هەرچەندە ئەڤ میكانیزمە جۆرەكێ بەرهەمهینەر و ئارمانجدار و ب مفایە، لێ تیرۆریزمێ نەشیایە وەكی پێدڤی بكار بینیتن و بەرۆڤاژی یاسا و بنەما و پرەنسیپێن وێ یا بكار ئیناندی و زیان یا گەهاندییە خۆ و جڤاكێ و ئەو وزەیە یێ د ئاراستەیەكێ پێچەوانەڤە دایە كاری.

• ئەڤبابەتە یا ل ڕۆژناما (ئەڤرۆ )/ بەرپەڕێ بیر و ڕا هاتیە بەلاڤكرن ژمارە(1828 ) ل ڕێكەفتی(22/2 /2016) ل. (12 ).