د سایكۆلۆژیایێ دا گۆشەگیركرن یان ژهەڤ ڤەقەتاندن(isolation) و پرۆسێسا سایكۆلۆژیایا ژهەڤجۆداكرن بزاڤێ دكەتن كە دوو بیروباوەرێن هەڤدژ ژ هەڤدۆ جۆدا بكەتن و نەهێلیتن كارتێكرنێ لسەر هەڤدۆ بكەن. پشكەك ژ ڤێ میكانیزما بەرگرییا دەروونی بۆ لایەنێ سۆزداری دزڤڕیتن، و تێدا ئەو لایەنێ سۆزداری، یێ كۆ هاوكاتە دگەل هزر یان ئەزموون یان بیرهاتنەك تەحل و دژوار، ژ ناڤەرۆكا هەستەوەری ( شعوری) یێ تاكی دهێتە جۆداكرن و دویر ئێخستن. هەر چەندە، دگەل وێ دویر ئێخستنێ دا ژی ئەڤ روویدانە د كویراهییا نەستێ (لاشعورێ) وی دا دمینیتن.
ئەڤ میكانیزمە جهەكێ تایبەت د هزرا تیرۆریزمێ مژویل دكەتن و دگریتن، و نەخاسمە ئەڤ چەندە ژ وان ئێرشێن وان بۆ سەر كوردستانێ و نەخاسمە ژی دەڤەرێن وەكی كۆبانێ گەلەك ب ئاشكرایی خویا دبیتن. د هزرا تیرۆریزمێدا هەبوونا نەتەوەیێ كوردی وەك ئەزموونەك تەحل و نەخۆش بۆ وان دهێتە هژمارتن و هەمی ئەو بزاڤێن هاتینە دان بۆ نەهێلانا وی نەتەوەی ژ لایەنێ تیرۆریزمێ و هەڤالێن وانڤە بەلگەیەكە كە ئەڤ كارە یێن هاتینە ئەنجامدان بۆ ڤەقەتاندنا ڤی بەشی ژ كەلتوور و جڤاكێ و جۆگرافیایێ ژ ژێدەرێ وێ یێ سەرەكی و دویر ئێخستنا وێ ژ هەمی هزر و ئایدیۆلۆژیایا خۆ. دیارە پرۆسێسا ڤەقەتاندنا كوردستانێ ژلایەنێ تیرۆریزمێ ڤە پرۆسێسەك سەركەفتی نەبوویە و نەخاسمە ژی گەلەك لایەن و كەسان هاریكارییا بڕێڤەچۆنا وێ كر، لێ خۆڕاگری و مێرخاسی و باوەری ب خۆ هەبوون و دان پێدانا جیهانی و هۆشیارییا سەركرداتییا سیاسییا كوردستانی و نەخاسمە سەرۆك مەسعود بارزانی ئەڤ پرۆژەیە ساخ بن ئاخ كر و جارەكا دیتر نەهێلا ئەڤ هزرێن شۆڤینی ببنە كەتوارەك و د سنوورێن كوردستانێ دا سەربگرن.
• ئەڤبابەتە یا ل ڕۆژناما (ئەڤرۆ )/ بەرپەڕێ ئەدەبی- هاتیە بەلاڤكرن ژمارە (1800 ) ل ڕێكەفتی(13/1 /2016) ل. (12 ).