گەلێ کوردستانێ ب هەمی پێکهاتێن نەتەوەیێ و ئاینی ڤە بریارا خودایە کو بیست و پێنجی ئەیلولێ چارەنفیسێ خو ئێکلا بکەن کو ل گەل عێراقێ بمێنەوە یان جودابنەڤە،سەربەخوبوون ئارمانجا راستەقینەیا گەلێ کوردستانێ یە،هەر ژبەرهندی تۆشی گەلە دەردەسەری و تراژیدیایێن نەخۆش بوونە ژوان ژی ئەنفال و جینوساید و کێمیابارانکرن و ب عەرەبکرن.
پشتی سەرەدانا جڤاتا بلند یا کوردستانێ ل رۆژا دووشەمبی کو ب سەرەدانەکا فەرمی گەهشتنە بەغدا پرسا رێفراندۆما کوردستانێ گەلەك گەرم و گور بویە،بویە جهێ گرنگیپێدانا مێدیایێن نافخویێ و هەرێمی و نێفدەولەتی،ب تایبەتی تورکیا کو ئێك ژ ولاتێن گرنگیێن ناوچەیێ یە ب وردی گرنگیێ ددەتە رێفراندۆما کوردستانێ کو بریارە ل بیست و پێنجی ئەیلولێ بهێتە ئەنجامدان.
هەلبەتە تورکیا ئێکە ژگرنگترین دەولەتێن رۆژهەلاتا ناڤین،کارتێکرنەکا مەزن لسەر رووداو و هاوکێشەیێن ناوچەیێ هەنە،ئانکو تورکیا لسەر هەر پرسەکا رۆژهەلاتا ناڤین خوەدان هەلویستێ خویێ تایبەتە و ئاخفتانا خو هەیە،هەر ژبەر پێگەهێ گرنگێ تورکیا هەلویستێ تورکیا لسەر پرۆسا رێفراندوما کوردستانێ گەلەکا گرنگە،چونکی تورکیا ب درێژاییا مێژویا خویا سیاسی لسەر پرسێن ناوچەیێ خوەدان هەلویستەکێ گرنگ بویە ناوچەیا دژەفرین باشتیرین بەلگەهێن بو وێ راستیێی،هەروەسا ولاتێ تورکیا کو ئەنداما ناتویە و هەردەم هەولدایە ببێتە ئەندام ل ئێکەتیا ئەوروپا هەلویستێ وێ دەربارەی پرۆسا رێفراندۆما کوردستانێ گرنگیا خویا تایبەت هەیە.
هەژی گوتنێ یە تورکیا هەتا نوکە هەلویستەکێ نەرم هەیە ل هەمبەر رێفراندۆما کوردستانێ،تەنانەت رێزدار نێچیرڤان بارزانی ل چەندین دیدارێن رۆژنامەڤانیدا سەبارەت ب هەلویستێ تورکیا ئاماژە ب هندێ کرییە کو مە چاڤەرێ هەلویستەکێ هوسا نەرم ل تورکیا نەدکر لسەر رێفراندۆمێ،لەوما وا دهێتە خەملاندن کو هەلویستێ تورکیا ئەگەر باشیش نەبێت،بەس یێ توند نابێت ل دژی رێفراندۆما کوردستانێ...
گەلەك جارا بەحسی فشارێن ولاتێ تورکیا دهێتەکرن لسەر پرۆسا رێفراندۆمێ،وەکو ئەرێ تورکیا بەر رێفراندومێ دێ پەیوەندیێن خو بچرینیت گەل کوردستانێ؟ئەرێ تورکیا دێ سنورێ خو گریت،یان دێ رێگریێ ل هنارتنا پەترولا کوردستانێ کەت؟ئەڤ پرسیارە و چەندین پرسیارێن دێ ب هەلافیستی ماینەوە،پشتی شکستنا کودەتایا پازدەیا تەمموز سەرەدانا سەروك وەزیرێ تورکیا بینالی یلدرم ل رێکەفتی ٦/۱/۲۰۱۷ بو هەرێما کوردستانێ بومە دیار دبیت کو هەرێما کوردستانێ ژ جیرانێن تورکیا گرنگترە ژبو ولاتێ تورکیا،ب رامانەکا دی هەرێما کوردستانێ پێگەهەکێ تایبەت هەیە ل سیاسەتەتا دەرڤەیا تورکیادا،لەورا ئەز پێشبینی دکەم کو ئەو فشارێن دهێنە بەحسکرن ژ لایێ هەندێك دەزگەهێن میدیایێ ڤە هێچ بنەمایەڬ بو نینە،ئانکو تورکیا ئامادەنینە وان بەرژەوەندیێن خو تێك بدەت،چونکی ل جیهانا سیاسەتێ دا تنێ بەرژەوەندی گرنگە،واتە بەرژەوەندیا ولاتی چ بڤێت پێدڤیە بریاردەرێن سیاسی وەسا رەفتارێ بکەن،تەنانەت ئەگەر دژی بنەمایێن مروفی بێن،لەوما بومە ئاشکەرا دبیت تورکیا نەڤێت ژبەر رێفراندۆمێ بەرژەوەندیێن خویێن دەم درێژ پەیوەندیێن خویێن سیاسی و ئابوری و بازرگانی و گەشتوگوزارێ(جا چ داخستنا سنورا بیت یان راگرتنا ڤەگوهستنا پەترولاکوردستانێ)لگەڵ کوردستانێ رابگریت،چونکی زەرەرمەندێ ئێکێ تنێ ولاتێ تورکیا دێ بیت،دێ بازارەکا مەزن دەست خودەت،هەر ژبەرهندی دهێتە چاڤەرێکرن تورکیا بو رێفراندۆما کوردستانی مەرجێن خویێن تایبەت هەبن،کو ئەز پێشبینی دکەم پاراستنا ئاسایشا نیشتیمانیا تورکیا ئێکە ژوان مەرجا،ئانکو تورکیا دڤێت سەربخوەبونا کوردستانێ چ کارتێکرن نەبیت لسەر ئێك پارچەیا خاکا تورکیا و سەقامگیریا تورکیا.
بویە ئەو فشارێ دهێنە بەحسکرن هیچ بنەمایەك بو نینە تنێ پروپاگەندا هەندێك کەس وگرۆپ و لایەنێن سیاسی نە بو پاشخستن و پەکخستنا رێفراندومێ،لێ ئەز دێ بێژمە وان گەلێ کوردستانێ بریارا خودایە فشارێن ئەمریکا و روسیا و تورکیا و ئیران و بەغداد نەشێن رێفراندۆما گەلێ مە پاش بێخن و پەك بخینێن،لێ راستە تورکیا و ولاتێن دی یێن مە ئامەژەپێکری دێ شێن ئاستەنگا درۆست بکەن ل هەمبەر رێفراندۆما کوردستانێ،بەلێ ب هێچ شێوەیەکی نەشێن وێ رێفراندۆمێ پاش بێخن و پەك بێخینێن،چونکە رێفراندۆم ئیرادەیا گەلێ مەیە،رۆژا بیست و پێنجی ئەیلولێ گەلێ مەیێ ستەم لێکری دێ وان هەمی ئاستەنگێن هەمبەر رێفراندۆمێ دێ ناف بەن،لەوما چاڤەرێ مزگینیەیەکا خۆش بێن ژلایێ جەنابێ بارزانی و گەلێ کوردستانێ کو ئەوژی تنێ سەربەخوەبونا کوردستانێ یە...