تاران .. ده‌وڵه‌تی كوردستان به‌رێوه‌یه با دوو دراوسێی باش بین .. نه‌كرده‌ی په‌شێمان به، نه‌ك كرده‌ی په‌شێمان ..!!
د. محەمەد خدر مەولود
كه هه‌ڵوه‌سته‌یه‌ك له‌سه‌ر دوا بزافی ئێران دژی ریفراندۆمی ٢٥ی ئه‌یلولی ٢٠١٧ ی خه‌ڵكی كوردستان ده‌كه‌ین بۆمان ده‌رده‌كه‌وێت كه‌تاران له‌به‌غدا خه‌مخۆرتره بۆ پاراستنی یه‌كپارچه‌یی عێراقی لێكهه‌ڵوه‌شاوه، ده‌كرێ پێی بڵێین له‌مه‌لیك مه‌لیكتره بۆ عێراقێك كه‌رۆشنبیرو روناكبیرانیان خۆیان ده‌ڵێن ( عیراق بلد النیفاق ) ه .
ئه‌مانه‌ی خواره‌وه‌ئه‌م بزاڤه چروپڕه‌ی ئێرانه له‌و دیوی سنووره له‌م چه‌ند رۆژانه‌ی رابردوودا پیاده‌ی كردوون .
رۆژی ١٨ی ئه‌م مانگه سوپا سالاری هێزه چه‌كداره‌كانی ئێران ڕاشكاوانه له لێدوانی دا بۆ ئاژانسی هه‌واڵنێری ته‌سنیمی ئێرانی ده‌ڵێ : -
نابێت ریفراندۆمی ٢٥ی ئه‌یلول ئه‌نجام بدرێت .. ته‌نانه‌ت وشه‌ی موسته‌حیلیشی به‌كار هێناوه.. !!
ئه‌وه‌یان گه‌ر هه‌ڕوگیفی ئاشكراو ، چاوسوركردنه‌وه نه‌بێ ، بێ گومان ده‌ست تێوه‌ردانێكی ڕوون و ڕه‌وانه له‌كاروباری ناخۆی خه‌ڵكی كوردستان و ئاینده‌ی ناوچه‌كه. ئه‌م جۆره لێدوانانه وه‌ك هه‌ر تۆباراكردنێكی سنووره‌كان چۆن لای خه‌ڵكی كوردستان مه‌حكوم كراوه‌و به‌ردوامیش پرۆتستۆ ده‌كرێ ، ئاواش لای ووڵاتانی هاو په‌یمانی شه‌ری تیرۆریزمانی داعش به وردی له‌به‌ر چاو گیراوه‌و ده‌گیرێ .
ئه‌م لێدواوه‌ی محمد باقری سه‌رۆك ئه‌ركانی سوپای ئێران له‌وكاته‌دا بوو ، پاش به‌ئه‌نجام نه‌گه‌یشتنی هه‌موو هه‌وڵه‌سه‌ربازی و سیاسییه‌كان له‌گه‌ڵ هاوتا توركییه‌كه‌ی له‌ئه‌نقه‌ره‌دا له‌رۆژانی ١٦ و ١٧ی ئه‌م مانگه‌دا بۆ رێگری كردن له‌ئه‌نجامدانی ریفراندۆم له‌رۆژی ٢٥ی ئه‌یلول دا .
پێویسته ئێرانی دراوسێی رۆژهه‌ڵاتمان ئه‌وه‌ی له‌به‌ر چاو بێ وێرای رازی نه‌بوون و پێخۆش نه‌بوونی خۆیان و به‌غدا و ئه‌نقه‌ره‌و هه‌ندێ له‌وڵاتانی دیكه‌ش به‌ئه‌نجام دانی پرۆسه‌ی ریفراندۆم له‌كات و ساتی خۆی له٢٥ی ئه‌یلول دا. ئه‌م پرسه چۆن پرسێكی سیاسی و ئیداری ده‌وڵه‌تی یه،، ئاواش پرسێكی نیشتیمانی نه‌ته‌وه‌یی ته‌واوی پێكهاته نه‌ته‌وه‌ییه‌كانی كوردستانه كه‌نایانه‌وێ چیتر له‌گه‌ڵ عێراق دا بژین و سه‌ربه‌خۆ بوون ، ناگۆڕنه‌وه به‌نان و ترسی ژێر ده‌سته‌یی و منه‌تی ئه‌م و ئه‌و.
تاران وه‌ك به‌غدا باش ده‌زانێ و زۆر چاكیش ئه‌و قه‌ناعه‌ته‌ی لا گه‌ڵاله‌بووه كه تاكی كوردستانی ئازاو به‌جه‌رگه.. له‌تێكۆشان مه‌رد و كۆڵنه‌ده‌ره، خاوه‌ن پره‌نسیب و بیرو باوه‌ڕه.. نه ئه‌نفال ، نه جینۆسایدو راگوێزان ، نه كیمیاباران و داعش و ئه‌وانی دیكه‌ش ، نه‌یانتوانی قڕی بكه‌ن و چۆكی پێ داده‌ن و به‌ژێر ده‌سته‌یی و هاووڵاتی پله‌دوو ده‌سته‌مۆی بكه‌ن .
وا ئه‌مرۆ بۆ گه‌یشتن به‌ئامانج رژتر و خورتره، .. ئێستا خۆی یاریزانه و له‌مانۆرو جۆری یارییه‌كان تێده‌گا ، ناو زار ده‌خوێنێته‌وه‌و ئه‌ودویی شاشه‌ی تیفیه‌كان ده‌بینێ.
ئێستا ئێران و تاران له‌خه‌ڵكی دیكه باشتر له‌كورد تێده‌گه‌ن ، ده‌زانن سه‌رده‌م سه‌رده‌می كورده، كوردستانی براوه‌ی شه‌ری گه‌وره‌ترین تیرۆرستی سه‌رده‌م ، شیرینی سه‌ركه‌وتنی ڕاگه‌یاندنی ده‌وڵه‌تی سه‌ربه‌خۆیی خۆیه‌تی ، كه‌ده‌وڵه‌تی ئاشتی و ئازادی و دیموكراسی و پێكه‌وه‌ژیانی پێكهاته‌كانیه‌تی و بۆ ناوچه‌كه‌ش ده‌بێته مۆدێڵێكی سه‌رده‌میانه‌ی ده‌وڵه‌تی فره ئاینیی نه‌ته‌وه‌یی ئاینزای هه‌موو پێكهاته‌كانی كوردستان ، به‌جۆرێ ده‌وڵه‌تانی ده‌رودراوسێ با چه‌ندین ساڵیش بێ ته‌مه‌نی به‌ده‌وڵه‌ت بوونیان ، به‌ڵام كه‌له‌دوای ٢٥ی ئه‌یلول ئاور له‌ده‌وڵه‌تی تازه‌دامه‌زراوی كوردستان ده‌ده‌نه‌وه، له‌بواره‌كانی یاسای نێوده‌وڵه‌تی و پره‌نسیپه‌كانی مافی مرۆڤ و ئایین و پێكهاته‌و سیسته‌می حكومڕانی شه‌رم دایان ده‌گرێ و ته‌ریق ده‌بنه‌وه، چونكه تاكه نه‌ته‌وه‌یه‌ك كه‌كورده له‌نێو هه‌رسێ ده‌وڵه‌تی تاران و به‌غدا و ئه‌نقه‌ره‌دا، سه‌رباری دیمه‌شق ، نمونه‌ی چه‌ساوه‌ترین نه‌ته‌وه‌ی سه‌رگۆی زه‌وین و له‌سای سه‌ری ده‌وڵه‌تمه‌دارییان دایه، رۆژهه‌ڵاتی ناوه‌راست دیموكراسیه‌ت و مافی مرۆڤی تێدا نه‌ك هه‌رپێشێل و له‌نگه ، به‌ڵكو شتێك له نێو قاموسی ژیانی سیاسییان دا بوونی نییه به‌ناوی مافی مرۆڤ و پره‌نسیپه‌كانی پێكه‌وه‌ژیان و هاوبه‌شی راسته‌قینه.
ڕووی ده‌مم له‌تارانه:
به‌رێزان ئێوه كه خانوتان له‌شووشه‌یه:
تكایه چیتر تۆپبارانی حاجی ئۆمه‌ران مه‌كه‌ن .
با دوو دراوسێی باش بین و( شعره‌ی مه‌عاویه)ی نێوانمان له‌به‌ین نه‌چێ .
