لەگەڵ دەست پێکرنی ساڵی نوێ خوێندن با قسە و درووشمەکانمان بکەینە کرداری ڕاستە قینە بەرەوو سەرکەوتن بە پەروەردە و فێرکردنێکی دادپەروەرانە و ڕاشکاوانە:
لەگەڵ دەستپێکردنی ساڵی خوێندنی (٢٠١٧-٢٠١٨) نزیکەی ملیۆنێک و نیو قوتابی ڕوو لە قوتابخانەکانی ھەرێمی کوردستان دەکەن چاوەڕوانی سالێکی خۆش و ئاسودە و سەرکەوتن دەکەن و ئەوەی گرنگە لای قوتابخانەکان بەڕەووی گەش و پەروەردەییانە پێشوازی لە قوتابیانی خۆشەویست بکرێ و قوتابخانەکان ئەوپەری ئامادەسازییان تێدا کرابێت ژوور و پۆڵەکان و تانکی و ئاو و ئاوە رۆکان خاوێن کرابن و لێژنەی پێشوازی لە قوتابخانە لە پێشوازی قوتابیان بێت بە چوکلێت و شیرینی پێشوازی لە قوتابیان بکرێت بە تایبەتی قوتابیانی قۆناخی یەکەمی بنەڕەتی کە تازە دێنە قوتابخانەکان ، ئەوەی گرنگترە دەمەوێ باسی بکەم بەرنامە و ئامادەسازی وەزارەتی پەروەردە و بەرێوەبەرایەتی پەروەردەکانە ، کە وەزارەتی پەروەردە ھەر لە وەرزی ھاوین خەریکی ئامادەکردنی ساڵنامەی پەروەردە بێت بە وەرگرتنی ڕای بەرێوەبەری قوتابخانە و پەروەردەکان و سەرپەرشتیاران و کەسانی شارەزا دواتر لە چەند کۆبوونەوەیەکی ئەنجومەنی وەزارەتی پەروەردە ڕای ڕاوێژکاران و بەرێوەبەرانی گشتی لە سەر بدرێ و ئاگاداربن و دواتریش گۆڕانکاری لە ساڵنامە نەکرێ و گشتاندنی بۆ بکرێ بۆ پەروەردەکان و قوتابخانەکان پێش دەستپێکردنی دەوام.
جودا لەوەش گرنگە لە وەزارەتی پەروەردە گشتاندنی تایبەت بە پێشوازی کردنی قوتابیان و ئامادەکردنی قوتابخانە و مامۆستایان و پاڵپشت بەکۆمەلێ ڕێنمایی وورد ھەبێ بۆ جێ بەجێ کردنی لە سەرجەم دامەزراوە پەروەردەییەکان کە سەرجەم کاراکتەرە پەروەردەییەکان لە خۆ بگرێ و لێژنەی بەردەوام و وورد ھەبێ لە سەر بەدوا داچوون لە جێ بەجێ کردنیان تەنھا ھەر نوسراوێک نەبێ بێ پابەندبوون !
وەپێش دەستپێکردنی ساڵی نوێ خوێندن جەخت لەسەر ئامادەسازی سەرجەم بەرێوەبەرایەتیە تایبەت مەندەکان بکرێتەوە بەتایبەتی دەربارەی پەرتووک و چاپکردن و دابەشکردنی بە سەر قوتابخانەکان تاوەکو قوتابیان بتوانن لە ڕۆژانی ھەفتەی یەکەم سەرجەم پەرتووکەکانیان وەربگرن ، جودا لەوەش وەزارەتی پەروەردە لە کۆنگرەیەکی رۆژنامەوانی پێشدەستپێکردنی ساڵی نوێ خوێندن بە ووردی پەنجە بخاتە سەر سەرجەم ئامادەسازییەکان و زانیارییەکان و کێشەو گرفتەکانی پەروەردە بە گشتی و ڕاشکاوانە و ڕاستە ڕوو باسیان بکات و ھەنگاوەکانی نەخشە رێگای پەروەردە و بەرنامەکان باس بکرێن بۆ کۆمەڵگا ڕوون بکرێتەوە چونکە کۆمەڵگا خاوەنی ڕاستەقینەی پەروەردەیە، دڵنیایی جەماوەر و کۆمەڵگا و قوتابیان و مامۆستایان بکرێتەوە لە سەر پەرۆشی وەزارەتی پەروەردە بۆ پەروەردە و فێرکردن و چەسپاندنی دادپەروەری پەروەردەیی لە ھەموو ڕوویەکەوە، وە گرنگە چەند لێژنەیەکی پەروەردەیی پێک بھێنرێ بۆ بەدواداچوون بۆ سەرجەم کێشەو گرفتە پەروەردەییەکان لە ڕووی دامەزراندنی مامۆستایان بە گرێ بەست و گواستنەوەی مامۆستایان لە سنوری پەروەردەکان و وەرگرتنی قوتابیان و پەرتووک و نۆژەنکردنەوە و سەرجەم کێشە کارگێری و پەروەردەییەکان لە (ئەلف تا یا)، پەروەردەییانە و دادپەروەرانە چارەسەر بکرێن و ئەو لێژنانە لەلایەن کەسانی پەروەردەیی و بە ئەزموون و شارەزا پێک بێت ، لێژنەی بە دەسەڵات و بێ لایەن بن بەڵکو تاکە مەبەست و ئامانج لەم لێژنانە چەسپاندنی دادپەروەری پەروەردەیی و بەرەووپێشبردنی پەروەردە بێت لە ھەموو ڕوویەکەوە، تەنھا لێژنە نەبێت لە پێناو لێژنە و بزرکردن و تەم و مژکردنی کێشە پەروەردەییەکان و ساردکردنەوەی کەسانی پەروەردەیی ، چونکە پەروەردە پرۆسەیەکە پێویستی بە توانا و دڵسۆزی ھەموو لایەک ھەیە .
بەکر کەریم حەسەن
بەرێوەبەری گشتی چاڵاکی وەرزش و ھونەر
ماستەر لە کارگێری پەروەردەیی