زۆر گرنگه‌ شاندی پارت و لایه‌نه‌ سیاسییه‌كانی به‌غدا به‌ ئه‌هلی به‌یت و ئه‌هلی سوونه‌وه‌، هه‌ڵپه‌ی هاتنه‌ هه‌ولێریان هه‌بێ ، له‌ كاتێكدا پرۆسه‌ی سیاسییو دامه‌زراندنی حكومه‌تیتازه‌ له‌ ‌ ووڵاتی به‌ناو عێراقدا كه‌ تێیدا ته‌وافووق و پێكه‌وه‌ ژیانی هاوبه‌شی له‌به‌رده‌م ئاینده‌یه‌كی نادیاره‌ ، ووه‌ك مریشكی له‌ هێلكه‌ چوه‌وه‌ی به‌زۆر هه‌ڵكوڕماوی سه‌ر(هێلكه‌ی دووزه‌ردێنه‌ وڕاوكه بۆ‌دانراو) وایه‌. پرۆسه‌كه‌له‌ به‌غدا له‌ ژووری نه‌شته‌رگه‌رییه‌كه‌یدا‌ دوورنییه‌ به‌(له‌دایك بوونی قه‌یسه‌ری )ودواژان وبه‌ره‌ژانیشوا به‌سانایی له‌ دایك نه‌بێت.
ئێستا كه‌لایه‌نه‌ سیاسییه‌كانی به‌غدا تاك تاك و جووت جووت ، هه‌رچۆنێك بێ و به‌چ ڕێگایێ بێ خۆیان ده‌گه‌یێننه‌ هه‌ولێرو مه‌به‌ستیانه‌ بگه‌نه‌ ( سه‌ربه‌ن – مه‌سیف )یباره‌گای بارزانی وله‌به‌ده‌م به‌رێزیان شه‌رحی حاڵی خۆیان بكه‌ن وداوای چاره‌سه‌رێ بۆ باری سیاسی و پرۆسه‌ چه‌قبه‌ستووه‌كه‌ی عێراق بكه‌ن . ئه‌وه‌ پێگه‌ی كورد و سه‌رۆك بارزانی پێشانی هه‌مووان ده‌دات و ده‌یسه‌لمێنی بێ سه‌رۆك بارزانی ئه‌و قۆناغه‌ ئه‌سته‌مه‌ بێته‌ دی .
ئه‌و چه‌ند دیمه‌نه‌ی شه‌وی هه‌ینی و رۆژی شه‌ممه‌ 6 و 7-7-2018 له‌فرۆكه‌خانه‌ی هه‌ولێر و دواتر له‌ مه‌كته‌بی سیاسیی پارتی دیموكراتی كوردستان بینیمان ، لای من ئه‌م چه‌ند ده‌سته‌واژانه‌ی خواره‌وه‌ن و له‌ مانایێ زیاتر هه‌ڵده‌گرن:
یه‌كه‌م : له‌دوای ئه‌نجامدانی پرۆسه‌ی ڕیفراندۆمی سه‌ربه‌خۆیی كوردستان به‌سه‌ركه‌وتوویی و دوای 16ی ئۆكتۆبه‌ری داگیركردنی كه‌ركووك دا، به‌غدا له‌ترسان و وه‌ك سزادانی به‌كۆمه‌ڵیش ئاسمانی فرۆكه‌خانه‌كانی لێ داخستین و پردی ئاڵتوون كۆپریشی ته‌قانده‌وه‌ . به‌ڵام كوردستان ( جبل الاشم ) خۆی به‌ده‌سته‌وه‌ نه‌دا ونه‌ خاكی ڕاده‌ست كرد، نه‌ ئاسمان .
دووه‌م : پارتی دیموكراتی كوردستان وه‌ك پارت و حزب نه‌ك هه‌ر له‌كوردستان به‌ڵكوله‌ سه‌رئاستی عێراقیش دا وه‌ك یه‌كه‌مین پارته‌، له‌ده‌ره‌وه‌ی هاوپه‌یمانیه‌تی و به‌ته‌نیا زۆرینه‌ی كورسییه‌كانی په‌رله‌مانی عێراقی بردۆته‌وه‌. ئه‌م سه‌ركه‌وتنه‌ به‌ دۆست و نه‌یارانی كوردی سه‌لماند كه‌ ئه‌م پارته‌ وه‌ك چۆن خۆی وه‌ك حزب له‌ ناوچه‌كه‌دا پێشه‌نگی دسپلین و سیسته‌ماتیكی پارتایه‌تی ورێكخراوه‌یی یه‌ ،ئه‌وایش سه‌رۆك وڕابه‌ره‌كه‌ی سه‌رۆك بارزانی ژماره‌یه‌كی گرنگی نێو ژماره‌ مه‌زنه‌كانه و مه‌رجه‌عی باڵای پرسه‌ چاره‌نووسسازه‌كانه‌ و خودانی پرسێكی پیرۆزی نه‌ته‌وه‌كه‌یه‌تی وتێڕوانینیشی بۆپرسه‌كه‌ له‌سه‌رووی به‌رژه‌وه‌ندییه‌ باڵاكانی پله‌و پۆسته‌كانی به‌غدایه‌ و سازشیش هه‌ڵناگرێ .
سێیه‌م : سه‌رۆك بارزانی وه‌ك كه‌سایه‌تییه‌كی كاریگه‌ری نێوبزاڤی رزگاریخوازی له‌ناوچه‌كه‌ هه‌رله‌سه‌رده‌می پۆڵبریمه‌ری حاكمی سیاسی یه‌وه‌ ڕۆڵی كاریگه‌ری خۆی له‌ یرۆسه‌ی سیاسیی و نووسینی ده‌ستووردا بینیوه‌ ، ئه‌و حكومه‌تانه‌ی به‌غداش له‌كاتی دامه‌زراندنیاندا هانایان بۆ به‌رێزییان هێناوه‌ودوای دامه‌زراندنیشیان ،هه‌ركه‌پشتییان له‌ هه‌ولێركردووه‌و به‌ره‌وبه‌غدا شۆڕبوونه‌ته‌وه‌ ، به‌داخه‌وه‌ پشتییان له‌ بارزانی وبه‌ڵێن ورێككه‌وتنه‌كانیان.. پشتییان له‌ ( ته‌وافق وپێكه‌وه‌ژیانی هاوبه‌ش و هاوسه‌نگی ) سیاسیی كردۆته‌وه‌ .
نه‌ك هه‌ر ئه‌وه‌نده‌ش به‌ڵكو بڕینی بوودجه‌و مووچه‌ وگه‌مارۆی ئابووری وده‌ست به‌سه‌رداگرتنی چه‌ك و تفاقی جه‌نگی پێشمه‌رگه‌و هه‌ر له‌دوای كشانه‌وه‌ی سوپای ئه‌مریكا له‌ناوچه‌ كه‌و یاریكردن به‌ مووچه‌و بوودجه‌ی پێشمه‌رگه‌ و هێڕشی سوپا وپه‌لاماردان ، سزادانی به‌كۆمه‌ڵ و چه‌ندین ره‌فتارێكی دیكه‌ی به‌غدا.. ئه‌وه‌ حكومه‌ته‌ یه‌ك له‌دوایه‌كه‌كانی به‌غدابوونه‌ كه‌ به‌هه‌وڵ و كۆششی كورد و سه‌رۆك بارزانی دامه‌زراوون وئه‌و نه‌هامه‌تی و قه‌یرانانه‌یان بۆ حكومه‌تی هه‌رێمی كوردستان و خه‌ڵكه‌ خۆڕاگره‌كه‌ی درووست كردووه‌ و مه‌به‌ستیش له‌درووستكردنییان ڕوونه‌ كه‌ بۆچی و له‌پای چی دابووه‌ .
چواره‌م : دڵنیاین سه‌رۆك بارزانی ئه‌م واقیعه‌ تاڵه‌ی دوێنێی له‌به‌رچاوه‌ به‌ ووردیش بیر له‌ ئه‌و دیفاكۆتۆیانه‌ ده‌كاته‌وه‌ كه‌دێنه‌ پێش .
هه‌ڵگه‌ڕانه‌وه‌ وبادانه‌وه‌ش له‌كاری سیاسییدا كاتێ سه‌رهه‌ڵده‌ده‌ن كه‌،ده‌بنه‌ گرفت ومۆڕاڵ . جا مه‌ترسییه‌كان لێره‌دا چه‌كه‌ره‌ده‌كه‌نه‌وه‌ وئه‌وا( به‌غدای خاتوو حه‌لیمه‌ بگه‌ڕێته‌وه‌ سه‌رعاداتی قه‌دیمه‌ ..) و ئێمه‌ی مارانگه‌سته‌ی ده‌ستی خاتووحه‌لیمه‌ش ده‌بێ ئه‌وجاره‌یان وشیارترو وریاتر بیین ،تا كه‌نارگیر نه‌كرێین ، پێوسته‌ گرفته‌ ناوخۆییه‌كان وه‌لانێین ، به‌یه‌كده‌ستی و یه‌كگرتوویی پشتیوانی سه‌رۆك بارزانی بین .