لە کوردستان لەدواى راپەرینى مەزنى گەلەکەمان ، ئازادى سیاسی وەک ئەرکێکى نیشتیمانى بەرقەرارە و دەبێ بەردەوام و پارێزراوبێت ، کارێکى نابەجێ و نەنگییە بەهۆى کارى حزبییەوە لە هەر ناوچەیکى کوردستاندا بێت خەڵک ڕووبەڕووى گرتن و راوەدونان بێت ، چونکە کوردستان موڵک وتاپوى خەڵکى کوردستانە نەک کەس و لایەنە سیاسییەکان ؟؟ دەستخوشی لە بەرێز کاک نێچیرفان بارزانى دەکەم سەرۆکى حکومەتى هەرێم وەک بەرپرسیارێتى و ئەرکێکى نیشتیمانى هەڵوێستى نواندو بە بریارێکى ڕوون کادیرانى هەر دوو حزب ئازادکران . ئومێدەوارم ئەم رەفتارە ناتەندروستە دووبارەنەبێتەوە . هەروەها ناکرێ و ناجورە هەر کاتێک ڕوودانێک بێتە پێشەوە ، هەندی بەرپرس بە بێ هەستى بەرپرسیارى قەوانەى قێزەوەنى (دووئیدارەییى) بژەنێننەوە ، هەر کەس و لایەنێک بیر لەو هەنگاوە نانیشتیمانییە بکات، بەرنەفرەتى گەل و مێژوو دەکەوێت .
لە پێناوى سەقامگیرى سیاسی ، ئابورى و کومەڵایەتى و، ئەرکى نیشتیمانى وا پیویست دەکات ، لایەنە براوەکانى هەلبژاردن بابەتیانە بیربکەنەوەو خواست و پێداویستى خزمەتگوزارى کومەڵگا رەچاوبکەن ، بەواتایەکى دیکە : پێش ئەوەى هەولى بەدەستهینانى پلەو پوست بدەن بیر لە بەرنامەیەکى گونجاوى خزمەتگوزاربکەنەوە ، هەروەها بۆ ئەوەى راستگوبین لە گەل خومان و دەنگدەرانمان ، پێویستە رێز لە بنەما دیموکراتییەکان بگرین و هەر لایەنێکى سیاسی بە بەرکەوتى خۆى لە دەستهەلاتدا بەپێی دەنگە پێدراوەکانى رازیبێت و هاوکارى بنوێنێت تا روژێک نزیکتر کابینەى نوێی حکومەت دەست بەکارببێت ، بە بوچونى من (پێگەى) هەر لایەنێکى سیاسی بریتییە لە و قەبارەیەو رێژەى دەنگانەى خەلک لە پروسەى هەلبژاردندا پێی دەبەخشن .
عارف روشدی*
