لەم رۆژانەدا هەموو ڕاگەیاندنی ئەڵمانیایی سەرقاڵن بەو لێدوانە وروژێنەرو پڕ تانووتانەی لە لایەن ئەندامی پارتی سۆسیالیستی دیموكراتی ئەڵمانی و وەزیری پێشووی حكومەتی بەرلینی سۆسیالیستی دیموكراتی و ئەندام لە ئەنجوومەنی سەرۆكایەتی بانكی فیدراڵی (دكتۆر تیلۆ ساراتسین)ەوە دژ بە موسڵمانانی نیشتەجێی ئەڵمانیاو ئەوروپا داویەتی، ئەمەش وەك پڕوپاگەندەیەك بۆ كتێبێكی بە ناوی (( ئەڵەمانیا بە دەستی خۆی بوونی خۆی ناهێڵێت))كە لەم دواییانەدا بە چاپی گەیاند ..
ناوەڕۆك و لێدوانەكانی كتێبەكە رۆحێكی دوژمنكارانەی پەڕگیرانەی دژ بە موسڵمانانی نیشتەجێی ئەڵمانیاو ئەوروپا بەرجەستە دەكاتەوە و ئەو تیۆرە راسیزمی و بازاڕیانەی نازییەكانی ساڵانی 1933ــ1945وەیادی خوێنەرانی دێنێتەوە كە ئێستاش لە لایەن نازییە تازەكان و راستڕەوانی پەڕگیرەوە كاری پێدەكەن ..بەو شێوەیە رۆحی تۆڵە و دوژمنایەتی لە ناو كۆمەڵگەی ئەڵمانیدا دەچێنێت كەئەمەش پێچەوانەی پلۆرالیزمی وپێكەوەیی كۆمەڵگەیی فرە كەلتوورە ..
حوكمدانی توندڕەوانە دژ بە موسڵمانان
ساراتسین بە ئاشكرا ئەم شتانە رادەگەیەنێت :
1ــ موسڵمانانی ئەڵمانیاو ئەوروپا ناتوانن لەگەڵ كۆمەڵگەی ئەڵمانیدا خۆبگونجێنن وئامادەگییان تێدا نییە بۆ ئاوێزان و تواندنەوە لە ناو كۆمەڵگەو كولتووری ئەڵمانی و بەهۆی كەڵچەری موسڵمانێتییانەوە خۆیان پێ ساز نادرێت .
2ــ هەوڵنادەن زمانی ئەڵمانیایی فێربن، ئافرەتانیان پەچەپۆشن و لەگەڵ كەڵچەری ئەڵمانیدا هاوكوف نابنەوەو تەنیا كار و خەمیان خستنەوەی كیژانی سەربە ڕەفتەیە ..
3ــ ئەڵمانیاو وڵاتانی ئەوروپایی پشتیان بە سیكولاریزمی و دیموكراتیەت بەستووەو رێز لە مرۆڤ دەگرن بەڵام لە كەڵچەری موسڵماناندا ئەم بڕوایانە رەت دەكرێنەوەو كاری پێناكەن
4ــ بەسەر ئابووری و خەزێنەی ئەڵمانیاوە بارگرانین و بەكارهێنەری بەشێكی زۆری دەخلی نەتەوەیین . %40یان بەسەر بیمەو سۆسیالەوە دەژین، لەوەی بەرهەمی دێنن. زیاتر دەخۆن
5ــ بە چڕی مناڵ دەخەنەوە و پارەی ئەستوور بە دەوڵەت بەردەدەنەوە، لە دوای هەشتا ساڵیتر دیموگرافیای دانیشتووانی ئەڵمانیا دەگۆڕن، رێژەی مناڵبوون لە ناو تورك و عەرەبان و موسڵمانانی تردا دوو هێندەی رێژەی مناڵبوونی ئەڵمانیاییە ..
6ــ بە پێی كەڵچەری موسڵمانان مرۆڤ تەوەزەل دەبێت حەز بە كارو كاسپی و جدییەت ناكات ..
7ــبەهۆی پەڕگیرێتی لە كەڵچەریاندا زیان دەگەیەنن بە كەڵچەری ئەڵمانیایی بۆیە پێویستە ئەڵمانیایان لێ رزگاربكرێت .
8 ــ ساراتسین جەخت دەكاتە سەر ئەوەی كە نایەوێت وەچەكانی داهاتووی خۆی لەناو وڵاتێكدا پەروەردەبن كە زۆرینەی ڕەها تێیدا بە زاری عارەبی و توركی و زارەكانی تری موسڵمانان دەئاخڤن ..
بە ئاكامگەیشتنە رەگەزپەرستیەكانی ساراتسین
بە پشتبەستنی بەو دیاردە ئینتیقائیانەی كە موسڵمانان تێیدا هاوبەشن ساراتسین بەم ئاكامانە گەیشتووە :
** كۆمەڵێ جین هەن كە جوولەكە تێیدا هاوبەشن، هەروەها خەڵكی باسك لە ئیسپانیا جینی هاوبەشیان هەیە و ئەم حاڵەتە لەناو موسڵمانانیشدا بوونی هەیە بەم شێوەیە ساراتسین بابەتەكەی بەرفراوانتركردۆتەوە بۆ بەراوردكاری وبەئاشكرا لە نموونە هێنانەوەكانیدا دەیسەلمێنێت كە سەر بەگرووپەكانی دژ بە سامییەكانە و ڕقی لە موسڵمانانی نیشتەجێی ئەوروپا دەبێتەوە .
** لە رووی جیناتەوە گەلانێكی بێمێشك و گەلانی زیرەك هەن، گەلانی دەبەنگ ناتوانن خۆیان بگۆڕن و ئەم زەغەلایەتییە بە پشتاوپشت لە نەوە بۆ نەوە لەڕێی نەسلەوە دەگوازرێتەوە.
**جیاوازی بیۆلۆژی لە نێوان توێژەكانی مرۆڤایەتیدا لەرێی ئاستی بەرزی و نزمی زیرەكییەوە هەن .
** ئەو موسڵمانانەی لە وڵاتانی عارەبی و توركیا و شوێنانی ترەوە دێنە ئەوروپاوە هەموویان تەمەڵ و بێمێشكن ..
** هاندانی خستنەوەی منداڵ لە ناو خانەوادە ئاست بەرزەكاندا لە رووی كۆمەڵایەتییەوە ئەركێكی پێویستەو بەڵام پێویستە لەناو خانەوادە ئاست نزمەكاندا كۆنترۆڵ بكرێن ..
ئەم ڕوانینە ڕەگەزپەرستییە بازاڕییە نازانستییە هاوواتایە بە روانینی كەسانی رەگەزپەرست كە ئیدیۆلۆژییەكەیان لە سەدەی هەژدەیەمەوە تەشەنەی سەند و دواتر لە سەدەی19 و ناوەندی 20 خەست كرایەوە و لە لایەن نازییەكانەوە عارەبان و جولەكەو رەشپێستەكان خزێنرانە ناو لیستی پلە نزمەكانی مرۆڤایەتییەوە .
ئێستاش گرووپی رێكخراو هەن لە ئەوروپا بەو شێوازە بیركردنەوەیەی جارانەوە سەرسامن ..
راسیزمی و رەگەزپەرستێتی چین؟؟
زاراوەیەكی تازەن بە نیسبەت دیاردە كۆمەڵایەتی و سیاسی و ئابووری و كەڵچەرییەكانی كۆنەوە، لەو بڕوایە هەڵەیەوە سەرچاوە دەكرێت كە مرۆڤایەتی دابەش دەبێت بەسەر سێ گروپ بریتین لە رەگەزی سپی و زەردو رەگەزی رەش، دواتر دابەشیان كردە سەر پێنج گروپ یان هەندێك جار حەوت گروپی گەورەو بچووك لەوانە رەگەزەكانی ئاری و سامی و حامی، بیرمەندانی ئەم تیۆرە هەڵانە جیاوازی بیۆلۆژیان كردۆتە بنەما بۆ دابەشكردنی رەگەزەكان لەڕێی پشت بەستن بەجیناتی بۆماوەیی لەنێوان هۆزە هەمەجۆرەكاندا، ئەمەش لەدوو لایەنەوە گوزارشتی لێدەكرێت :
1- جیاوازی لە روخساری دەرەوەی مرۆڤ وەك رەنگی پێست و شێوازی كەللەی سەروو رەنگی چاوو پرچ.
2- جیاوازی لە بونیادی بیۆلۆژی مرۆڤ كە لە هەندێك بنەمای جێگیردا دەردەكەوێت و لەمرۆڤدا زەحمەتە گۆڕانیان بەسەربێت لەوانە توانای ژیری و زەینی تاكەكەس چ لە زیرەكیدا یا لە بەهرەو رۆشنبیریەكەیدا، سیمای هەمەجۆر لەم خاڵەی دواییدا دروست دەبێت بەتایبەتی لەپێوەندییە كۆمەڵایەتی و رەوشتی و سۆزداری و هەڵوێستەكان بەگشتی.
لەم جیاوازییانەوە (كە رەگەزپەرستەكان دەستنیشانی دەكەن))جیاوازی لەبەهای راستەقینەی گرووپە مرۆییەكاندا دروست دەبێت، لەو كاتەدا كە رەگەزێكی باڵا بەئاستێكی پێشكەوتوو لەتوانای فیكرو رۆشنبیری و وزەدا دیاری دەكەن لەپاڵیدا چەندین رەگەزی ئاست نزمی لاواز لەپەرەسەندن و دیاریكراو لە توانای زەینی و فیكری و رۆشنبیری و رەفتاریدا و هەروەها كوێرانە لەبەكارهێنانی سۆزو زەین و بیركردنەوەدا دیاری دەكەن، ئەم جیاوازییە سروشتی و هەمیشەییە لەنێوان رەگەزەكاندا رۆڵی خۆی دەبینێت لەجیاوازی حاڵەتی كۆمەڵایەتی و سیاسی و ئابووری و رۆشنبیریدا واتا سەروەری رەگەزێكی باشتر و باڵاتر فەرز دەكات بەسەر رەگەزە ئاست نزمەكاندا.
لەم چەمكەوە هیتلەر مرۆڤایەتی دابەشكردە سەر سێ گرووپ،
یەكەم :رەگەزی داهێنەرو دامەزرێنەری شارستانییەت و كاڵچەری جیهانی.
دووەم : رەگەزی تووتی و گوازەرەوەی بەرهەمەكانی شارستانییەتەكانی دیكە
سێیەم : رەگەزی بەكارهێنەرو تێكدەری شارستانییەتەكان.
جەماوەرێكی بەرفراوانی میللەتان لەوانە میللەتانی خۆرهەڵاتی ناوەند بەگەلانی بەكارهێنەرو وێرانكەری شارستانییەت دادەنێت كە هیچ سوودێكیان بۆ مرۆڤایەتی نییە.
ئەم رێبازە فیكرییانەی كە ساراتسین لەسەریان رادەوەستێت دوژمنایەتی بەرامبەر عەرەب و تورك و كوردو ئەفغان و پاكستانییەكان وروژاندووە، هەروەها جولەكەكانیش هەموویان بە مەترسی دادەنێت بۆ سەر رەگەزی ئەڵمانی كە بە زیرەكترو باڵاتر دەیانژمێرێت..
ساراتسین پێشنیازی چی كردووە
دوژمنایەتی موسڵمانان لەم پێشنیازانەدا خۆی دەبینێتەوە:
1- راگرتنی خێرای وەرگرتنی پەناهەندەو ئەو بێگانانەی لە وڵاتانی ئیسلامییەوە دێنە وڵاتانی ئەڵمانیاو ئەوروپا.
2- بێزاركردن و دەرپەڕاندنی پەناهەندە ئیسلامییەكانی ئەوروپا بەتایبەت ئەوانەی سەرپێچی یاسایی لەناو كۆمەڵگای ئەڵمانیدا دەكەن .
3- كەمكردنەوەی سۆشیال و هاوكاری كۆمەڵایەتی كە دەوڵەتانی ئەوروپا بەبێگانەكانی دەدەن و رۆژانە لە 4- 5 یۆرۆ تێناپەڕێت، ئەو رێژەیەش تەنیا بەشی دووژەم نانخواردنی رۆژانەیان دەكات.
4- كەمكردنەوەی دەرفەتی كاركردن لە موسڵمانەكان و رەخساندنی كار بەپارەی زیاتر بۆ ئەڵمانییەكان.
5- وروژاندنی رق و ترس لەبەرانبەر موسڵمانانی ئەڵمانیا بەتایبەت ئەوانەی كە رەگەزنامەی ئەڵمانی لە رەچەڵەكی كوردی و عەرەبی و پاكستانی و ئەفغانین بەبێ جیاوازی .
6- تیۆرەكەی لەخاڵێكی زۆر سامناك و وروژاو كۆ دەكاتەوە لە بیروڕای نەتەوەییە پەڕگیرەكانی ئەڵمانیا و بەتایبەت لە پشتبەستنی بەو وتارەی كە لە رۆژنامەی حورییەتی توركی بڵاو بۆتەوەو تێیدا هاتووە : ( ئەو دەستكەوتانەی سلێمانی قانوونی لەكاتی گەمارۆدانی ڤیەننا پێی رانەگەیشت توركەكانی ئەمڕۆ لە رێی زۆر وەچە خستنەوە دەتوانن تۆپۆگرافیای دانیشتووان لە ئەڵمانیا لەبەرژەوەندی خۆیاندا بگۆڕن .)
7- گەورەترین هەڵە كە ساراتسین گشتگیری كردووە ئەو دیاردە سلبیانەیە كە لە رەفتاری هەندێك موسڵمانی تووندڕەودا دەبینرێت ئەم دێت دەیكاتە خەسڵەتێكی گشتی بۆ هەمووان .
8- ساراتسین پشت دەبەستێت بەهەندێك ئاماری هەڵە و تیۆری بازاڕی و بەتایبەت ئاكامەكانی داروین و تیورەكانی جینالۆژی ئەو تێورە زانستییە تازانەی دوای ئەمانە دەرچوون پشت گوێ دەخات، لە زۆربەی بابەتەكانیدا وشەی فۆبیای ئیسلام بەكاردەهێنێت رەگەزپەرستەكانی ئەڵمانیای لێهان دەدات بەناوی بەرگریكردن لەكەلچەری ئەڵمانی ئازار بەموسڵمانان بگەیەنن.
بیرۆكە راستەكان لەفیكری ساراتسین
هەندێك خەسڵەتی راستەقینە لەناو تیۆرەكەی ساراتسین هەیە كە لەسەر ژمارەیەكی كەمی ئەو موسڵمانانە دەچەسپێت كە بەهۆی جەنگی نێوخۆو ژینگەو ئاستی نزمی كەلچەری وڵاتەكانیان كەوتوونەتە ئەڵمانیا، لەوانە دەركەوتنی تووندوتیژی و پەچەی ئافرەتان و ئەنجامدانی تاوانی نامووس یا ڕاكردنی موسڵمانان لەكاری یاسایی و هاوبەشیكردنیان لەگەڵ گرووپەكانی مادە بێهۆشكارەكان كە ئەمەش لەبەرامبەر هەندێك پەناهەندە راست دەردەچێت بەڵام گرفتەكە لەوەدایە كە رەگەزپەرستانە گشتاندنی بۆ بكرێت لەكاتێكدا دەكرێت چارەسەری بابەتیانەیان بۆ بدۆزرێنەوە بۆنموونە وەزیری دارایی لەحكومەتی هاوپەیمانی چەپ و سۆشیال دیموكراتەكاندا نەیهێشت پارەی پێویست تەرخان بكرێت بۆ پرۆسەكانی تێكەڵكردنی موسڵمانان بە كۆمەڵگای ئەڵمانی، ئەمەش بووە هۆی تووڕەبوونی زۆربەی پارتە سیاسییەكانی ئەڵمانیا بەتایبەت پارتی دیموكراتی مەسیحی و دیموكراتی ئازادو چەپی ئەڵمانی و هەروەها ئەنجیلا میركڵ راوێژكاری ئەلمانیا هەروەها سیگمار گابریل كە لەپارتی سۆشیالیستی دیموكراتە دواتر دوای ئەوەی سووكایەتی راستەوخۆی بەژمارەیەكی موسڵمانانی ئەڵمانیا كرد یاداشتێكی ئاگادارییان پێگەیاند لێدوانەكانی گابیریڵ لە لایەن راستڕەوە ئەڵمانییەكان پشتگیری لێنەكرا بەپێی ئەو ریفراندۆمەی دەزگای ئیمنیت دەركەوت كە لە 51%ی ئەڵمانییەكان هاوسۆزن لەگەڵیدا لە كاتێكدا لە 39%یان دژ بەو تۆمەتانە بوون كە ئاراستەی موسڵمانانی ئەڵمانیا كرابوون هەروەها لە 69%ی ئەڵمانییەكان وروژاندنی گرفتەكە بەباش دەزانن و لە 22%یان پێیان وابوو دەمی داخستایە باشتربوو.
راگەیاندنی دیموكراتەكان فیكرو سیاسەتی ساراتسینیان ریسواكردوو لەخانەی نازییە تازەكان ئەژماریان كرد، چونكە ئەم فیكرە پێشوەختە تاوانباركردنی تێدایە بەرامبەر بێگانەكان و ناهێڵێت بەئارامی ژیان لەناو كۆمەڵگای ئەڵمانیدا ببرێتە سەر، بێگومان هەندێك لە موسڵمانان فێری ڕێزگرتنی هیچ جۆرێك كەڵچەر نەكراون نازانێن یاسا چییە ؟ لەناو گرووپی سەیرو هەمەجۆردا سرووتەكانیان جێبەجێ دەكەن كە بەلای كۆمەڵگای ئەڵمانییەوە شوورەییە بەڵام ئەم دیاردە سلبیانە سنووردارن و تەنیاش لەناو عەرەب و توركەكاندا نین، بەڵكو هەندێكیان كاردانەوەی چەند كارێكی سەیروسەمەرەی ناوەندەكانی ئەڵمانی و ئەوروپین.
ساراتسین تووشی ئیسلام فۆبیا بووەوە ئەم فۆبیایەی خۆشی لەناو هەموو ئەڵمانییەكان بڵاو كردۆتەوە، لەسەرتاسەری ئەڵمانیا دژ بەم لێدوانانەی بەرلەوەی كتێبەكەی بكەوێتە بازاڕەوە چەندین مانگرتن رێكخرا تەنانەت هەندێك لەئەڵمانییەكان داوا دەكەن لەپارتی سۆشیالیستی ئەڵمانی دەربكرێت، بەڵام لەبەرامبەردا گرووپە نازییەتازەكان و راستڕەوە پەڕگیرەكان مانگرتنی بەرفراوانتریان سازكرد بۆ پشتگیریكردن لەفیكرەكانی ساراتسین كە فیكرەكانی هیتلەرو غۆبڵس زیندوو دەكاتەوە..
ئێمەش لە وڵاتانی عەرەبی و خۆرهەڵاتی ناوەراست رووبەرووی چەندین هێزی شۆڤێنی و رەگەزپەرست دەبینەوە كە كارەسات بۆ خەڵكی بەدیاری دەهێنن، لەعێراقدا لە ئاكامی كرداری تەعریبی زۆردارەكی و دەركردنی خەڵك لەسەر ماڵ و حاڵی خۆیان لەلایەن بەعسییەكانەوە و قەتڵوعام بە هۆی نەتەوەیی بوونەوە كرایە نەریتێكی خراپ، كاتێك سەدام حوسێن حوكمی رەهای كردە دەست چەندین تاوانی جینۆسایدی دژ بەگەلی كورد ئەنجامدا كە هەموو مرۆڤایەتی ئەم كارە شۆفێنانەیان پێ شەرمەزارییە بۆیە عێراقییەكان تاڵاوی ئەمجۆرە كردارانە دەزانن كە وەك تاڵاوی ژەهرە، ئەی باشە كرداری وا لەسەدەی بیست و یەك و لەوڵاتێكی پێشكەوتووی وەك ئەڵمانیادا دەبێت چ پاساوێكی لەپشتەوە بێت تەنیا ئەوە نەبێت مێژووی ئەڵمانیای هیتلەری رەش و كوشتنی چل ملیۆن مرۆڤی لەناو ئۆردوگا نازییەكان لێكەوتەوە.
ئەوروپییەكان پێكڕا پێویستە هەوڵی خۆیان بخەنەگەڕ تا بوار نەدەن كەسانی وەك ساراتسین ببنە كاریزماو بەسۆزدارییانە و كوێرانە كار لەخەڵكی سادەو رەشۆكی ناو گەلانی ئەوروپا و ئەڵمانیا نەكەن.