سیما تەكیەخام بۆ گوڵان: منداڵان داهاتووی نیشتمانن پێویستە گرنگیی زیاتریان پێ بدرێت لە هونەردا

سیما دەربارەی ڕەوشی هونەری كوردی دەڵێت: «بە هۆی كاریگەریی هەر پارچەیەك بە كەلتورێكی جیاوازەوە، پێشكەوتنی هەر پارچەیەكی كوردستان جیاوازە لەگەڵ پارچەكانی دیكە، بەپێی بارودۆخی هەر پارچەیەك، لە كۆمەڵگای كوردیدا زۆر باس لە گرنگیی هونەر دەكرێت، بەڵام زۆر باس لە ئاستەنگەكانی بەردەم هونەرمەندان ناكرێت، ئایا هونەرمەندان چۆن ژیانی ئاسایی خۆیان دەگوزەرێنن، بەرهەمەكانیان چۆن بڵاو دەكەنەوە، بۆیە پێویستە ماندووبوون و كۆڵنەدانی هونەرمەندان لەبەرچاو بگیرێت، چونكە سەرەڕای ئاستەنگەكان بەردەوامن لە كارەكانیان، هیوادارم بتوانین ئەم هونەرە بە نەوەكانی داهاتوومان بناسێنین».
سەبارەت بە فۆلكلۆری كوردیش سیما بۆ گۆڤاری گوڵان گوتی: «بنكەی ئەو هونەرەی من كاری لەسەر دەكەم،بریتییە لە فۆلكلۆری كوردی، كە سەرچاوەیەكی سەرەكی و گرنگی هونەری كوردییە، ئێمەی كورد خاوەن فۆلكلۆرێكی دەوڵەمەندین و، پێویستە هونەرمەندان سوود لەو دەوڵەمەندییە وەربگرن و پشتگوێی نەخەن، بەڵام ئەگەر تەنیا پشت بە فۆلكلۆر ببەسترێت و بەكاری بهێنن و هیچ ئیزافەیەكی نەخەنە سەر، ئەوا دوای ماوەیەك دەشێوێندرێت، چونكە بە سەدان هونەرمەند هەیە كە یەك گۆرانییان دووبارە كردووەتەوە و، هەر یەكێكیش گۆڕانكارییەكی تێدا كردووە و ئەو ئامێرانەی كە تێیدا بەكار هاتوون جیاواز و پێشكەوتووترن، تەنانەت تێڕوانینی جەماوەریش بۆ گۆرانییە فۆلكلۆرییەكان گۆڕانكاریی بەسەر دا دێت.»
سیما تەكیەخام دواتر تیشكی خستە سەر پێگەی ئافرەت لە بواری هونەریدا و لەو بارەیەوە گوتی: «سەرەڕای ئاستەنگەكانی بەردەمی، بەڵام ئافرەتی كورد توانیویەتی بەردەوام لە بواری هونەری كوردیدا پێگەی هەبێت، گرفتەكان پەیوەندییان بە كۆمەڵگەی كوردییەوە هەیە، كە ئەمەش وای كردووە ئافرەت بە دوودڵییەوە بێتە نێو هونەرەوە، بۆیە پێویستە ئافرەتانی هونەرمەندی كورد كۆڵ نەدەن و بە ڕێگەی هونەرەكەی دەنگی خۆیان بگەیەنن وەك ئافرەتێك، لە هەمان كاتدا خزمەتیش بە هونەری كوردی بگەیەنێت، من خۆم سوودی زۆرم لە ئەزموونی خانمە هونەرمەندان وەرگرتووە و بەردەوام گوێ لە گۆرانییەكانیان دەگرم بەتایبەتی مەریەم خان، ئایشەشان، مەرزییە فەریقی، لەیلا فەریقی و چەندین خانمە هونەرمەندی دیكە.