لە ئەنجامی ئاگرکەوتنەوە لە کەمپی پەنابەرانی ڕۆهینگیا لە ناوچەی کۆکس بازاڕ لە بەنگلادیش، ١٠٤٠ خێمە بوون بە خۆڵەمێش.

ئاتیش چاکما، جێگری بەرپرسی بەشی ئاگرکوژێنەوەی کۆکس بازاڕ، لە چاوپێکەوتنێکدا ڕایگەیاند: کە تیمی ئاگرکوژێنەوە ڕەوانەی ناوچەی ٨ کراون و هیچ زیانێکی گیانی نەبووە.

محەممەد ڕەزوان خان، موسڵمانێکی ڕۆهینگیا کە کەسوکارەکەی بەهۆی ئاگرەکەوە زیانیان بەرکەوتووە، گوتی: سەرەتا راگەیەندرا، کە زیاتر لە هەزار و ٢٠٠ خێمە سووتاوە و نزیکەی 6 هەزار پەنابەریش بێ ماڵ و حاڵ بوون.

ناوبراوهۆکاری ئەم ڕووداوەی بە تێکدەر وەسف کرد و ئاماژەی بەوەشکرد، کە بەشێک لە گروپە یاخیبووەکانی میانمار هەوڵی دامەزراندنی دەسەڵات دەدەن لە کەمپەکانی پەنابەران.

هەروەها سەمسوود دۆزا، جێگری کۆمیساری فریاگوزاری و گەڕانەوەی ئاوارەکان ڕایگەیاند، شوێنی ڕووداوەکەیان پشکنیوە و کار لەسەر دابینکردنی شوێنی حەوانەوە و خواردن و جلوبەرگ بۆ ئاوارەکان دەکەن.

 

 

 

گوڵان: سەردار خەلیل