Serok Barzanî pêşwaziya Lijneya Şehîd û Qurbanî û Zindaniyên Siyasî ya Civata Nûnerên Îraq dike û pê re danûstandinan li ser hin mijaran dike.

Serok Mesûd Barzanî îro (Duşem, 06.05.2024) li Pîrmamê pêşwaziya Lijneya Şehîd û Qurbanî û Zindaniyên Siyasî ya Civata Nûnerên Îraqê kir.

Di wê hevdîtinê de, her du aliyan bi merema zêdetir xizmetkirina kesûkarên şehîd û enfalkirî û zirardîtiyên destê rijêma berê Îraqê dîtin û nerînên xwe li ser pêşxistina hevahengiya navbera Herêma Kurdistanê û Hikûmeta Îraqê li hev guhertin.

Serok Barzanî di wê hevdîtinê de amaje da tawanên rijêma berê ya Îraqê li beranberî gelê Kurdistanê û pêdivî dît ku Hikûmeta Îraqê bi giringî ve doza qurbaniyên destê rijêma berê ya Îraqê bike serpişk û bi awayekî hejî û dadperwerane hemî kesûkarên şehîd û enfalkirî û zirardîtiyên destê wê rijêmê qerebû bike.

Her di wê hevdîtinê de serok û endamên Lijneya Şehîd û Qurbanî û Zindaniyên Siyasî ya Civata Nûnerên Îraqê kurtiyek ji kar û piroje û armancên serdana xwe ji bo Herêma Kurdistanê û hevahengiya bi Hikûmeta Herêma Kurdistanê re berçav kir.