هاوسەرگیری پرۆسەیەكی هێندە هەستیارە جگە لە غەریزەی خۆشەویستی و پێكەوە ژیان نابێ هیچ پاڵنەر و مەبەستێكی دیكەی لە پشتەوە بێ، هەر پیاوێك گەر ژنێكی جوانتر یان دەوڵەمەندتری لە ژنەكەی خۆی بینی و حەزی كرد ئەویش داگیربكات و بیكاتە هاوسەری خۆی، ئەوە پێی ناگوترێ ژن و مێردایەتی بەڵكو دەچێتە خانەی بازرگانیكردن و بەمجۆرە كۆمەڵگە تووشی هەڵوەشان و لێك ترازان دەبێ.

رووبەڕوو لەگەڵ دادوەردا
(ئەسرین و گۆران) دوور بە دووری لە رارەوەكەدا راوەستابوون ، چاوەڕێی بانگ كردن بوون كە بچنە ژوورەوە بۆ هۆڵی دادگا،(ئەسرین) لە ژێرەوە بە تیلەی چاو، بەداخ و كەسەرەوە سەیری (گۆران)ی دەكرد و لێوی خۆی دەكرۆژت، خەریكبوو شریتی ساڵانی پێش مێردكردنی بێنێتەوە یاد كە چۆن شەوو رۆژ(گۆران) لە پەیمانگا بە دەوروی دەسووڕایەوە و مەمنوونی ئەو دنیایە بوو كە نەك هەر سڵاوێكی لێبكات، بەڵكو وەڵامی سڵاوەكەی(گۆران)یش بداتەوە، (ئەسرین) دەیویست باری خەمەكانی سەرشانی تۆزێك كەم بكاتەوە بەهێنانەوەی ئەو ساتانەی كە(گۆران) مەرایی بۆ دەكرد و ئامادەبوو هەر شتێكی بكردایە تەنیا دڵی(ئەسرین) بۆ لای خۆی كێش بكات، بەڵام دەرگاوانەكەی هۆڵی دادگا بەبانگكردنی ناوی هەردووكیان، زنجیرەی خەیاڵی پساند و نەیهێشت فلیمەكەی خەیاڵی هەمووی لێبدرێت و رۆژانی شكۆداری خۆی و (گۆران) بێنێتەوە بەرچاوی، هەردووكیان بەدەنگ بانگەوازەكە چوون و یەكسەر ملی ژووری دادگایان گرتەبەر.
دادوەر لەناو و پیشە و ناونیشان و هەندێ زانیاری تری پرسی، كە لێیان دڵنیابوو، ناسنامەكەی لێوەرگرتن و فەرمانی كرد كە زانیارییەكانی ناو ناسنامەكەی لە كوونووسی دادبینییەكەدا بنووسرێ، ئینجا دانیشتنەكەی دەستپێكرد و بە(ئەسرین)ی گوت: (گۆران)ی مێردت داوای لەسەر تۆماركردووی كە تۆ زیز بوویت و چەندین جار داواشی لێكردووی نەگەڕاویتەوە، ئەو مێردتە و ئەگەر پێی رازی پێویستە بچیتەوە لای، ئەگەر نا دەبێ بۆ دادگای روونبكەیتەوە كە بۆ ناچییە لای، ئایا بڕیارت داوە هەر بەیەكجاری نەچییەوە؟ ، ئەگەر وەڵامت بەبەڵێیە هۆیەكەی چییە..؟(ئەسرین) لە وەڵامی پرسیاری دادوەردا گوتی: گەورەم كێ ناچێتەوە من؟ ئەو منی دەركردووە و رازیش نییە بچمەوە ماڵی هاوسەرێتیم، ئەو منی ناوێت نەك من، ئەو بەمن رازی نییە نەك من، با لێرە لە پێش بەرێزتان بڵێ بەڵێ رازیمە بێتەوە، بزانە دەچمەوە یان نەء.
لێرە (گۆران) لە خۆیەوە قسەی كرد و گوتی: چەندین جار داوام لێكردووە كە بێتەوە بەڵام رەتیكردۆتەوە و پێی گوتووم كە تۆم ناوێ، لە بەرامبەر ئەو قسەیەی (گۆران) دادوەر گوتی: ئێستا ئەو زانیمان كە پێشتر داوات لێكردووە و نەگەڕاوەتەوە و رەتیكردۆتەوە، بەڵام ئێستا وا لە پێشت بەخۆی داوای كرد كە بیبەیتەوە، ئایا رازی بیبەیتەوە؟ (گۆران) بەنا دڵی و بەناچاری رازی بوو كە(ئەسرین) بباتەوە، كۆتایی بە دادبینییەكە هێنرا.
نەیهێشت ئەسرین بچێتەوە لای
(گۆران) بەسەروچاوێكی ترش و تاڵەوە لە هۆڵی دادگا هاتە دەرەوە بە تووڕەییەوە دادگای بەجێهێشت، ماڵی(ئەسرین) هەوڵیاندا لەگەڵ(گۆران) رێكەوتنێك بكەن و كێشەكانیان چارەسەربكرێت، بەڵام(گۆران) رازی نەبوو نەیهشێت(ئەسرین) بچێتەوە ماڵ بەمشێوەیە كێشەكەیان وەكو خۆی مایەوە.
سەیر لەوە دابوو(ئەسرین) تێگەیشت(گۆران) چیتر ئەوی ناوێ، مەگەر بەو مەرجەی رازی بێت كە(گۆران) (پەرژین )بخوازێت و هیچ كێشەیەكیشی بۆ دروست نەكات..(ئەسرین) دۆش دامابوو، هەمیشە دڵپڕغەم و خەفەتبار بوو، ئەو ئێوارەیە كە باوكی هاتەوە و (ئەسرین)ی بەو حاڵەوە دیت، دەستێكی بەسەری داهێناو پێی گوت: كچم دەزانم خەفەتباری پیاوێكی خۆپەرست و هەڵپەڕستە دەزانم لەوە دڵگرانی كە ناتباتەوە، هێندەی لەوە دڵگرانی كە شایەنی ئەو هەموو دڵسۆزی و خۆشەویستییەت نەبوو، بەڕاستی من گەیشتوومەتە ئەو بڕوایەی كە تۆ پێویستە لەگەڵ ئەم مێردەت خۆت یەكلا بكەیتەوە، یان وازی لێبێنی و تەڵاقت بدات یانیش بەو حاڵەوە بچییەوە لای دوای گفتوگۆیەكی تێروتەسەل بڕیاریاندا كە لەگەڵ خودی (گۆران) گفتوگۆ بكەن و یەكلایی بكەنەوە، ئەوەبوو رۆژی دواتر هەواڵیان بۆی نارد كەبێت ببڕێنێتەوە و بەلایەكیدا بخەن، بەڵام ئەو نەهات و تەنیا یەك قسەی بۆ رەوانە كردبوون و گوتبووی: نێوان من و (ئەسرین) تەنیا بە دادگا چارەسەر دەبێ... ئیتر ئەوانیش بڕیاریاندا ملماانێیەكە دەستپێبكەن بۆ ئەم مەبەستە پارێزەرێكیان گرت كە هەم تەڵاقی خۆی وەربگرێت و هەمیش مافەكانی خۆی لێوەربگرێت..
هۆی ئەو ناكۆكییانە چی بوو؟
پرسیارمان لە پارێزەرەكەی(ئەسرین) كرد كە هۆی ئەو گۆڕانەی كە بەسەر مێردەكەی داهاتووە چی بووە، بۆچی پێشتر(گۆران) مەمنونی(ئەسرین)بووە و كەچی دوای دوو سێ ساڵ لە ژن و مێردایەتی هەڵوێستی لێگۆڕاوە؟ ئەو پارێزەرە تەواوی هۆكاری كێشەكەیانی بەمشێوەیە بۆ گێڕاینەوە و گوتی:(گۆران) وەك(ئەسرین) دەرچووی پەیمانگایە و كە ژنیشی هێناوە ئەگەر مووچە و هاوكاری(ئەسرین) نەبوایە تەنانەت نەیدەتوانی كرێی خانووش بدات، جا لەلایەك تموحی زۆر بووە؟ حەزی كردووە خانووی خۆی هەبێت و خاوەن ئۆتۆمبێلی خۆی بێت مووچەیەكی باش وەربگرێت، لەلایەكیش لە مووچەكەی زیاتر چیتری نەبووە.. وەختێكیش بەرێكەوت كچێك بەناوی(پەرژین) دەناسێت، هەڵوێستی بە تەواوەتی دەگۆڕێ، ئەو دووانە پەیوەندی لەگەڵ یەك دروست دەكەن و تا ماوەی سێ چوار مانگان، (پەرژین) كچە دەوڵەمەند دەبێ و حەز لە (گۆران) دەكات.
ئەویش دوای ئەوەی پەیوەندییەكەیان دەگاتە رادەی ئەوەی ئەوان پێی دەڵێن خۆشەویستی(پەرژین) هەر چەندە بە تەمەن(6) ساڵ لە (گۆران) یش گەورەتر دەبێ، بەڵێنی هێنانەدی هەموو ئاواتەكانی دەداتێ، چ لە زێڕ و پارە چ لە خانوو چ لە ئۆتۆمبێلیش، ئەگەر ژنەكەی تەڵاق بدات و ئەو بخوازێت، یەكەمین هەنجەت و بیانووی(گۆران)یش كە بە(ئەسرین)ی دەگرت ئەوەیە كە منداڵی نابێت كەچی كە(ئەسرین) چووە لای پزیشك و پشكنینی بۆ كرا دەركەوت كە(ئەسرین) هیچ كێشەیەكی تەندروستی سەبارەت بە منداڵ بوونە نییە، بەڵام ئەو ئەسڵەن نەك هەر ئامادەنەبوو دان بەو راستییە بنێ و بچێتە لای پزیشكیش بەڵكو هەمیشە هۆی منداڵنەبوونیانی دەگەڕاندەوە بۆ (ئەسرین).
بە كورتی ئەوەی دیار و بەرچاوە هۆكاری دەستبەرداربوونی لە(ئەسرین) خولیای دەوڵەمەندبوون بوو راستە وەك(ئەسرین) دەڵێ(پەرژین) كچێكی زۆر جوان و نەشمیلە و تەمەنیشی(30) ساڵێكە، بەڵام ئەوە بە تەنیا هۆكار نییە، هەر چۆنێك بێت ئەو پیاوە دەیەوێ ژنەكەی پێی بڵێ كەوا تەڵاقم بدە بۆ ئەوەی هەم دەست بەسەر ماڵەكەی دابگرێت و هەمیش هیچ زەرە نەكات و كەسیش گلەیی ئەوەی لێنەكات بڵێ بێوەفا بوو بەرامبەر بە ژنەكەی و بۆ ماڵی دنیا دەستبەرداری بوو.
پێشكەشكردنی داوای لێكجیابوونەوە
پارێزەرەكە لەسەر پێشكەشكردنی داوایەكی دیكە و وردەكارییەكانی گوتی: كە زانیمان كابرا هەڵوێستی چۆنە داوایەكمان بۆ دادگا بەرزكردەوە و گوتمان داوای لێكجیابوونەوە دەكەین، بەم داوایە(گۆران) تێكچوو، هاوسەنگی لە دەستدا و توڕەیی لێبەدەركەوت، كە هاتە دادگا ئێمە لەهۆی بەرزكردنەوەی داواكە بە دادگامان گوت: لەبەر ئەوەی ئەو پیاوە كە مێردی (ئەسرین)ە، ژنەكەی لە ماڵە مێرد دەركردووە و ئامادەش نییە بیباتەوە هەمیشە و بە بەردەوامیش جنێوی پێدەدا و سوكایەتی پێدەكات بۆیە ئێمە داوای جیابوونەوە دەكەین، كەچی ئەو گوتی: هیچ سوكایەتیم پێنەكردووە و جنێویشم پێنەداوە قەت تەڵاقیشی نادەم، دانیشتنە كە بۆ رۆژێكی تر دواخرا، (گۆران) ئەم داوا بەرزكردنەوەیەی بە سووكایەتی زانی بۆیە كردبوویە لاملی و دەیگوت نە تەڵاقی دەدەم نەدەشیبەمەوە پاش ململانێیەیەكی زۆر و هێنان و بردنێكی زۆر ئەو كچەی كە پەیوەندی لەگەڵ هەبوو(پەرژین) پێی گوتبوو بڕۆ تەڵاقی بدە و چیشی دەوێت من دەیدەم، ئەویش لەبەر ئەوەی بەم داوا تۆماركردنە زۆر توڕە و تۆسن ببوو، هەستی دەكرد سووكایەتی پێكراوە و لە هەیبەتی دراوە، كە دیتیشی خۆشەویستەكەی ئامادەیە زەرەرەكانی ببژێرێ، لە دانیشتنێكی دادگادا لەبەردەم دادوەردا گوتی: بەڵێ جەنابی قازی من ئەو ژنەم ناوێتن لەگەڵم ناگونجێت و بە كەڵكی من نایە، مادامیش لە دادگا سكاڵای لە دژ تۆماركردووم من ئیتر هەرگیزاو هەرگیز ئەو ژنەم ناوێ ئەوە فڵانی كچی فلانم، لە پێش دادگا سێ بەسێ تەڵاقدا.
بەم هەڵوێستەی(گۆران) هەموو مافەكانی(ئەسرین)ی مسۆگەركرد، دواتر داوایەكی تریشمان لەسەر تۆماركرد بۆ ئەوەی ناو ماڵەكەی لێوەرگرینەوە، بەهەر حاڵ، لە بەرامبەر مافەكانی(ئەسرین) ئامادەبوو گفتوگۆ بكات و دواتر رێكەوتین لەسەر مەبلەغێك پارە لەبری دەستبەرداربوون لە هەموو مافێك كە(ئەسرین) لەسەر ئەوی مابێت، بەمجۆرە(ئەسرین) یەخەی لە یەخەی پیاوێكی خۆپەرستی ماڵپەرست بۆوە و ناچار بوو كۆتایی بە ژیانێكی هاوسەرێتی بێنێ كە هەرگیز چاوەڕوانی دوا رۆژێكی وەها تاریكی لێنەدەكرد.