هاوڕێیەتی و متمانەی كوێرانە
(مەهدی) كە شوفێری تەكسی بوو، دەمێك ساڵ بوو(سەعدی) دەناسی كە فیتەرێكی گەنجی شارەزا بوو،(سەعدی) هێشتا هەرزەكار بوو كە لای وەستایەكی دیكە وەك شاگردێك كاری دەكرد، كە هاوڕێتیەیان لەگەڵ(مەهدی) هەبوو، ئەگەرچی لە ماوەی هەرزەكاریدا، وەك هەر گەنجێكی تازە پێگەیشتوو چاویان دەگێڕاو بە دوای خۆشییەكانی ژیان دەگەڕان، بەڵام كە(مەهدی) ژنی هێنا، كە لە تەمەنێكی زووش بوو، ئیدی وازی لەو شتانە هێناو كەوتە سەوداسەری كاسبی و نان پەیداكردنەوە دوای ئەوەی سێ منداڵی بوو، كە نۆبەرەكەی كوڕبوو،(مەهدی) بەهیوای ئەوەبوو، ئەو كوڕەی هەر لە تەمەنی هەشت نۆ ساڵییەوە لای وەستایەكی زیرەك و شارەزا دابنێت، بەڵكو بە ماوەیەكی كەم بۆ خۆی فێری پیشەیەك بێت و بتوانێت پشت بەخۆی ببەستێ و بەجۆرێك لەجۆرەكانیش یارمەتی ماڵەوە بدات، بێگومان پێش ژنهێنانی لە هەفتەی یەك دوو رۆژ، یان زۆربەی ئێوارەكان بەلای كەمیەوە لەگەڵ (سەعدی) بوو، هەڵسان و دانیشتن و گەڕان و كەیف و خۆشیان بەیەكەوە، بەڵام پاش پێكەوە نانی خێزان ئەو هاموشۆیە كەم بۆوە، بۆیە نەیدەزانی رەوشت و رەفتاری(سەعدی) بەرەو خراپتر چووە،(مەهدی)یش كە كوڕە گەورەكەی بووە نۆ ساڵ، كە منداڵێكی تابڵێی بەرچاو و بەردڵ بوو، حەزی دەكرد هاوینان كە پووشی خوێندن بوو بیباتە لای(سەعدی)ی كۆنە هاوڕێی، (سەعدی) دوكانێكی مامناوەندی دانابوو ئیشی لە برەو دابوون هەروەها خۆشی، لە رابواردنی ژیان نوقم كردبوو، رۆژێك(مەهدی) چووە لای(سەعدی) و پێی گوت كە (ئازاد)ی كوڕە گەورە نۆ ساڵییەكەی دێنێتە لای بەڵكو ئەم هاوینە هەم لە كۆڵان و منداڵی خراپ دوور كەوێتەوە، هەمیش فێری پیشەیەك بێت بەڵكو ئەگەر لە دوا رۆژدا مەیلی كەوتە سەر ئیشەكە بۆخۆی فێری ببێت و دووكانێك شتێك دابنێت پێوەی خەریك بێت.
سەرەتا (سەعدی) تۆزێك منجە منجی كرد و وای نیشاندا كە ئیشیان كەمە و شاگردی زۆرە و كۆمەڵێك لەو بڕوبیانووانە، بەڵام (مەهدی) هەر سووربوو لەسەر داواكەی و پێی گوت كەوا پارەو رۆژانە یا هەفتانەی لێ ناوێ، تەنیا كوڕەكەی لەلای بێت و فێری ئیشێك بێت و بەس،(سەعدی) لە بەرامبەر ئەم سووربوونەوەی(مەهدی) ملی كەچ و كرد گوتی: باشە بیهێنە، كە رۆژی دواتر بردی(سەعدی) كە چاوی بەو منداڵە نۆ ساڵییە كەوت یەكسەر گوتی: ئەو، كوڕە نۆبەرەكەتە وەها گەورە و جاحێڵ بووە، كوڕە من وامدەزانی پێنچ شەش ساڵانە نەمزانی وا گەورەیە، بیهێنە بالامان بێت و رۆژانەشی دەدەمێ و فێرە ئیشیشی دەكەم.
رەفتار و هەڵوێستێك كە هەرگیز چاوەڕوان نەدەكرا
ئەوەی كە(مەهدی) هەرگیز چاوەڕوانی نەدەكرد ئەو ناپاكی و خیانەت كردنەی هاوڕێیەكی بوو كە ساڵانێك پێكەوە وەكو دوو برادەری زۆر لێك نزیك بەشێكی تەمەنیان پێكەوە بەسەربردووە، دوای ئەوەی مانگێك بەسەر دانانی(ئازاد) ی نۆ ساڵە وەك شاگرد لای(سەعدی) بەسەرچوو ئێوارەیەك كە(ئازاد) هاتەوە ماڵەوە، بە كزی و مەلووولی، بە تێكشكاوییەوە، یەكسەر كە پێی نایە ماڵەوە، چووە لای دایكی و دەستی دایكی راكێشا بۆ ئەوەی سەیری كوڕەكەی بكات، با لێكگەڕێین(مەهدی) خۆی ئەو ساتانەمان بۆ بگێڕێتەوە و بزانین چی روویداوە و دواتر چی بووە، (مەهدی) دەست بە گێڕانەوەی قسەكەی دەكات و دەڵێ: بەرە بەری ئێوارە بوو بەڵام هێشتا زۆری مابوو خۆر ئاوا بێت، كە لە هەیوانی ماڵەوە لەسەر دۆشەكێك پاڵماندابۆوە و كاسە ماستاوێكم لەبەردەم بوو وردە وردە بە چەمچەیەك دەمخواردەوە، چاوم بە(ئازاد) كەوت لەسەری كۆڵان بەدەركەوت و لۆژ لۆژ بەرەو ماڵەوە دەهاتەوە، كە گەیشتە بەر دەرگا گوتم:(ئازاد) كوڕم ئەوڕۆكە درەنگتر هاتییەوە خۆ(سناعە) هێندە درەنگ داناخرێ، لە كوێ بووی وا درەنگ هاتیتەوە..؟
هیچی نەگوت و هیچ وەڵام نەدامەوە چووە ژووری مەتبەخەكە و بەرەو لای دایكی چوو، دەستی راكێشا، دایكی كە ئاوڕی لێدایەوە، دەبینێ(ئازاد) رەنگ زەرد، بێ حەوسەڵە، دەروونێكی تێكشكاو، شتێكی هەبوو دەبوو بەدایكی بڵێ، تا ماوەیەك لە ژوورەوە مانەوە، دوای حەوت هەشت خولەك، دایكی لە مەتبەخەكە هاتە دەرەوە، بەڵام چۆن هاتنە دەرەوەیەك، زۆر لە(ئازاد) تێكشكاوتر و ماڵوێرانتر دەركەوت، لەو زیاتر رەنگ زەرد و لێو بە بارتر، زانیم شتێك قەوماوە، بەهەرحاڵ، بە هەزار دەردەسەری و شێر و رێوی هێنانەوە دایكی پێی گوتم كە:(مەهدی) ئەو برادەرە چەلەنگەت جەنابی وەستا(سەعدی) دەستدرێژی سێكسی كردۆتە سەر كوڕەكەمان، ئیتر چاوم تاریك بوو، هەر هێندەم زانی هۆشم لەخۆم نەما، كە بە ئاگاهاتمەوە سەرم لەسەر كۆشی خێزانەكەم بوو، خۆیشی و(ئازاد)یش لەسەرم دەگریان، گوتم : ئێستا دەچم دەیدۆزمەوە، لەهەر كۆێیەكیش بوو، دەچمە لای، دەیدەمە بەر چەقۆیان تا پارچە پارچە دەبێتن بەڵام دایكی ئازاد ساردی كردمەوە و گوتی: ئاخر تۆش دەچییە بەندیخانە و حوكم دەدرێی و ماڵی ئێمە و منداڵەكانیش بە قوڕ دەگیرێ، سەعاتێك دوان سیان چەند بوو نازانم گفتوگۆمان كرد، دواجار گوتی: ئامۆزاكەم ئەفسەری پۆلیسە با پرسێكی پێبكەین و بزانین چی بكەین هەم ئێمە تووشی هیچ كێشەیەك نەبین و شەڕ و كوشتن و ئەو جۆرە كێشانە، نەیەنە گۆڕێ هەمیش ئەو تاوانبارە بگیرێت و سزای خۆی وەربگرێت.
تاوانكردن و تووشبوون
(مەهدی) بەو بارە دەروونی و مەعنەوییە رووخاوەوە، زەنگی بۆ ئامۆزای خێزانەكەی كە ناوی(زرار) بوو لێدا و پێیگەیاند كە شتێكی گرنگ هەیە حەز دەكات بێتە ماڵیان و هاوكاریان بكات، ئەویش گوتی: باشە(مەهدی) بەمشێوەیە درێژە بە باسەكە دەدات و دەڵێ: دوای بیست خولەكێك (زرار)هات و مەسەلەكەمان تێگەیاند.. ئەویش نەخشەیەكی مەحكەمی بۆ داناین و ئێمەش دەستمان بە جێبەجێكردنی كرد، نەخشەكەش ئەوەبوو كە من و دایكی بچینە بنكەی پۆلیس و سكاڵا تۆمار بكەین و داوای گرتنی بەسەر تاوانەوەی تاوانبار بكەین و هەموو جۆرە هاوكارییەكی پۆلیس بكەین، تا ئەوان بتوانن بە باشترین شێوە تاوانبار بگرن، ئەوەبوو چووینە بنكەی پۆلیس و ملازمی بنكەش(ع) هەرچی رێككاری پێویست هەبوو رێكیخست و دەستكرا بەجێبەجێكردنی نەخشەكە.
دەستگیركردن
ئەفسەری بنكەكە ملازم(ع) پلان و نەخشەی دەستگیركردنی(سەعدی)مان بەو شێوەیە بۆ دەگێڕێتەوە و دەڵێ: دوای ئەوەی (مەهدی) و خێزانەكەی هاتنە بنكەكەمان و كوڕەكەیان نیشاندام و باسەكەیان پێگوتم: گەیشتمە قەناعەتێكی تەواو كە ئەو كابرایە، كەسێكی بەدڕەوشتە و نێربازە و دەستدرێژی كردۆتە سەر ئەم منداڵە نۆ ساڵەیە، نەخشەیەكم دانا بۆ دەستگیركردنی كە ئەوەبوو: بەیانی وەكو رۆژانی دیكە، وەك ئەوەی هیچ رووینەدابێت(ئازاد) بچێتە سەركاری خۆی لە دوكان و(سەعدی) یش وابزانێت كە شتەكەی لێ ئاشكرا نەبووە و(ئازاد) والێبكات كە گوایە رازییە بەو رەفتارەی كە لەگەڵی دەكات، ئەوانیش بە رێگە و شێوازی خۆیان چاودێری دەكەن تا ئەوكاتەی دەتوانن بەسەر تاوانەكەوە بیگرن، كە بەیانییەكەی(ئازاد) چۆوە دوكان،(سەعدی) بینی هیچ رووینەداوە و نە باوكی و داكی نە(ئازاد) بەخۆشی هیچ ناڕەزایی، كێشە و هەڵا نانەوەیەك دروست نەبووە، باری دەروونی ئارام و هێمن بوو، ئەو نیگەرانییەی كە هەیبوو نەیما، هەندێ پرسیاری لە(ئازاد)كرد و هێندەی دیكە ئارام بۆوە ئەوجا بە(ئازاد)ی گوت: حەزت لێیە دیسان وا بكەینەوە؟ ئەویش گوتی: ئا ئەوەبوو چاوەڕوان بوو تا پاش نیوەڕۆ داهات، ئیشەكانی بە پەلە تەواوكرد و شاگردەكانی تری زوو ناردەوە و چوونە ئەو ژوورە بچووكەی كە كردبوویانە(ئۆفیس) و دەستی كرد بە رەفتارە خراپەكانی، ئیتر لە ناوەڕاستی كارەكەی دابوو، خەریكبوو رەفتارە خراپەكە بكات، یەكسەر ئێمە وەك پۆلیس و كەسوكاری (ئازاد) بە ژووركەوتین و لەسەر تاوانەكە بە نیوە رووتیەوە گرتمان، بەو حاڵەوە بردمانە بنكەی پۆلیس و لێكۆڵینەوەمان لەگەڵی كرد، هەر لەگەڵ یەكەم لێكۆڵینەوەدا ورەی بەردا و هەرچی كردبوو نەكردبوو، دانی بە هەمووی نا، گوفتارمان لێی وەرگرت وتەی داواكاری مافی كەسی واتە( دایك و باوكی منداڵەكە) وەك داداخواز وەرگرت و دۆسییەمان بۆی كردەوە و رەوانەی لای دادەوەری لێكۆڵینەوەمان كرد، ئەویش بڕیاری دەستگیركردنی داو، رەوانەی بەندیخانەی محەتەكرا، رێككارییەكانی لێكۆڵینەوە دەستپێكرد و منداڵەكەمان بە فەرمانی دادوەر ناردە پزیشكی دادیی و لەوێ دوای دوو رۆژ كە راپۆرتەكەی هاتەوە دەركەوت كە دووجار كاری سێكسی بە زۆر و بە ناڕەزایی لەگەڵ كراوە و شوێنەوارەكانی لەسەر جەستەی منداڵەكە بەجێ هێشتووە... ئیتر پرۆسەی دادگایی كردنەكەی، دوای تەواوبوونی لێكۆڵینەوە، دەستیپێكرد، لە كاتی دادگایكردنیدا دادگا پرسیاری لە باوكی منداڵەكە كرد كە بۆچی ئاگای لە منداڵەكەی خۆی نەبووە و خستویەتییە بەردەم كەسێكی لادەر و بەدڕەوشتی وەك (سەعدی)،(مەهدی) یش كە باوكی منداڵەكەیە وەڵامی دادوەری دایەوە و گوتی: وەڵڵا خۆشباوەڕی خۆم بوو، كە متمانەم بە كەسێكی وەك(سەعدی) كرد كە ئێستا وەك تاوانبار لە بەردەمتان راوەستاوە و ماڵی من و خۆیشی بە قوڕگرت و ئەو بەدڕەوشتییەی بەرامبەر نەك بە منداڵەكەم بەڵكو بەخۆیشی و منیش كرد، پتر لە(15) ساڵە هاوڕێم بووە و نەمزانی بەدڕەوشتییەكەی و رەفتار و سلوكی گەیشتۆتە ئەو ئاستەی كە لەگەڵ منداڵان نێربازی بكات، ئەوەندە ساڵە برادەری بویمە شتی وام لێنەبینی بوو، كە زانیشم شتێكی وای بەرامبەر بە منداڵەكەم كردووە، یەكەمجار باوەڕم نەكرد، چۆن دەبێ ئەوەندە بەرەڵڵا بووبێ كە نەك هەر لەگەڵ منداڵی من بەڵكو لەگەڵ هەر كێ بێ، بیكات، من گوتم برادەرمە و بڕوام پێی هەبوو، قەت چاوەڕێی ئەوەشم نەدەكرد خیانەتێكی وەها گەورەم لێبكات و ئەوها دەست بۆ نامووسم ببات، هەڵەی من ئەوەیە بیرم لەوە نەكردەوە ئەو ژینگە و دەورووبەرەی كە(سەعدی) ئیشی تێدا دەكات ئەوەندە بۆگەن و گڵاوبێ، لەوەش گەورەتر بەخەونیش نەمتوانیووە بیر لەوە بكەمەوە ، یان تەنانەت هەر بە خەیاڵیشم دابێت دەست بۆ نامووسی من درێژ بكات، داوا لە دادگا دەكەم توندی سزای بدات و كەمو كوڕی منیش هەر ئەوەندەیە كوێرانە متمانەم پێی هەبوو.
حوكمدان
دوای تەواوبوونی وەرگرتنی وتەی لایەنەكانی داوا و تەواوبوونی پرۆسەی دادگایی كردنەكە، دادگا بڕیاریدا بە زیندانی كردنی(سەعدی) بۆ ماوەی(7) ساڵ بە تاوانی دەستدرێژی كردنە سەر منداڵێك.