یا ئاشكرایە ڕاپرسی یان ریفراندۆم ل چەرخێ بیستێ و بیست و ئێكێ یابوویە ئێك ژ ئالاڤێن چارەسەركرنا ئاریشە و قەیرانێن سیاسی و ئابووری ل جیهانێ، و هەرچەندە كە هندەك جاران ئارمانجێن خۆ ناپێكن لێ دگەل هندێ ژی بێمفا نینە د هەڤكێشەیێن ئالۆزێن گرێدای ب پرۆژە یاسایەكێ یان گۆهۆڕینا سیستەم و رژێمەكا سیاسی و دەستهەلاتدار.
هەرێما كوردستانێ وەك ئەزموونەكا سەركەفتی ل دەڤەرێ و ژئەگەرێ گۆهۆڕینێن سیاسی و ئابووری ل رۆژهەلاتا ناڤین، یا بوویە دیفاكتۆیەك و یا شیای سەنگێ خۆ یێ سیاسی ل دەڤەرێ و جیهانێ نیشان بدەتن، و ل قۆناغێن داهاتی باببەتەك دیتر ژی دێ بیتە دیفاكتۆ و كەتوارەك دیتر و ئەو ژی بڕێڤەچۆنا هەمەپرسیەكا ئازاد و سەرتانسەری یە ل كوردستانێ و لژێر چاڤدێرییا نەتەوەیێن ئێكگرتی و ئەڤ راپرسیە دێ گەرەتنی كەرەكێ بهێز بیتن بۆ دەستنیشانكرنا ئاییندەیێ كوردستانێ. یا فەرە ئەم هندەك بچاڤەكێ هەستیار و هۆشیارانە و رەخنەگرانە سەرەدەریێ دگەل ڤی بابەتی دا بكەین. بۆچی؟ چونكی سەركەفتنا راپرسیەكا ژ ڤی بابەتی ژبلی پێدڤی بوون ب فاكتەرێن بابەتیانە(subjective) و دەرەكی و سیاسی و دیپلۆماسی، هەوجەی هندەك فاكتەرێن خۆدی(objective) یە كە خۆ د خالەكا گرنگ دا دبینیتن و ئەو ژی بەرهەڤییا سایكۆلۆژیكییا تاكێ كوردستانییە بۆ ڤێ هەمەپرسیا چارەنڤیس ساز و گرنگ. بگۆتنەك دیتر ئایا تاكێ كوردستانی بۆچۆنا سەر سندۆقێن دەنگدانێ بەرهەڤە یان دبیتن رێژەیەكا گەلەك تووشی ئەبستانسیۆنێ (abstention) و خەمساری د دەنگدانێ دا بهێن، كە گەلەك جهێ مەترسیێ یە بۆ سەر ئەنجامێن ڤێ راپرسیێ، لەوما ئەڤێ چەندێ هۆشیارییەكا باش دڤێتن. بەلێ كینە ئەوێن بەلكۆ دەنگێ خۆ نەدەن یان خەمساریێ تێدا بكەن؟ ل جڤاكا كوردستانێ مەلیۆنان مرۆڤێن هەین كە هەر ئێك جیهانەكە ژ بیروباوەر و بۆها، ئاراستە و ژیێاتی، و ئارەزوو و پالدەر و پێدڤیاتییان. هەر ئێك ژ ڤان پێكهاتەیا هژمارەكا بەرژەوەندیێن هزری، ئابووری، سیاسی و جڤاكی دروست دكەتن كە كارتێكرنێ لسەر كەسەكی دكەتن كە ئایا پشكداریێ د ڤێ ریفراندۆمێ دا بكەتن یان نە؟ دبیتن ئەڤ بەرژەوەندییە ئابووری بن و بازرگانەكا ژبەر ئەگەرێ بەرژەوەندیێن ئابووری دگەل خەلكا دیتر ل دەرڤەی هەرێما كوردستانێ ل ئێراقێ خۆ ژ دەنگدانێ بپارێزیتن یان دەنگێ وی "نە" بیتن. یان ژی دبیتن ئەگەرێ ڤێ چەندێ جڤاكی بیتن و ژبەر پەیوەندیێن خێزانی كەسانەك هەبن خۆ ژ دەنگدانێ ڤەشێرن. دبیتن ئەگەر رۆشنبیری بیتن و كەسانەكێ كۆ پێگەهشتیێ كەلتوورەكێ ئەرەبی بیتن و هێشتان نەشیایە خۆ ژ قەید و بەندێن ڤی كەلتووری قۆرتال بكەتن، چونكی دەرچۆیێ زانینگەهێن وێ كەلتوورێ بن و ژێیاتیەكا خەیالی لنك دروست بیتن و بۆ هندێ بزاڤێ بكەتن بڕەنگەك ژ رەنگان كارتێكرنێ د ئەنجامێن ریفراندۆمێ دا بكەتن. چ گۆمان ژی تێدا نینە كەسانەك هەبن لژێر ئالایێ لایەنێن سیاسی و لبن كارتێكرنا هزرا ئایینی بكەڤنە ژێر كارتێكرنا كەلتوورێ ئەرەبی و پشكداریێ د دەنگدانێ دا نەكەن. د ڤێ پرۆسێسێدا، بێگۆمان دەستێن دەرەكی و نەخاسمە وەلاتێن كۆ ئایینێ ئیسلامێ و كەلتوورێ ئیسلامی و ئەرەبی تێدا زال ب هێجەتێن جۆداجۆدا كارتێكرنێ لسەر ڤێ پرۆسێسێدا بكەن و بیروباوەر و هزرا تاكێ كوردستانی بێخنە بن كاریگەرییا خۆ و هندەك كەسانان هان بدەن هەكەر دەنگێ وان " نە " ژی بیتن، بەلكۆ رێژەیەكا پتری یا كەسان پشكداری دەنگدانێ نەبن و بڤێتن بڤی رەنگی شكستێ پێبهینن.
ژبەر ڤێ چەندێ یا فەرە لایەنێن پەیوەندار ڤێ ئێكێ لبەرچاڤبگرن و لسەر ئاستێ نەتەوەیی و كوردستانی بزاڤەكا مەنز بۆ بهێتەكرن و بزاڤ بۆ هندێ ژی بهێتەدان بۆ پووچەلكرنا پیلانێن دوژمنان و نەیاران و متیژێكەرێن تیرۆریزما جیهانییا كۆ ئەڤرۆكە ئەڤ تەخێ هۆڤ و دڕندە ب سەروگۆهێن كوردستانیان ڕا بەرداین بۆ سەرنەگرتنا پرۆسێسا " بدەولەتكرنا كوردستانێ" یاكۆ سەرۆك مەسعۆد بارزانی ئەندازیارییا وێ دكەتن، و هەروەسا وان كەسێن ب ئەقلیەت و بیروباوەرێن سەری دچنە هنداڤ سندۆقێن دەنگدانێ هەمی لایەك دەست لناڤ دەستێ ئێك بدەن و بزانن و خەلكێ ژی تێبگەهینن كە بەرژەوەندییا كوردستانیان مەزنتر و سەرتری بەرژەوەندیێن تاكی یە و دەزگەهێن راگەهاندنێ د ڤێ راستێ دا دشێن ببنە بهێزترین ئالاڤ.
• ئەڤبابەتە یا ل ڕۆژناما (ئەڤرۆ ) هاتیە بەلاڤكرن ژمارە (1754 ) ل ڕێكەفتی(4/11 /2015) ل. (13 ).