توبڵێی پەندی دارو کرمەکە لەسەر مێژووی سییاسی کورد وەدەست نەخرابێ..؟
March 18, 2018
وتار و بیروڕا
تورکیە ئەگەر بی ویستبا بە دوو شەو دەیتوانی دەست بەسەر تەواوی عەفریندا بگرێت، بەڵام دواخستن و مراوەغەکردن، ئامانج لێی: تێگەیشتن بوو لە هەڵوێست و کاردانەوەی نێودەوڵەتی، وە لاوازکردن و بێ تاقەکردنی هێزەکانی کورد ی لە ڕۆژئاوای کوردستان.
بۆئەوەی شکست بەو گەلەکۆمەیە بهێندرێت و لێرە بوەستێندرێت، گرنگە کە کورد لە سەر ئاستی نەتەوەیی اعادەنەزەڕی خۆی بکاتەوە، لەبەرئەوەی ئایندەی کورد زۆرگەورەترە لە بەرژەوەندی شەخصی و حیزبی، نابێت حیزب ئەوەندە بەگرنگ و گەورە بزانین کە میللەتەکەمان بکەینە قوربانی ململانێی حزبایەتیمان، وەک ئەوەی لە هەندێ حیزب بەدی کراوە لە ساڵی 1959 تا دەگات بە 16ی ئۆکتۆبەری 2017 و لە ئێستاشدا کەوتنی عەفرین.
ئەمڕۆ کورد پێویستی بە یەکبوون و پێکەوە بوونە، یەکڕیزی هێزە سیاسییەکانی نێو ماڵی میللەتی کورد گرنگە، گرنگی یەکگرتن هەمیشە دەبێتە مایەی سەقامگیری سیاسی و دروستکردنی دیدگای هاوبەش و بەشداریکردنی هەموان لە پرۆسەی بنایتنان و بەڕێوەبردن و پارێزگاریکردن لە دەستکەوتە بەدەست هاتووەکان، وە شکست پێ هێنانی هەر ئەجێندایەکی دەرەکی کە ببێتە مەترسی لەسەر ئاخ و میللەت.
دەپرسم:- توو بڵێی کوردبوون بەواتای نابەرپرسیارەتی و خۆخۆری بێ..؟ توبڵێی پەندی دارو کرمەکە لەسەر مێژووی سییاسی کورد وەدەست نەخرابێ..؟ ڕۆژانە مەترسیەکان زێدەتر دەبن لەسەرمان، ڕۆژانە گەلەکۆمەی بەخشینەوەی پارووی چەورتر لەسەر پشتی کورد پێشکەش بە ئەم و ئەو دەکرێ!. هەڕەشەی جدی هەیە لەسەرمان، ڕۆژانە گفتوو پەیمانی درۆیینەی وەڵاتان ڕوونتر دەبنەوە، کەچی هێشتا بەخۆماندا نەچوینەتەوەو دەست ناخەینە ناو دەست و یەکڕیز نابین .!
هەر بەڕاستی گەر ئیرادەیەکی یەکڕیزو گوتارێکی هەوبەش نەبێت، هیچ پارێزگاریەک سەرناگرێ، چاوەڕێی زیاتری سەرەنجامێکی زۆر خەتەرتر دەکرێ .