بەر لە دە ساڵ و لە كۆبونەوەیەكدا لەگەڵ میدیاكارانی پارتی، سەرۆك بارزانی پێی گووتین: ئێوە ئیتر لە میدیادا بە راشكاوی سەربەخۆیی بێننە ناوباسان و بیكەنە وێردی سەر زاری خەڵك و بڵێن دوا چارەسەری حەقیقی بۆ دۆزی میللەتێكی بندەست تەنیا سەربەخۆیی و چارەی خۆنوسینە. گوێ بە خیتابی رەسمی و زمانی دیبلۆماسی سیاسیەكان مەدەن. هەر كەس كاری خۆی دەكات.
دواجار زەمینەهاتە پێش و زمانی سیاسەت و زمانی میدیا، خواستی دڵی خەڵك و خیتابی سەركردایەتی سیاسی یەكیگرتەوە و وویستی كورد بۆ سەربەخۆیی ئاشكرا كرا و وادەی ریفراندۆم و هەنگاو بەرەو سەربەخۆیی دیاریكرا.
دەگوترێت كۆی خەڵكی كوردستان لەگەڵ سەربەخۆییە و ئیدی ریفراندۆم بۆ چییە! ریفراندۆم پێویستە چونكە:
- سەركردایەتی سیاسی پێویستی بە وەكالەت و تەفویزێكی میللی و شەرعیی خەڵكی كوردستانە تا بتوانێ بە ناویەوە لەسەر هەموو ئاستەكان بكەوێتەوە گفتوگۆ لەسەر سەربەخۆیی و دواتریش بە ناویەوە جاڕی بدات.
- ناحەزانی كوردستان بە پشتی قسە و هەڵوێستی هەندێ كەس و نوێنەر و نێوەندی كوردستانی، ئیدیعای ئەوە دەكەن كە سەربەخۆیی تەنیا خواستی فیئەتێكی سیاسی كوردستانە نەك زۆرینەی خەڵك و هێزە سیاسییەكانی، بۆیەش بە ئینكار مامەڵەی لەگەڵ دەكەن. ئەم ئیدیعا و ئینكارە تەنیا بە دەنگدانی گەلی كوردستان پوچەڵ دەكرێتەوە.
- سەربەخۆیی پەیوەندی بە چارەنووسی تاك بە تاكی كوردستانەوە هەیە. بۆیە نەحزبەكان و نە پەرلەمان و نە ئەنجومەنێكی سیاسیی نیشتمانی بە بێ گەڕانەوە بۆ دەنگ و ئیرادەی تاك بە تاكی خەڵك، ناكرێ دوا بڕیاری لێبدات.
- دەبێ جیهان ببیستێ كە سەربەخۆییخوازی سەركردایەتی سیاسیی كوردستان تەعبیرە لە خواست و بڕیاری گەلی كوردستان لە سەردەم و زەمانێكدا كە كۆمەڵگەی نێودەوڵەتی ناتوانێ رێز لە خواست و بڕیاری گەلان نەگرێت.
گەلی كوردستان لە ئەیلولی ئەمساڵدا بڕیار لە چارەنوسی خۆی و ووڵاتەكەی دەدات و مەعلومیشە دەنگ بە سەربەخۆیی دەدات. ئەركی سەركردایەتی راسپێردراوی كوردستانە ئەم بڕیارەی گەلەكەی جێبەجێ بكات. بە جۆرێكیش جێبەجێی بكات كە بەرژەوەندی خەڵك دەیخوازێت. مەعلومیشە بەرژەوەندی كوردستانییان لەوەدایە كە هەتا كەمترین دەرفەت هەبێت بۆ ئەوەی ویست و بڕیاری گەل بە رێكاری دیبلۆماسی و بە تەفاهوم و لێكگەیشتن لەگەڵ بەغدا و دوور لە شەڕ و بەریەككەوتن بێتەدی، پەنا بۆ رێكاری توندوتیژ نەبرێت. سەركردایەتی سیاسی پێشتریش ئەم بەڵێنەی بە میللەت داوە و گوتویەتی : هەتا مومكین بێت هەوڵ دەدەین لەگەڵ بەغدا، بە تەفاهوم و گفتوگۆ دەست لێكبەردەین و لە بری دوو دوژمن ببینە دوو دراوسێی پارێزەری بەرژەوەندی یەكدی. هەمان نیيەت لەگەڵ دەرو جیران و جیهانیش لە ئارادایە.
ئەركی سەركردایەتی سیاسییە لە سەروەختی گەیاندنی كوردستان بە سەربەخۆیی، هێندە میانڕەو و دان بەخۆدا گر و دیبلۆماسی بێت كە زۆرترین دۆست و دراوسێ و هاوپەیمان بۆ گەلی سەربەخۆی كوردستان و نەوەكانی داهاتوو مسۆگەر بكات و كەمترین دوژمنایەتی و كێشەی بۆ بنێتەوە.
بۆیە دیبلۆماتكارانی كورد و بە تایبەت كەسانی موحەننەكی سیاسی وەك هۆشیار زێباری كە لەم بارەیەوە دەدوێت دەزانی چ دەڵێ و چ پەیامێك بە چ زمانێك ئاڕاستەی بەغدا و دەوروبەر و جیهان دەكات. كاتێك سەرۆك بارزانی لەگەڵ عەبادی بە تەلەفۆن دەدوێ و تەئكید لە هەماهەنگیی پێشمەرگە و سوپا لە دوا قۆناغەكانی شەڕی داعش دەكاتەوە، دەزانێ رەواندنەوەی نیگەرانیی ئەو نێوەندانەی لە خەمی سەرخستنی یەكجاریی شەڕی داعشدان و دەترسن ریفراندۆمی كوردستان زیان بەو پرۆسەیە بگەیەنێ، چی دەخوازێ.
لە دواجاردا ئێمەی میللەت بەڵێمان بۆ سەربەخۆیی لێ مەتڵوبە و هەر ئەوەش خواست و هیوامانە، جێبەجێكردنیشی بە ئاشتی و بێ كەمترین زەرەر و زیان، ئەركی سەركردایەتی سیاسیی كوردستانە.