دوای ئەوەی لە باڵەفڕگەى نێودەوڵەتیی هەولێر هەریەك لە مەسعوود بارزانى سەرۆكى هەرێمی كوردستان، بەرهەم ئەحمەد ساڵح سەرۆكى حكوومەت، كەمال كەركووكى سەرۆكى پەرلەمان و نێچیرڤان بارزانى جێگری سەرۆكى پارتى دیموكراتى كوردستان و بەرپرسانى حكوومەت لە پێشوازیى بوون، لە ڕێوڕەسمێكدا ڕەجەب تەیب ئەردۆگان باڵەفڕگەی نێودەوڵەتیی هەولێری كردەوە، پاشان لە گوتەیەكدا سەرۆكی هەرێمی كوردستان ڕای گەیاند جەنابتان بیر لە سیاسەتی ئاشتییانە و حەكیمانە دەكەنەوە بۆ گرفتەكان و ئێمەش پشتگیریتان دەكەین.

مەسعوود بارزانی سەرۆكی هەرێمی كوردستان لە گوتەیەكدا خۆشحاڵیی خۆی دەربڕی كە لە ڕۆژێكی مێژووییدا ڕەجەب تەیب ئەردۆگان سەرۆك وەزیرانی توركیا سەردانمان دەكات و بەشداریمان دەكات لە كردنەوەی باڵەفڕگەی نێودەوڵەتیی هەولێر.

بارزانی گوتی ئەمە كلیلێكە بۆ پڕۆژەی گەورەتر و بەرەوپێشببردنی هەرێمی كوردستان و عێراق.

ئەوەشی گوت ئەم سەردانەتان ئەمڕۆ بۆ عێراق و هەولێر بەمێژوویی دەزانین و یەكێكە لە بڕیارە بوێرەكانی جەنابتان، ئەم سەردانە پردێكی زۆر مەحكەم لە پێوەندیی نێوان توركیا و عێراق بەگشتی و هەرێمی كوردستان بەتایبەتی دروست دەكات.

سەرۆكی هەرێم ئاماژەی بەوەش دا لەوەتەی جەنایتان هاتوونەتە سەر حوكم بڕیاری بوێرانەتان داوە و ئێمەش تەقدیری ئەو بڕیارانەتان دەكەین، ئەمڕۆ توركیا ڕۆڵێكی گەورە دەبینێت و ئەمەش بۆ سیاسەتی ئێوە دەگەڕێتەوە.

هەروەها بارزانی گوتی جەنابتان بیر لە سیاسەتی ئاشتییانە و حەكیمانە دەكەنەوە بۆ گرفتەكان و ئێمەش پشتگیریتان لێ دەكەین.

دواتریش بارزانی گوتی بەناوی خۆم و گەلی كوردستانەوە دووبارە بەخێرهاتنی خۆتان و شاندەكەتان دەكەم و هیوادارین ئەم هەنگاوە ببێتە خێر و خۆشی بۆ گەلی عێراق و كوردستان و گەلی توركیا.