سه‌رۆك نێچيرڤان بارزانى بۆ ده‌رچووانى زانكۆ: زانست و زانين، گه‌وره‌ترين هێز و سه‌رمايه‌تانه
ئێواره‌ى ئه‌مڕۆ سێشه‌ممه 7/6/2022 به‌ڕێز نێچيرڤان بارزانى، سه‌رۆكى هه‌رێمى كوردستان، به‌شدارى له ڕێوڕه‌سمى ده‌رچوونى خولى چواره‌مى زانكۆى ئه‌مه‌ريكيى كوردستاندا له دهۆك كرد كه به ئاماده‌بوونى به‌ڕێز مه‌سروور بارزانى، سه‌رۆك وه‌زيرانى هه‌رێمى كوردستان و به‌ڕێزان وه‌زيرى ده‌ره‌وه‌ى عيراق، سه‌رۆكى نێرده‌ى تايبه‌تى UN له عيراق، كونسولى گشتيى ئه‌مه‌ريكا له هه‌ولێر و ژماره‌يه‌ك له وه‌زيران و به‌رپرسانى باڵا به‌ڕێوه چوو.
له ڕێوڕه‌سمه‌كه‌دا سه‌رۆك نێچيرڤان بارزانى وته‌يه‌كى پێشكه‌ش كرد، تيايدا وێڕاى پيرۆزبايى له ده‌رچووان و دايكوباوك و كه‌سوكار و مامۆستايانيان، جه‌ختى له گرنگيى قۆناغى داهاتووى ژيانى ده‌رچووان و ئه‌ركى سه‌ر شانيان له خزمه‌تكردنى وڵات له بواره جياكاندا كرده‌وه. به‌ڕێزيان هه‌روه‌ها پشتگيرى و به‌رده‌واميى هاريكاريى خۆى بۆ زانكۆكانى هه‌رێمى كوردستان دووپات كرده‌وه و پشتبه‌ستنى زانكۆكانى به داتا و لێكۆڵينه‌وه‌ى زانستى و ڕۆڵيان له چاره‌سه‌ركردنى كێشه‌كانى ئێستا و داهاتوو له بواره جياكاندا به پێويست زانى.
ئه‌مه ده‌قى وتارى به‌ڕێز سه‌رۆكى هه‌رێمى كوردستانه:
ده‌رچوويێن هێژا،
مێهڤان و ئاماده‌بوويێن ڕێزدار،
ئێڤارا وه ب خۆشى بيت،
بخێرهاتنا هه‌مى مێڤانێن هێژا دكه‌م، بتايبه‌تى مێڤانێن بيانى يێن كو زه‌حمه‌ت كێشاى و دگه‌ل مه به‌شدارن د ڤێ ڕێوڕه‌سمێدا. بخێرهاتنا هه‌ميا دكه‌م، هه‌مى ب خێر بێن، سه‌رچاڤا.
هه‌رگاڤ بۆ هه‌ر ڕێوڕه‌سمه‌كێ ده‌ما ئه‌م تێين بۆ دهۆكێ، دهۆكا ڕه‌نگين، دلێ مه خۆش دبيت. خۆشحاڵين جاره‌كا دى، د ڕێوڕه‌سمه‌كا دى يا ده‌رچوونا قوتابى يێن خۆشتڤى يێن كوردستانێدا ل باژێڕێ دهۆكێ ب ديدارا هه‌وه هه‌ميا شاد دبين. هوين هه‌مى گه‌له‌ك ب خێر هاتن.
دڤێ ڕێوڕه‌سما ده‌رچوونا خولا چارێ يا زانكۆيا ئه‌مه‌ريكى يا كوردستانێدا، ئه‌م هه‌مى پێكڤه ب خۆشى و سه‌ركه‌فتنا ڤان قوتابيا شادين. پيرۆزباهيێ ل وان دكه‌ين، پيرۆزباهيێ ل دايكوباب و كه‌سوكار و مامۆستايێن وان يێن هێژا دكه‌ين كو ئه‌ڤرۆ د ڤێ ڕێوڕه‌سمێدا دگه‌ل مه به‌شدارن.
ده‌رچوويێن هێژا..
ب گه‌رمى و ژدل پيرۆزباهى و ده‌ستخۆشيێ ل هه‌وه دكه‌م بۆ مانديبوون و زه‌حمه‌تا كو هه‌وه د ڕێكا سه‌ركه‌فتنێدا كێشاى. ئه‌ڤرۆ هه‌ر ئێك ژ هه‌وه، چيرۆكه‌كا سه‌ركه‌فتنێ بۆ كوردستانێ تۆمار دكه‌ت. هه‌ر ئێك ژ هه‌وه، جهێ شانازييا مه هه‌ميانه. ئه‌م شانازيێ ب هه‌وه دكه‌ين. هوين هيڤييا پاشه‌ڕۆژێ و سه‌ركرده‌يێن پاشه‌ڕۆژێ يێن ڤى وه‌لاتينه. كو ئه‌ز گه‌نجێن وه‌كى هه‌وه دبينم، هيڤى و ئومێدا پاشه‌ڕۆژه‌كا گه‌شتر بۆ ولاتێ مه د وه‌ڕا دبينين. هه‌بوونا هه‌وه، گه‌هشتنا هه‌وه بۆ ڤێ ئاستێ، شاديێ تێخيته دلێ مه هه‌ميادا. باوه‌رييه‌كا زێده‌تر بۆ مه درست دبيت ب پاشه‌ڕۆژا ولاتێ مه ل كوردستانێ.
ده‌ما هوين ئه‌ڤرۆ به‌ره‌ڤ قۆناغه‌كا نوى يا كار و به‌رپرسياريێ گاڤا دهاڤێژن، پێدڤييه هه‌رگاڤ سپاسدار بن بۆ شانسێ كو هه‌وه هه‌ى. سپاسدار بن بۆ باب و باپيرێن هه‌وه، وان ئه‌و شانس نه‌بوويه، لێ ئه‌و شانس دايه هه‌وه. وان خه‌بات و پێشمه‌رگاتى كر. ب گيانێ خۆ، ب خوينا خۆ به‌ڕه‌ڤانى ل ولاتى و ل ئازادييا وه‌لاتى كر، داكو ئه‌ڤرۆ هوين ئازاد بن و بشێن ل ولاتێ خۆ ل زانكۆيێ بخوينن. شه‌ره‌فمه‌ندم ئه‌ڤرۆ ل باژێڕێ دهۆكێ دبينم كو زانكۆيا ئه‌مه‌ريكى يا كوردستانێ، سه‌ركه‌فتيانه سال ب سال به‌ره‌ڤ پێش دچيت و كادرێن باش و ژێهاتى په‌روه‌رده دكه‌ت بۆ ڤى ولاتى. پێدڤييه ب زۆرى و زه‌حمه‌تييا وان بزانن و چ جارا زه‌حمه‌تييا باب و باپيرێن خۆ ژبير نه‌كه‌ن كو ئازادييا ئه‌ڤرۆ به‌رێ خوين و ڕه‌نج و خه‌باتا وانه، يان شه‌هيدانه كو ئه‌ڤرۆ ئه‌م به‌رهه‌مێ وێ دبينين و ب ئازادى و ب كه‌يفخۆشى پێكڤه ئاهه‌نگا ده‌رچوونا ڤان خۆشه‌ويستا دگێڕين.
هه‌تا نها وان ئه‌ركێ خۆ ب هه‌مى دلسۆزيڤه يێ بجى ئيناى. ئاخ و ئازادى يا ڤى ملله‌تى يا پاراستى. هوين ژى ئه‌ڤرۆ پێدڤييه ب دلسۆزى د هه‌مى وارێن ژيانێدا ده‌ست پاڤێژنه خزمه‌تا ملله‌تێ خۆ و ولاتێ خۆ. ب زانست و زانين و مه‌عريفه‌يا كو هه‌وه بده‌ستڤه ئيناى، پێدڤييه گه‌له‌ك سه‌ركه‌فتنێت مه‌زن تۆمار بكه‌ن، ڕۆلێ خۆ يێ كاريگه‌ر و داهێنه‌ر بۆ ئاڤاكرنا ولاتى و پێشڤه‌برنا جڤاكا كوردستانێ، ببينن.
هوين ئێدى دێ بنه داينه‌مۆيا پێشڤه‌برنا ولاتى. پێدڤييه هوين ببنه هێڤێنێ پێشكه‌فتنا جڤاكى و زانستى و مه‌عريفى. پێدڤييه سيسته‌مێ ڕێڤه‌برنێ و جڤاكێ بۆ ئاسته‌كێ گه‌له‌ك بلندتر ژ يێ ئه‌ڤرۆ ببه‌ن. ئه‌ڤه نه ئه‌ركه‌كێ بساناهى يه، لێ پێدڤييه هوين كۆڵ نه‌ده‌ن و سه‌ركه‌ڤن. هه‌ر وه‌كى چاوا هه‌وه كۆل نه‌دا،
هه‌وه شه‌ڤ و ڕۆژ كرنه ئێك و ب شێوه‌يه‌كێ سه‌ركه‌فتى قۆناغێن خويندنێ ده‌رباز كرن، پێويسته ڤێ قۆناغا دى ژى ده‌رباز بكه‌ن و ب خۆشى و سه‌رفرازى خزمه‌تا ولاتێ خۆ بكه‌ن.
ده‌رچوويێن هێژا..
د قۆناغا نوى يا ژيانێدا، هه‌ر ئێك ژ هه‌وه، د هه‌ر واره‌كيدا ده‌ست ب كارى بكه‌ت، چاڤێ مه يێ ل هيممه‌تا هه‌وه كو هوين خودان ڤيژن بن، باوه‌رى بخۆ، دويربين، پرۆفيشينال، ده‌ستپێشخه‌ر، داهێنه‌ر، بنياتنه‌ر و به‌رهه‌مدار بن بۆ ڤى ولاتى. ژبۆ بجى ئينانا خه‌ون و خۆزى يێن خۆ، ب ئيراده بن. ب ئيراده بن بۆ پێشڤه‌برنا كوردستانێ، چ جارا كۆل نه‌ده‌ن، به‌ره‌ڤ پاشه‌ڕۆژێ، هيڤى و ئومێدێن ڤى ملله‌تى بگه‌هيننه ئارمانجێ.
ل هه‌رێما كوردستانێ و عيراقێ، گه‌له‌ك هيڤى ب هه‌وه هه‌نه، ولات چاڤه‌ڕێى هه‌وه‌يه و هيڤى دكه‌ت گه‌نجێن زێده‌تر ئه‌ڤ ئه‌ركێ كو لسه‌ر ملێ وان هه‌ى بۆ پاشه‌ڕۆژا ڤى ملله‌تى بجى بينن. پێدڤييه د هه‌مى وارێن ژێرخان، ئابوورى، گه‌شه‌پێدان، زانستى، مه‌عريفى و هه‌مى وارێن ديدا، ببنه پێشه‌نگ و ولاتى به‌ره‌ڤ پێش ببه‌ن. ئێدى جهێ تلييا هه‌وه ب نها و پاشه‌ڕۆژا ولاتێ مه‌ڤه ديار دبيت. ب شێوه‌كێ كاريگه‌ر به‌شدار و ده‌ستپێشخه‌ر بن بۆ ڤه‌ديتنا چاره‌سه‌رييا كێشه و ته‌حه‌دى يێن ئه‌ڤرۆ ل ولاتێ مه هه‌ى، وه‌كى: كێشه‌يێن تێكچوونا كه‌شوهه‌واى، چاوانييا پاراستنا ژينگه‌هێ، كێمبوونا ئاستێ ئاڤێ، بيابانبوونێ، كێشه‌يێن جڤاكى، ئيدارى، سياسى و هه‌تا دويماهيێ.
ده‌رچوويێن زانكۆيێ ل كوردستانێ و عيراقێ، پێويسته ژ نهاڤه پێشبينييا كێشه و ته‌حه‌دى و ئاريشه‌يێن سبه و پاشه‌ڕۆژێ بكه‌ن. ژ نهاڤه فكر لێ بكه‌ن و هه‌ولا بده‌ن داكو چاره‌سه‌رێن درست بۆ كێشه‌يێن ڤى ولاتى ببينن. هه‌ر ئێك ژى بخوازيت خويندنا خۆ يا بلند بدويماهى بينيت، پێدڤييه ب هه‌مان گيان و باوه‌رييا سه‌ركه‌فتنێ، لسه‌ر هه‌ولدانێن خۆ به‌رده‌وام بيت.
هه‌ر دڤێ ده‌ليڤێدا، من دڤێت هه‌مى لايه‌كى پشتڕاست بكه‌م كو وه‌كى هه‌رگاڤ دێ لسه‌ر پشته‌ڤانييا زانكۆيا ئه‌مه‌ريكى يا كوردستانێ ل دهۆكێ و زانكۆيێن دى يێن كوردستانێ به‌رده‌وام بين. ئه‌م په‌رۆشى پێشڤه‌چوونا زێده‌ترا ئاستێ خويندنێ و فێركرنێ و خويندنا بلندين ل كوردستانێ. هندى ئه‌م بشێين، بۆ پشته‌ڤانييا زانكۆيێ و گه‌نجان، هه‌ر چ ژ ده‌سێ مه بێت، خه‌مساريێ ناكه‌ين و يا پێويسته دێ ئه‌نجام ده‌ين.
هه‌روه‌سا هه‌مى پشته‌ڤانيێ ل هه‌ولا دامه‌زراندنا (ده‌زگه‌ها متمانه‌به‌خشينێ ب پرۆگرام و ناڤه‌ندێن خويندنێ) ل هه‌رێما كوردستانێ دكه‌م. ده‌ستخۆشيێ ل هه‌ولێن و كۆششێن ڕێزدار مه‌سروور بارزانى، سه‌رۆك وه‌زيرێ هه‌رێما كوردستانێ بۆ دامه‌زراندنا ڤێ ده‌زگه‌هێ دكه‌م، هه‌روه‌سا ژى ده‌ستخۆشيێ لێ دكه‌م بۆ ڤيژنا وى يا كو ئه‌ڤ زانكۆيه لسه‌ر هاتيه ئاڤاكرن. هيڤيدارم به‌رده‌وام و سه‌ركه‌فتى بيت. خۆشحالم كو دبينم زانكۆيا ئه‌مه‌ريكى يا كوردستانێ، بها و گرنگى يا دايه زۆربه‌ى وارێن زانستى و مرۆڤى و ئه‌ڤرۆ دڤان ڕێوڕه‌سمادا، ل قۆناغا دويێ ژى بگشتى، (145) ده‌رچوو، دێ باوه‌رناما زانكۆيى وه‌رگرن.
ئه‌ڤ گه‌نجێن عه‌زيز، ب وێ پسپۆڕييا كو ب ده‌ستڤه ئيناى، دێ د گه‌له‌ك وارادا خزمه‌تا ولاتێ خۆ كه‌ن، وه‌كى: ئه‌ندازيارييا بيناسازى، ڕێڤه‌برنا كارى، ئه‌ندازيارييا ئه‌لكترۆنى، په‌يوه‌ندى و گه‌هاندن، ژينگه، ئاى تى، ديزاينا ناڤخۆ، په‌يوه‌ندى يێن نێڤده‌وله‌تى، ڕێڤه‌برنا نه‌فت و گازێ، ئه‌ندازيارييا نه‌فتێ، سياسه‌تا گشتى و ئاسايش و لێكۆلينێن ستراتيژى. ئه‌ڤه جهێ شانازى و خۆشحالييا مه‌يه.
ئاماده‌بوويێن ڕێزدار..
من دڤێت جاره‌كا دى ته‌ئكيدێ لسه‌ر ڕۆلێ زانكۆيێ بكه‌م بۆ دابينكرنا پێويستى يێن بازاڕێ كارى و هه‌مى وارێن دى يێن كو بۆ پێشئێخشتن و گه‌شه‌پێدانا هه‌ر ولاته‌كى، پێويستن. لسه‌ر ڤێ ئێكێ، پێدڤييه زانكۆ گرنگييه‌كا تايبه‌ت بده‌ته داتا و لێكۆلينێن زانستى و بكه‌ته بنگه‌هه‌كێ سه‌ره‌كى يێ كار و پرۆگرامێ خۆ. بۆ ڤێ چه‌ندێ، پێدڤييه هاريكارى و هه‌ماهه‌نگييه‌كا درست دناڤبه‌را ده‌زگه‌هێن حكوومى يێن په‌يوه‌نديدار و كه‌رتێ تايبه‌ت و زانكۆيادا هه‌بيت. ئه‌ڤه دێ هاريكار بيت بۆ دانانا پلانێن هه‌نۆكه‌يى و يێن ئاينده‌ى.
ده‌رچوويێن خۆشتڤى..
باشترين سه‌رمايێ هه‌وه، مه‌زنترين هێزا هه‌وه، ئه‌و زانست و مه‌عريفه و پسپۆڕى و تايبه‌تمه‌ندى يه، يێن كو هه‌وه د قۆناغێن خويندنێ بگشتى و خويندنا زانكۆييدا بتايبه‌تى بده‌ستڤه ئيناى. ئه‌ڤه مه‌زنترين سه‌رمايه‌يێ ژيانا هه‌وه‌يه. باشترين وه‌به‌رهێنانا كو دايكوبابێن هه‌وه كرى ئه‌ڤه بوويه. ئه‌وه كو هه‌مى هه‌ول داين و هاريكار و پشته‌ڤان بوون، داكو هوين سه‌ركه‌فتنێ د خويندنا خۆدا تۆمار بكه‌ن. ئێدى ژ ئه‌ڤرۆ وێڤه نۆرا هه‌وه‌يه كو چاكييا وان بده‌نه‌ڤه ب خزمه‌تكرنا ولاتێ خۆ، پێشڤه‌برنا ولاتێ خۆ. ملله‌ت و ولاتێ هه‌وه، موحتاجى هه‌وه‌نه. هوين ب سه‌ركه‌فتن و كار و خزمه‌تێ، دێ دلێ وان و دلێ مه هه‌ميا خۆش كه‌ن.
پاشه‌ڕۆژا ئه‌ڤى وه‌لاتى يا د ده‌ستێ هه‌وه‌دا. هه‌روه‌كى چاوا هوين ژ هه‌مى جهـ و ده‌ڤه‌ر و پێكهاتان ل ڤێرێ پێكڤه كۆم بوونه، هوين ژ هه‌ر جهه‌كێ كوردستانێ و عيراقێ هاتبن و هه‌وه زانكۆ بدويماهى ئينا، ب هه‌مان شێوه، پێويسته هه‌وه ڕۆله‌كێ كاريگه‌ر هه‌بيت بۆ پێشڤه‌برنا كولتوورێ پێكڤه‌ژيانێ، ته‌باييێ، لێبوورينێ و هه‌مه‌ڕه‌نگييا هه‌رێما كوردستانێ و عيراقێ.
ب ده‌رچوون و سه‌ركه‌فتنا هه‌وه گه‌له‌ك خۆشحالم. خۆشحالم كو ڤێ ئێڤارێ ل دهۆكا خۆشتڤى، دگه‌ل هه‌وه‌مه. ديسا پيرۆزباهى و ده‌ستخۆشيێ ل هه‌وه دكه‌م. ده‌ستخۆشيێ ل دايكوباب و مامۆستايێت هه‌وه دكه‌م. ده‌ستخۆشى و سپاسييه‌كا گه‌رم ل سه‌رۆكاتى و ڕێڤه‌به‌رييا زانكۆييا ئه‌مه‌ريكى يا كوردستانێ ل دهۆكێ دكه‌م كو ئه‌و ژى ئه‌ڤرۆ به‌شه‌كێ گرنگێ سه‌ركه‌فتنا هه‌وه‌نه. ده‌ستخۆشيێ ل وان دكه‌م و هيڤييا سه‌ركه‌فتنێ بۆ وان دخوازم.
هه‌ر هه‌بن، هه‌ر شاد و سه‌كه‌فتى بن. ب ئانه‌هييا خودێ دێ هه‌ر بينين كو كوردستان ب هه‌وه يا ئاڤه‌دانه. سه‌ركه‌فتى بن. ديسا پيرۆز بيت و ب خێر بێن سه‌رچاڤا.
زۆر سپاس.
