بەلەمێکی ماسیگرتن کە پەنابەرانی هەڵگرتبوو لە کەناراوەکانی یۆنان وەرگەڕا و بەهۆیەوە ١٧ کەس گیانیان لەدەستدا.

بەپێی هەواڵی میدیاکانی یۆنان، بەلەمێکی ماسیگرتن کە پەنابەرانی هەڵگرتبوو لە نزیک نیمچە دوورگەی پێلۆپۆنێس لەم وڵاتەدا وەرگەڕاوە و ١٧ کەس گیانیان لەدەستداوە.

لەم ڕووداوەدا کە لە ئاوە نێودەوڵەتییەکان ڕوویدا، ١٧ کەس گیانیان لەدەستداوە و زیاتر لە ١٠٠ کەسیش ڕزگارکراون. هێشتا ژمارەی تەواوی سەرنشینەکانی ناو بەلەمەکە نەزانراوە.

ئەو پەنابەرانەی کە ڕزگارکراون گواستراونەتەوە بۆ بەندەری شاری کالاماتا و هەوڵەکانی گەڕان و ڕزگارکردن لە شوێنی ڕووداوەکە بەردەوامە.

هەروەها میدیا ناوخۆییەکان باس لەوە دەکەن کە بەرەبەیانی ئەمڕۆ ٨٠ پەنابەری نایاسایی لە دوورگەی کریت لە مەترسی خنکان ڕزگارکراون.

 

 

گوڵان: سەردار خەلیل