Hêzên Amerîkayê sîstemên berevaniya asmanî yên pêşketî li baregeha xwe ya li kêlgeha Omer a li Dêrazorê bicih dike.

Rewangeha Sûrî ya Mafên Mirovan belav kir, firokeyeke barhilgir a Amerîkayê li baregeha Omer a li gundewarê Dêrezorê daket û sîstemên berevaniya asmanî yên pêşketî danîn.

Li gorî zanyariyên Rewangehê, di dema daketina firokeyê de, dewriyeyên hevbeş ên leşkerî yên hêzên Amerîkayê û Hêzên Sûriyeya Demokratîk (HSD) li herêmê hatine kirin.

Ji aliyekî din ve, Hevpeymaniya Navdewletî ya li dijî DAIŞê 40 kamyonên ku çek û cebilxane hilgirtibûn derbasî binkeya xwe ya li Til Bêdarê ya li bakurê Hesekê kirin.

Di dama dawî û bi taybetî piştî şerê di navbera Îsraîl û Hemasê de di 7ê Cotmeha 2023an de, gelek caran baregeha hêzên Amerîkayê li kêlgeha Omer rastî êrîşên bi mûşek û dronan tê.

Kêlgeha Omer a petrolê li başûrê rojhilatê Dêrazorê ye û baregeheke mezin a Hevpeymaniya Navdewletî lê ye û gelek caran ji aliyê mîlîşyayên ser bi Îranê ve rastî êrîşan hatiye.

 

K24