رۆژنامه‌یه‌ك: ئوم كه‌لسوم گرِی له دڵی عه‌ره‌ب به‌ردا، به‌لاَم ئه‌ردۆگان جۆش و خرۆشی كولاَندن
له‌م رۆژانه‌ی دواییدا ناوێك بێئه‌وه‌ی رێكلام بكات، بێئه‌وه‌ی پاره‌یه‌كی زۆر خه‌رج بكات، بێئه‌وه‌ی هێزی چه‌كدار و سه‌ربازی بێشومار به‌كاربێنێ، ته‌نیا به‌هه‌ڵوێستێك كه ده‌گوترێ هه‌ڵوێستێكه به‌ده‌ر نییه له موجامه‌له، ئه‌وه‌ی چه‌ند ساڵه به ئه‌مه‌ریكای زه‌به‌لاح نه‌كرا له‌ناوچه‌كه، ئه‌وه‌ی ئێرانی خاوه‌ن هێزێكی سه‌ركه‌ش و ملهور له رێگه‌ی هه‌وڵه جیدییه‌كانی خۆیی وپاشكۆكانی نه‌یانتوانی تێكه‌ڵ به هه‌ست و سۆزو عاتیفه‌ی عه‌ره‌ب بن به تایبه‌ت دوای ئه‌وه‌ی هاولاَتی عه‌ره‌ب ته‌واو بێئومێد بوو له‌سه‌ركرده‌كانی خۆی به‌رامبه‌ر به دۆسییه‌ی رۆژهه‌لاَتی ناوه‌رِاست و كێشه‌ی فه‌ڵه‌ستین، ره‌جه‌ب ته‌یب ئه‌ردۆگانی سه‌رۆك وه‌زیرانی توركیا ئه‌مرِۆ بۆته ناوێك له‌سه‌ر زاری زۆربه‌ی تاكی عه‌ره‌ب و نێوه‌نده سیاسی و راگه‌یاندنه‌كان به‌هۆی ئه‌و هه‌ڵوێسته گه‌رمه‌ی به‌رامبه‌ر به په‌لاماری ئیسرائیل كه بۆ سه‌ر كه‌شتی گه‌لی ئازادی ئه‌نجامیدا نواندی.
رۆژنامه‌یه‌كی عه‌ره‌بی به‌راوردییه‌كی كردبوو له نێوان هه‌ساره‌ی رۆژهه‌لاَت(كوكب الشرق) گۆرانی بێژی به‌ناوبانگ ئوم كه‌لسوم كه 35 ساڵ له‌مه‌وپێش دنیای به‌جێهێشت، له‌گه‌ڵ ئه‌ردۆگانی سه‌رۆك وه‌زیرانی ئێستای توركیا، رۆژنامه‌كه ده‌نووسێ" ئوم كه‌لسوم ئاگری له دڵی عه‌ره‌ب داگیرساند، به‌لاَم ئه‌ردۆگان جۆش و خرۆشیانی كولاَندو له‌به‌رامبه‌ریشدا هه‌ڵوێسته سیاسییه‌كانی سه‌رانی عه‌ره‌بی وه‌ك شه‌خته ره‌ق كرده‌وه".
رۆژنامه‌كه ئاماژه به‌رۆڵ و كاریگه‌ری هه‌ساره‌ی رۆژهه‌لاَت و باشبه‌كان ده‌كات،باشبه‌كان واته سه‌رۆك وه‌زیر، به‌لاَم ئه‌ردۆگان واتا منداڵی به‌هێز، رۆژنامه‌كه نووسیویه‌تی" هیچ كه سایه‌تییه‌كی عه‌ره‌ب له وه‌ته‌ی ئوم كه‌لسوم مردووه هێنده‌ی ئه‌ردۆگان دڵی تاكی عه‌ره‌بی به‌خۆشه‌ویستی داگیرنه‌كردووه‌و هه‌ندێك ناویان ناوه مه‌حه‌مه‌د فاتیحی سه‌رده‌م و هه‌ندێكیدیكه پێی ده‌ڵێن فریشته‌ی فریاد ره‌س و هه‌ندێكی دیكه‌ش ناویان ناوه عیزرائیلی ئیسرائیل.
ئه‌ردۆگان له ناوه‌رِاستی په‌نجاكانی سه‌ده‌ی رابردوو له له باكوری توركیا له دایك و باوكێكی به‌ره‌سه‌ن جۆرجی له‌دایك بووه‌و سه‌ره‌تای هه‌رزه‌كاریشی وه‌كو خۆی له چه‌ند بۆنه‌یه‌كدا ئاماژه‌ی پێداوه سه‌رسام و كاریگه‌ر بووه به گۆرانییه‌كانی ئوم كه‌لسوم, به‌لاَم دواتر ئه‌و حه‌زه‌ی له‌دڵ ده‌رده‌چێ به‌و پێیه‌ی باوكی زانایه‌كی ئایینی ناوداری ناوچه‌كه بووه‌و بۆ خوێندن ده‌چێته قوتابخانه‌یه‌كی ئایینی دوای ته‌واكردنی خوێندنیش بۆ په‌یداكردنی بژێوی رۆژانه‌ی ده‌بێته یاریزانێكی نیمچه پیشه‌گه‌ربۆ ماوه‌ی 10 ساڵ له‌گه‌ڵ یانه‌یه‌ك یاریكردووه كه ئێستا ئه‌و یانه‌یه نه‌ماوه.
ئه‌ردۆگان به‌ر له‌وه‌ی ساڵی 1981 زانكۆ ته‌واو بكات بۆ په‌یداكردنی خه‌رجی خوێندن له‌ماوه‌ی چه‌ند ساڵی خوێندن و قوتابخانه‌دا مۆزو گه‌زۆبه‌كونجی و گندۆره فرۆشی كردووه، هاورِێیه‌كی نزیك و هه‌میشه‌یی و خه‌ڵكی گه‌رِه‌ك و ئه‌و بازارِه‌ی له‌گه‌رِه‌كه‌كه‌یان بوون ده‌گێرنه‌وه‌ئه‌ردۆگان له‌سه‌رده‌می كاسبی رۆژنانه‌یشیدا كه‌شخه‌ترین مۆز فرۆش بووه تا ئه‌و كاته‌ی له‌ساڵی 1981 به‌شی كارگێری له زانكۆی بازرگانی و ئابووری ته‌واو ده‌كات كه ئه‌و كات كه‌سایه‌تییه‌كه‌ی چووه قالبێكی دیكه‌و جۆری ژیانی بووه ژیان و ئه‌زموونی وه‌زیفه‌یی.
ئه‌ردۆگان به‌ده‌ر له كاری سیاسی چێژ له ئه‌ده‌ب وه‌رده‌گرێ به‌تایبه‌ت كه هه‌موو قه‌سیده‌كانی مه‌ولانا جه‌لاله‌دینی رومی ئه‌زبه‌ركردووه‌وهه‌روه‌ها سه‌رسامیشه به شیعره‌كانی شاعیری توركی مه‌حه‌مه‌د عاكیف كه به‌شاعیری ئیسلامی ناسراوه‌و له‌ساڵی 1936 كۆچیكردووه له‌زۆربه‌ی بۆنه‌و موناسه‌باته‌كاندا شیعره‌كانیان به‌نموونه ده‌هێنێته‌وه، جگه له ئه‌ده‌بیاتیش شاره‌زایی له كاری سیاسی و فیقهی ئیسلامی هه‌یه.
ئه‌ردۆگان له‌ماوه‌ی سه‌رۆكایه‌تی توركیادا وه‌كو كه‌سایه‌تییه‌كی به‌هێزو كارا ده‌ركه‌وتووه به‌رده‌وام كارده‌كات له پێناو چاكسازی سیاسی و ئابووری ولاَته‌كه‌یی و كۆتایی هێنان به‌قه‌یرانه ئه‌تنی و ره‌گه‌زییه‌كان و كۆتایی هێنان به سیسته‌می سه‌ربازی ولاَته‌كه‌یی و گۆرِینی چه‌ند ماده‌یه‌كی ده‌ستووری به شێوه‌یه‌ك مافی گه‌لانی توركیا بێ جیاوازیكردن ره‌چاوبكات، ئه‌ردۆگان وه‌كو به‌رانگارێكی راسته‌وخۆی ئیسرائیل ده‌ركوتووه‌و بۆته ئه‌لته‌رناتیڤی سه‌ركرده‌كانی عه‌ره‌ب و گه‌لی عه‌ره‌بیش به‌و هه‌ڵوێسته‌ی خۆشحاڵن، هه‌ربه‌هۆی هه‌ڵوێسته ئیسلامییه‌كانی له‌نیسانی ئه‌مسال شا عه‌بدولاَی شای سعودیه میدالیای مه‌لیك فه‌یسه‌ڵی جیهانی تایبه‌ت به‌خزمه‌تكارانی ئیسلامی پێبه‌خشی، ئه‌ردۆگان له مونته‌دای دافۆسی ئابووری كه له ولاَتی سویسرا له 29 ى كانوونی دووه‌می ئه‌مساڵ كاره‌كانی به‌رِێوه‌چوو به‌هۆی شێوازی دانیشتنه‌كه‌ی به‌توندی به‌ره‌نگاری سه‌رۆك وه‌زیرانی ئیسرائیل شیمۆن پیرێس بۆوه‌و دواتر كشانه‌وه‌ی خۆی له مونته‌دایه‌كه كشانده‌وه.
جگه له‌مانه ئه‌ردۆگان پێداگری ده‌كات له‌سه‌ر چاره‌سه‌ركردنی كێشه‌ی كوردی ولاَته‌كه‌ی بۆ ئه‌م مه‌به‌سته‌ش كه‌ناڵێكی ته‌له‌فزیۆنی و رادیۆیه‌كی به‌زمانی كوردی كرده‌وه‌و هه‌روه‌ها به‌جیدیش كارده‌كات بۆ درووستكردنی په‌یوه‌ندییه‌كی پته‌و له‌گه‌ڵ هه‌رێمی كوردستان و گه‌یشتۆته ئه‌و حه‌قیقه‌ته‌ی كه ده‌بێ كۆتایی بێت به سیاسه‌تی كه‌مالیستی و دان نه‌نان به مافه‌كانی كوردو بوونی كورد وه‌كو پێكهاته‌یه‌كی نه‌ته‌وه‌یی، هه‌ر بۆ هه‌مان مه‌به‌ست له چه‌ند رۆژی رابردوو به‌فه‌رمی پێشوازی له‌سه‌رۆكی هه‌رێمی كوردستان مسعود بارزانی كرد.
چاودێرانی سیاسی وای بۆ ده‌چن ئه‌ردۆگان به‌و باكگراونده ئیسلامییه‌ی هه‌یه‌تی ده‌توانێ توركیا له‌و قۆناخه‌ی ئێستای له ته‌نگژه سیاسی و ئه‌تنی و ئابوورییه‌كان رزگار بكات.
