سەرۆكی هه‌رێمی كوردستان پێشوازی لە ئەمینداری گشتی رێكخراوی كۆنگرەی ئیسلامی و شاندێكی یاوەری دەكات
لە دیدارێكدا ، كە بەرێز كامیل حاجی عەلی وەزیری ئەوقاف ئامادەی بوو هەر دوولا دوا پێشهاتەكانی رەوشی ئێستای جیهانی ئیسلامییان تاوتوێكرد.
ئەمینداری گشتی رێكخراوی كۆنگرەی ئیسلامی كارو چالاكیەكانی رێكخراوەكەی لە عیراق خستەڕوو و رایگەیاند كە هەموو هەوڵیان دەخەنە گەڕ بۆ نەهێشتنی دوو بەرەكی تایفەگەری و چەسپاندنی ژیانێكی ئاسوودە و پێكەوە ژیانی ئاشتیانە لە نێوان سەرجەم پێكهاتەكانی جیهانی ئیسلامی.
هەروا تەئكیدی لە پێگەی هەرێمی كوردستان كردەوە لە جیهانی ئیسلامی و ستایشی رۆڵی سەرۆك بارزانیشی كرد لە پرۆسەی سیاسی عیراق و سەركەوتنی دەستپێشخەرییەكەی و بەرەوپێشبردنی هەرێمی كوردستان لە ڕووی تەبایی و پێكەوە ژیانی برایانەی گشت پێكهاتەكانی گەلی كوردستان.
سەرۆك بارزانی پاڵپشتی خۆی بۆ رێكخراوی كۆنگرەی ئیسلامی دەربڕی و رایگەیاند كە كۆنگرەكە دەتوانێ رۆڵێكی بەرچاو ببینێت لە پەیوەندی نێوان سەرجەم وڵاتە ئیسلامییەكان و تەئكیدیشی لەسەر بایەخی پەیوەندی و هاریكاری لە نێوان هەرێمی كوردستان و عیراق لە لایەك و رێكخراوی كۆنگرەی ئیسلامی لە لایەكی تر كردەوە و بەشداریكردنی ئەو رێكخراوەشی لە یارمەتیدانی گەلانی عیراق بە پێویست زانی.
هەروەها سەرۆك بارزانی ستایشی پرۆسەی دیموكراتی و فرە حزبیەكەی عیراقی كرد و رایگەیاند كە سەرەڕای بەردەوامی كاری تیرۆریستی بەڵام ئایندەیەكی گەش چاوەڕوانی عیراق دەكات.
