تا ئێستاش زۆر كەس بە هەڵە لە ریجیم گەیشتوون، لایان وابێت كە ریجیم مانای خۆبرسی كردن و بەلاوەنانی ژەمی خواردن دەگەیەنێت، بە مانایەكی دیكە، بەلاوەنانی هەموو جۆرەكانی خۆراك و مادە خۆراكییە گرنگەكان وەكو یەك كە كاریگەری خەراپ دەكاتە سەر تەندروستی، لەو كاتەی كە دابەزاندنی كێش پێویستی بە تەندروستییەكی زۆر باش هەیە. ریجیم Dieting واتە رێكخستنی بڕ و جۆری خواردن بە مەبەستی كۆنترۆلكردنی كێشی لەش. لە زۆربەی حاڵەتەكاندا بۆ دابەزاندنی كێشی لەش مەشقی بەدەنی یان وەرزش بە یەكەوە لەگەڵ ریجیمدا ئەنجام دەدرێت. بە گشتی چوار جۆری ریجیمی خۆراك لە ئارادان: ریجیمی كەمكردنەوەی چەوری Low-fat diets، ریجیمی كەمكردنەوەی كاربۆهیدرات Low-fat diets كە ئێستا زۆر بە كەمی پەیڕەو دەكرێت، ریجیمی سادەی كەمكردنەوەی وزە یان كەمكردنەوەی كالۆری Low-calorie diets باشترین و سەركەوتووترین و سەلامەتترین جۆری ریجیمە، بەم جۆرە دەتوانرێت رۆژانە 500-1000 كالۆری وزە لە خۆراكدا كەم بكرێتەوە، بەمەشەوە هەفتانە نزیكەی نیو تا یەك كیلۆگرام كێشی لەش دادەبەزێت یان تێكڕای بارستایی لەش بە رێژەی 8% لە ماوەی 3-6 مانگدا كەم دەبێتەوە، ریجیمی توند یان قوڕسی كەمكردنەوەی وزە یان كالۆری Very low-calorie diets واتە رۆژانە تەنها 200-800 كالۆری وزە لە خۆراك وەردەگیرێت بە كەمكردنەوەی چەوری و كاربۆهیدرات بە بێ كەمكردنەوەی پرۆتین، بەمەش دەتوانرێت لەگەڵ مەشقی بەدەنیدا هەفتانە1-2.5 كیلۆگرام كێشی لەش دابەزێنرێت، بەڵام زۆر پەسند ناكرێت چونكە دەبێتە ئەگەری ونكردنی بارستایی ماسولكە و ئەگەری تووشبوون بە نەخۆشی بەگەكان (ألنقرس Gout) زیاد دەكات. ریجیم، دەبێ لەژێر چاودێرییەكی نزیكی دكتۆر ئەنجام بدرێت بۆ رێگرتن لە روودانی ماكەكانی وەكو پوكانەوەی ماسوڵكەكان و تووشبوون بە بەدخۆراكی و نیشانەكانی كەمی مادە خۆراكییەكان.