چەوریییەكان ئاوێتەی ئۆرگانی ئاڵۆزن لە كاربۆن و هایدرۆجین و ئۆكسجین پێكهاتووە و لە ئاودا ناتوێنەوە. ماددە چەورییەكان گرنگی زۆریان هەیە لە لەشدا بۆ نموونە هەڵگرن بۆ گواستنەوەی ئەو ڤیتامینانەی كە تەنیا لە دەورووبەرێكی چەوردا دەتوێنەوە لەمانە ڤیتامینA، D،E و K، چەورییەكان چێژ و بۆنی خۆراك خۆشتر دەكەن، وەكو گوشن كاردەكەن بۆ پاراستنی ئەندامەكانی ناوەوە لە زەبر، چەورییەكان سەرچاوەیەكی چڕی وزەن، یەك گرام چەوری 9 كالۆری وزە دەدات. دوو جۆری سەرەكی چەوری لە خۆراكدا هەیە، چەورییە تێرەكان Saturated fats و چەورییە ناتێرەكان Unsaturated fats، بەم دواییەش زۆر باس لە جۆرێكی دیكەی چەوری دەركرێت بە ناوی چەورییە نێوەندەكان Trans fats كە بە شێوەیەكی سەرەكی لە پیشەسازی خۆراكدا بە كرداری هایدرۆجینكردن دروست دەكرێت. بە گشتی چەورییە تێرەكان و چەورییە نێوەندەكان زۆر پەسند ناكرێن بۆ تەندروستی لەبەر ئەوەی كە سەرچاوەن بۆ كۆلیستیرۆلی خراپ و تووشبوون بە نەخۆشی دڵ، ئەم چەورییانە زیاتر لە بەرووبوومی ئاژەڵیدا هەنە. چەورییە ناتێرەكانیش لە بەرووبوومە رووەكییەكاندا هەنە و زیاتر بۆ تەندروستی پەسند دەكرێن بە تایبەتی زەیتی زەیتوون. پێویستە كە بڕی چەورییەكان رۆژانە بەم شێوەیە بن: گشتی چەوری كەمتر بێت لە 65 گرام بۆ 2000 كالۆری و كەمتر لە 80 كالۆری بۆ 2500 كالۆری رۆژانە. چەورییە تێرەكان كەمتر لە 20 گرام بۆ 2000 كالۆری و كەمتر لە 25 گرام بۆ 2500 كالۆری. كۆلیستیرۆل كەمتر بێت لە 300 میللیگرام بۆ 2000 كالۆری و 2500 كالۆری.